sape

AKU BISI DAGANG NYUAL SAPE


Dikena aku ngibun pesaka alat muzik dayak/orang ulu/kayan dia aku bisi niat ati lalu diatu ngaga sape ke dijual sereta ngaga sape design tempahan orang. Diatu aku udah nyual mayuh sape ba orang di semenanjung Malaysia, Sabah, Brunei enggau di Sarawak mega.

Nuju kita ti ka nempah sape bisi tandatangan aku, sereta ti rindu nyukung pengawa aku kita tau mesej aku ba Facebook aku ba link tu : https://www.facebook.com/richard.thias tauka ninggal ka pesan ba comment ba ruang baruh nya ambi ulih dipeda aku ngena email. tauka email aku ba; richardthias@yahoo.com

Rega sape tau dipeda ditu :

Rega sape nitihka jenis pala, pemesai/pemanjai. 

1. Kayu pelai enti bisi ukir tapi nadai pickup Rm800-1000 nitihka pala. 

2. Enti sape bisi pickup, bisi ukir maksud full package start ari RM1200 hingga 

RM 1800 (Nitihka pala sape, kenyalang biasa,kenyalang ukir, ukir tebuk aja, baya).

3. Tempahan khas sape nitihka kedeka pelanggan RM2000 to RM2500. 

(design pelanggan/persendirian) 

4. Sape hiasan pemanjai 3jengkal , 4 inchi dada , pala tradisional/biasa : RM 250. 

5. Sape hiasan pala kenyalang panjai 4 jengkal setengah, dada 6 inchi  :RM400 (nadai 

pickup), bisi pickup (RM650).

**Semua rega enda termasuk kos pos/penghantaran.

Sape Kenyalang tu ditempah design orang ba miri/udah dijual.

Enti beminat design sama tau ga madah : RM1800

 
                       SAPE HIASAN/Pengias bilik

Baju T-shirt edisi aku empu. Empai dijual..ke pemandang aja.

Gambar : Live perform ba pentas AJARR 2013 begulai enggau Band MASTERPIECE

Ngiring HAILEY enggau lagu "KUMANG". Bulih lumur 2 ba kategori SMS.

SELAMAT NGETANKA MAIN ASAL BANSA DAYAK/ORANG ULU

BUP DALAM JAKU IBAN DEKA DITERBIT/DICHELAK

BUP ASIL ARI ABI JARI AKU
DEKA DI CHELAK LALU DI JUAL .

BUP NOVEL 'KENANG PENGERINDU TUA' DIATU UDAH BISI BA PASAR!! TAU GIGA. UDAH DIJUAL BA SERATA MENUA SARAWAK.

DI CHELAK BA BARUH PENGELUAR : BORNEO MEDIA SOLUTIONS

BUP ENSERA UNCHA ENGGAU UNCHING AGI DI TARUH AKU

NGANTI UDAH PUBLISH NOVEL ENGGAU MUJUR DULU.

BISI RUMAH AGI BAKA KELIA PIA?

NINJAU RAMPA MENUA                        (ditusun baru: Richard Changgan) 

 ( Dikirum: ROS Galayan) 

          Facebook : 

http://www.facebook.com/ros.galayan?fref=ts

                                       Rumah Jandok Ulu Yong, 96807 Kapit

                                         Gambar enda tau dikena sengapa enti nadai pemendar ari 

                                                                           blogger tauka Ros galayan empu

Mayuh kitai ke rebak baru diatu enda kala meda bakani pendiau kitai Iban ke agi berumah, beridup sebaka enggau rumah panjai lama kelia. Nyangka mih diatu kitai udah riri ari mit idup menchelak leka mata lalu meda rumah digembar semin/rumah batu di nengeri. Pia mega nyangka sekeda kitai ari mechah ada ke dunya tu lalu idup meda rumah panjai moden tajapan iya digaga ari kayu manah ke bisi dijual di pasar. Nya mih ke ngasuh kitai semina ninga aja orang betusika pendiau orang kelia/lama suba. Tang kitai enda kala meda ngena mua mata kitai empu.

                     Rumah panjai ke lindap diayung pun nyiur, asap melap menuhka tengah laman orang ke benung nyalai enggau emparu jelu...

                             Tanju sida tu agi betugung lumpung kayu dikena ngaga kayu api, bedau direpik.

Nya alai ditu aku berasai temegah ati laban bisi menyadi kitai Ros Galayan meri article ba senentang Rumah panjai ke agi sebaka enggau chara pengidup lama kelia suba. Tajapan bisi siti dua pekara ke udah berubah tang enti dibanding enggau gaya pengidup rumah moden ba nengeri, sigi jauh bida ari gaya rumah panjai sida tu.

Aram mih aku mai kitak raun ngagai rumah  Jandok ,ulu yong kapit ,

Asai ke diri empu duduk rerungguk, meratika sida ibu enggau
dara ke benung rerauh mandi. 

Enti suba pejalai ari pasar kapit ngagai Rumah Jandok kira-kira sari manah laban suba ke bedau datai jalai. Diatu laban udah datai jalai kira-kira 4-6 jam aja ngena van sekiraka nitihka pemanah jalai mayanya. Pemanjai  rumah panjai  sida tu kurang lebih bisi 20  pintu aja. Nitihka info ari pengirum artikel tu, rumah panjai tu sigi udah lama ditumbuhka ba menua tu. Kelebih agi ba menua Ulu Yong, rumah panjai tu mih siti ari keresa menua ke chukup berega.

Nitihka info, Batang pengawa urang ba menua nya kelebih agi nanam padi,lada,sayur ,buah gau utai bukai. Penatai pemisi urang ba menua tu diatu bisi maju mimit ari ke udah ,enti suba enti  ka ke pasar tumu pagi udah dani kira betenggau empai serepan pagi. Enggai ke laun datai  ba pasar laban penyauh pejalai bisi ngambika sehari tuai baru ulih datai ba pasar kapit. Diatu kira udah nyamai mimit 4 -6 jam ulih datai ba pasar.

pengawa maya lepa

Benung ngaga sintong

aki benung ngeraut rutan kena mingkai lanji

Enti maya begawai  urang ba menua tu agi ngetan ke adat asal  baka bepantun,nimang ,enggau semua adat iban ke bisi. Semua adat kelia suba agi mengkang di pegai urang ba rumah panjai tu. 

rambau gawai

ngajat

antu pala nyadi simbol pengawa bujang berani kelia 

Chukup betuah mih enti nyema tudah diri (Blogger) ada ba rumah panjai tu lalu ulih meda pendiau bansa diri ke chulin. Tang nya nadai ngawa umbas mih semina ninga berita lalu meda gambar menua tu. Nyangka bisi ari ila aku empu ulih nemuai ngagai menua tu. Beterima kasih aku ngagai Ros Galayan laban udah meri penerang lalu meri pemendar ngagai aku ngena gambar enggau info iya….Ni bala bukai dih? Enti kita bisi nemu utai bakatu tau mega ngirum ke aku ngena emai richardthias@yahoo.com tauka inbox ba FB aku http://www.facebook.com/richard.thias

Gambar ke bukai

ngerangkaika getah ba dinding muak ari tanju

keresa lama ke berega

tajapan jauh ba menua ulu tang piring astro dipeguna dikena nemu informasyen dunya baru

arapka nembiak dua iku tu betuah, lalu tetap ngingatka keresa lama enggau pendiau bala aki ini sida iya

Pengawa Jadi Mali Ditusun: Richard Changgan

Gambar pengias

Pengawa jadi mali selalu disabang orang ngena pengawa mandi darah babi. Nyadi babi di banchak orang ari ulu, seduai ke jadi melaki bini tu tadi muak ari ili lalu diatap orang ngena pua kumbu ambi enda dipeda sebayan tauka utai bukai ke nemu ngachau pengidup seduai iya. Babi ke dikena mega ukai babi sengapa ke dikumbai orang babi sepa udah berapa kali beranak. Bisi ga penemu tuai madahka babi sepa mesti udah 7 kali beranak enda tau kurang. Tang kitai enda mih nemu babi ke dikena orang kemayahari tu. Orang ke jadi mali bakatu : Jadi enggau ibu/aya, baru sekali petunggal tauka diri madi. kena tanah aki/ini. Tang enti jauh amat enda ga tentu ngachau..sekiraka semak nya ku aku

Suba nitihka cerita...anak Sengalang burung mega jadi mali enggau laki iya. Lalu diburu sengalang burung. nadai ulih beampun. Nya alai mayuh udah nyadi tajapan mandi darah babi! penyalah tetap bisi ungkup.Pengawa tu dikereja sigi belalai....enda tau dipeda nembiak baru. semina org tuai aja ulih meda. Pia mega ngut/babi ke dibunuh mega enda tau diempa orang sengapa. enggaika kena empa penusah tauka inggap sial ba batang tubuh orang bukai. Pia mega orang ke ulih meda pengawa tu semina orang ke udah belaki bebini aja..orang ke ulih makai babi ke dibunuh maia pengawa tu pan semina orang ke udah belaki bebini aja...

Bisi mega sida ke tuai madah...enti antara siku- siku kena ibu tau ka aya. Chunto :Enti seduai iya beranak , nyadi anak nya semampai indu, nyadi petanda manah. Tang enti seduai beranak ke lelaki tau nyadi pekara ke enda manah laban lelaki nyak tusun be-ibu.Ngagai indu nya, kadang-kadang pekara tu nyadi maya sida dah bisi anak pekara ke jai ka datai enti sida dah beranak. Nya alai nasit enggau ungkup sigi bisi....

• Nya alai  tepulai ngagai pengarap kitai siku-siku...enti kelia mesti diaduka. Tang diatu mayuh udah pengarap kristian. Tang engka bisi ga sekeda  diaduka orang ngena chara bukai kini
• Tang adat mandi ngena darah babi tu sigi ari kelia munya.....enda tau enda dipeguna. Laban jadi mali tu sigi mayuh mai pengerugi enti enda ba tubuh kitai ke jadi, gerinti ba tubuh anak. Nyangka kitai bulih reta tang pengerai ga enda. bulih anak tang reta ga enda.
• Kekadang pengidup kitai tusah, nemu singkung bajung nunda ku jaku tuai.
  
  Sekiraka minta ampun enti kenang aku bangat enda nyentuk tauka bisi enda betul laban ukai sengaja semina mih dikena kitai bekunsi ke pengawa enggau adat tuai ambika enda punas ba penemu kitai ke rebak dudi. 

APAI SALI THE RETURNS

 

                                      Baki Sirai begulai enggau Mr. Roy 

Pengelandik seduai dua tu ngerami menua ukai alang-alang agi enti lebuh diambi nyadi lemambang penghulu ( MC) ba panggau tauka"Pentas". Ka nadai-nadai ngelandik seduai dua iku tu ngembuan chara ti chukup manah dikena narit ati mensia ke bisi datai ngulu pengerami ti di gaga. Asal seduai dua tu ngemunka diri ba dunya pemerindang endang sigi udah lama kenyau ari ngaga group "RABAN APAI SALI" begulai enggau Embat lala sereta mega enggau Peter John Jaban (Anak Apai). Nya alai, sekiraka ambis menua udah di tujah lalu mega semua pentas rasmi ke bisi bala pemesai kala udah ngundang seduai iya. Enda semina ngembuan pengelandik bejaku kelulu tang ari segi sukut pengelandik begulai enggau peminat mega ngasuh seduai iya seruran dikerindu bala mayuh. Arapka seduai iya meruan mujur belama....hooooo!!! ha....idup raban anak Apai Sali....Anang enggai ngundang seduai dua tu enti bisi pengerami. Pasal bayar ulih dirunding.......Gerinti rami!!! sampai tepeliur , sampai pecah perut ketawa!!!

Ngaga Kalingai/pantang Dikirum : Jamal Bangun

Semua gambar turai kalingai/pantang tu digaga Aya Bujang mit (Jamal Bangum). Ukai semina nemu ngagai turai tang iya mega nemu mantang ngena mayuh macham bungai pantang enda milih ari ukir iban kelia nyentukka turai pantang moden rebak baru diatu. Asal ari Tuai Rumah Bangum Nanga Bangkit entabai Pakan. Iya mega nemu Beramban, Bebiau, begaga ensera lalu ngembuan penyiru ati ke adat main asal kitai iban. Taja umur agi biak tang semengat ati iya semampai bekaul enggau penemu iban tuai kelia. Sigi aruh sereta patut mih iya tu nganti apai iya ila nyadi tuai rumah. Pengelandik iya ngaga pantang sigi udah nyulut ari 4 tahun ke udah lalu. Diatu iya mayuh udah mantang bala ribai, bala negro kelimpah ari kitai iban empu ketegal iya ke gawa kerja ke tasik "offshore". IDUP ANAK IBAN"...Hooooo.....HAAAA

Asal Pendiau Jamal Bangum
tajapan berita lalu penebilang iya enda sebaka enggau sida Ernesto tauka Unggal Albert mayau, tang iya udah dikelala kami ari menua entabai ngembuan pengelandik jari mantang. Asal penatai iya ari Tr Bangum Ng bangkit entabai ke betuaika apai iya empu. lalu serumah enggau aku (penulis). Rambau agi biak menya iya sigi minat duduk semak niang ini iya kelia meda niang ini iya nengkebang chura tenun kelia. Nyangka mih darah getah lalu semengat tali ati iya semampai nunda pengelandik niang ini iya menya. Bisi mega aku nemu cherita iya tu menya udah diberi niang ini iya pengingat ngena chara sumpah. Mayuh mih cherita ke nyelai ba pendiau aya bujang mit tu.
Pengawa ke amat dikerinduka iya menya sebaka mega baka pengawa nembiak bukai ke idup dirumah panjai baka mansai, nyetik, nyala, mukat, nginti, nyelam, ngasu enggau begiga ke kampung nelasit jauh nyentukka ulu kakup melunggang ari nanga naning.
Chukup mentas ati begulai enggau orang sereta pandai mai pendiau diri begulai enggau sida ke tuai. Taja pan sekula enda bangat tinggi baka orang bukai tan penemu iya enda ulih di sema kekitai dalam budi enggau basa iya lebuh ngemeranka adat bebasa ke temuai ke datai ba rumah panjai. Iya tu anak ke tiga ari 5 iku sida iya diri menyadi. menyadi ke tuai benama Endie, Tunga, Jamal, Jembu, Sumping. Nyangka mih diatu pendiau iya begulai enggau orang di tasik besai tang pengingat iya ke menua seruran ba lubuk ati. Pia mega iya tu ngembuan pemanah munyi sada nyawa ba pengawa belagu. Pupuk mih begadai anak iban!!!!!!