Kenang Bujang Berani : Ditusun : Richard Ak Changgan

Hooo...Haaa....Hoooo..Haa...Nya alai enda aku busung ngelungkah gandung, enda ku tulah ngelungkah tanah, enda ku lesi ngelanggar hari,

laban aku semina deka meringga, deka merawa,

kampung ke tusut sengkabung pelung,

Hari ke kabut sengkilur kebung langit pengerawan....

Ohhh...ukai sengapa aja, ukai sebarang kangau,

Tang nesau pendiau bala aki inie kami ke udah tegalan rimpi,

bujur tunsang, sinu ngenang,

ngagau ke bala petara lama, ke udah luya,

pambar lelang...ngambi ke bisi nguang jenuh,sama kiruh

enggau kami ke agi besepi ke garam masin pang, bejeput ke ribut musin mansang....

Nya alai....ngarap ke kami tau gayu guru, chelap embab, nadai apa nama....gerai belama.....ohhh...haa...

Nya alai, sebedau aku ngemanjai ke agi kenang Bujang Berani Iban tu ( Tuai Kayau) dulu aku minta ampun ngagai pemacha mayuh ke bisi nguang ba blog aku tu, nyangka meh kenang enggau jerita aku tu enda temu pun, lalu enda temu ujung. Ukai sengaja, ukai ka berupa, tang laban penemu enggi tudah aku ke bedau nyengenda segala dalam baka penemu kitak mayuh.....ka pan enda....ni alah ngarap ke orang lama aja ke nemu berumpang kampung, ni alah semina besengkilung dalam kibung deh.....nguji meh kitai ke segi anak lelaki, bekesai ke anak bulu siga, beraut ke penemu, bejurai lalu betuku ke gantang malut seribu, betukik ke kebuk belanggar penemu, tang ukai kena belaya nya bakih!!! kena kitai ngingat ke pendiau bansa enggau aki inie kitai ke udah lama ngejang mulai ngagai menua Batang Mandai....nyangka icha sida ia ke di menua din ulih berasai nyamai, ninggal ke kitai uchu-ichit, wit sida ke agi ba menua nyata tu.........

 Bagi 1: Reti jaku "Bujang Berani"   

Mayuh kitai iban ke rebak baru diatu enda entu mereti ke leka jaku "Bujang berani" tu. Nyangka meh ketegal kitai ke udah jauh nerima pemansang jaku bansa bukai kini....aku enda nyalah kitai ke biak...Ukai semina kitai ke biak, bala sida ke tuai diatu pan bisi enda nemu reti sintin jaku nya. Nya alai aku naka ulih bejurai ke reti jaku nya ngagai bala kitai. Enti di sema ke...Bujang Berani ba jaku kitai ke maya hari tu, Bujang berani tu mayuh agi di ungkup ke kitai ngagai siku-siku pungka lelaki ke kempang ati ngereja pengawa ke enda di sangka, enda di sadang kitai ulih di kereja ia, tang enda ulih di kereja lelaki ke bukai.

     Ngambi ke chunto: " Nya baru bujang berani, peda kitak, kitai enggai nangkap sawanya, enti enggi aku, lari aja.......enggi ia tak tangkap enggau jari..amat berani nuan bakih" pia deh ko jaku kitai ke maya hari tu. Nyamai ga endur kitai nyema, enda ibuh ke jauh. Siti agi chunto : " Apu bakih...lebu ngapa kitai segi Bujang Berani, uji palu' enggau akih ke mayuh jaku nya...pedis ati ninga ia bejaku nyindir kitai" pia deh ko kitai nguna leka jaku nya. Nya meh chara kitai nguna jaku nya lebuh ke nguna ia dalam jaku kitai ke diatu besari-sehari dalam pengidup kitai ke diatu.

   Tang enti kelia, Leka jaku tu ukai senang kitai ka ninga siku-siku pungka lelaki di gelar " Bujang berani". Kelebih agi enti di sebut " Raja Berani" tauka " Pungka lelaki". Nitih ke pengingat aku agi mit menya, lebuh ke selalu ninga Niang Ajah, ke di sebut kami "Apai Tuai" kelia, betusui ke jerita enggau ensera, ia madah ke Bujang berani tu di gela' ke orang ngagai siku-siku pungka lelaki ke kala udah "basah jari". Nemu kitak reti jaku "Basah Jari". Reti ia ianya kala udah bedengah, tauka mumpung pala sekali ke pala munsuh lebuh ngayau tauka pala mensia ke bukai. Nya meh ke patut bulih gela' bujang berani. Ukai main-main ga pengidup orang ke bejuluk bujang berani tu menya, sida ia semampai di kenangi ke orang, di ketakut ke bala munsuh, ia meh seput enggau dinding bulu bala orang bukai ngenan ke menua.

  Nya alai ke di temu aku semina orang Panggau Libau ke benama " Keling" aja ke ngembuan ensumbar "Keling gerasi Nading,Bujang berani kempang, keling aji ke berani mati laki " Kumang" butang enggau bini orang". Nya meh Pungka lelaki ke di temu aku ulih nguna leka jaku Bujang Berani ba ensumbar ia. Nyangka bisi ga ketuai kayau kitai iban kelia ke nguna ensumbar Bujang berani tang enda meh bangat nyentuk baka enggi KELING.......

Uji perati ke kitak ensumbar kengka Tuai kayau kitai menya ke beberita ba baruh tu :

Nyadi ensumbar sida tunggol berani ari Emperan enggau Batang Ai nya baka tu:

1. Temenggong Demang “Buah Raya”
2. Temenggong Sandah “Guntor Dalam”
3. Jalal “Pintu Batu, Pintu Petara, Pintu Pudu Antara Menoa”
4. Renggi (Apai Biti) “Keting Nyempal”
5. Asan (Apai Anyom) “Panti Tulang”
6. Simpai “Pintu Tapang”
7. Injak “Bunga Tengang”
8. Anyom Anak Asan “Batu Begitang Nanga Kelawit”
9. Unau “Rimau Badang”
10. Idieng “Lang Bedindang Nanga Pelok”
11. Intu “Patok Nyengok”
12. Serunggang (Unggang) “Antu Gerasi”
13. Layang “Biau Balai Tasau Menoa”
14. Barau “Gong Senuyong”
15. Ngumbang “Berauh Langit”
16. Bantin “Ijau Lelayang”
17. Mugo “Keting Nyempal”
18. Mumin “Kera Kurus Ragau Ragau, Pedang Semiap Pala Nilau”
19. Sumbu “Alun Panjai Chibai Manggum Bulu, Bantai Ka Enggi Dek, Adu Ka Enggi Aku”
20. Rengga (Anak Bantin) “Ambun Belabuh Wong Padong, Asap Melap Nanga Sukong”
21. Kuyah “Langau Nanga Bon”
22. Nam (Anak Bantin) “Ringin Beratong Nanga Bon”
23. Jugo “Burik Menaul”
24. Kana “Ngitar Tanah Dinga Di Pala Wong, Keting Lasah Ngikil Lubang Tumbong”

Uji kitai berati ke enggau manah, nadai ensumbar sida ia nguna Bujang Berani............Nya alai, nya aja meh penemu ke ulih di pe kunsi ke aku enggau bala kitai pemacha ba blog aku tu...arap ke kitai ngingat ke pekara tu enggau manah, ambi ke enda nyau ari pengingat tusun peturun kitai.....terima kasih,,,....mupuk aku