BEJALAI KE ULIT
Nama Reti Pengawa Bejalai Ka UlitReti pengawa bejalai ke ulit tu iya nya di kerja orang ke udah kena tinggang penusah pemati ti nyau ka ngereja pengawa ngetas ulit tauka muai ulit. Pengawa tu di kerja sebedau ulit nya di ketas. Kebuah pengawa tu di kerja iya nya kena benyamai ke isi tauka ati orang ti udah kena penusah nya tadi.
Kati Gaya Pengawa Bejalai Ka Ulit Tu Di Kerja
Nitih ke pengawa ti di kerja kelia menya, orang ke bejalai ka ulit tu iya nya nurun Kayau Anak, ngiga pala munsoh kena nyilih tubuh niang ti baru udah parai ninggal ke sida ti ka di buai ulit nya ila. Tang laban kitai kemaia hari tu nadai agi bemunsoh, nadai bebunoh nya alai pengawa bejalai ka ulit tu di kalih ka enggau penurun orang ti bejalai ka ulit nya begiga ka sumbok isang kena nyilih pala munsoh ngagai menua ke kala udah alai orang ngayau tauka orang betempoh serta bebunoh kelia menya.
Baum Bejalai Ka Ulit
Kira seminggu sebedau ulit nya ka di ketas dia orang ke beempu pemati nya ka nesau sida sekaban mai baum ka bejalai ka ulit. Leboh ti baum nya sida iya ka netap ka ngagai menua ni alai sida iya ka bejalai begiga ke sumbok isang leboh ti bejalai ka ulit nya ila. Sida iya mega ka bepilih ka bagi orang ti patut enggau ngereja pengawa bejalai ka ulit nya ila, laban enggai nyadi tak sebarang orang bai enti orang nya bedau tuai umur lalu mesti lelaki. Ba menua kami di Brayang, Roban bedau kala orang indu udah enggau ngereja pengawa bejalai ka ulit. Menua ke selalu di gagai kami semenua iya nya baka Bukit Sadok (alai Rentap betempoh ngelaban perintah Charles Brooke), Bukit Bangunan (selalu alai saldadu betempoh ngelaban komunis), serta enggau Bukit Kelingkang (selalu alai saldadu betempoh enggau komunis sereta kitai Iban kelia belaban bebunoh enggau orang ari menua Indonesia).
Nama Gaga Orang Leboh Ti Bejalai Ka Ulit
Orang ti bejalai ke ulit tu leboh ke nurun iya nya sama sereta angkat ari rumah orang ti kena tinggang pemati ti ka di ketas ulit nya ila. Datai sida iya ba alai orang ti kala ngayau kala mulau tauka kala betempoh kala bebunoh nya tadi, dia sida lalu ngaga pelasar alai sida tindok. Udah nya sida iya lalu enggau ni pengelantang ati diri nguan pelasar nya serta begiga ka sumbok isang semak endor nya. Udah meh sida iya bulih sumbok isang nya tadi dia sida iya lalu manjong ngelulu kediri baka orang kelia ke udah mumpong pala munsoh. Sida ke bejalai ka ulit tu pan lalu beguai guai mulai kediri ke menua laban ti kelia sida iya nangi kediri di titih ka munsoh tauka kaban belayan orang ke udah olih sida. Lalu pengawa ke baka tu kala udah nyadi leboh kami semenua bejalai ka ulit ngagai Bukit Kelingkang ti di titih ka orang ari menua Indonesia menya. Nyadi sumbok isang tu tadi lalu di selit ka sida ba sarong duku diri empu baka orang kelia ka engkah bulu pala munsoh.
Datai sida di menua tauka rumah sida ti ka beketas ulit nya, sida tu tadi enda tau sekali kali lalu terus niki ka rumah. Selalu iya sida tu diau ba sebelah langkau kebun tauka di tanah nganti maia dini hari tauka kira maia manang udah tembu belian sara bungai tang sebedau hari teberingkas tawas, tauka burong nyau di dinga bemunyi.
Iya meh leboh maia sida ti bejalai ka ulit nya patut niki dia orang ke beempu pemati nya lalu nyendia ka setawak siti di engkah ka ba tengah ruai sida, chapak besai sesingkap ti udah diisi enggau ai, labu rendam ti udah chukup rangkai serta udah tau kena nyauk, enggau manok siko, lalu di engkah ba ruai nya. Dia bala bukai lalu bebai niki ka sida ti bejalai ka ulit nya tadi. Sida ti mansang ka niki ka sida ti pulai bejalai ka ulit nya lalu mai senapang, tuak sebotol enggau telu manok sigi ke setiap iko bala orang ti pulai bejalai ka ulit nya.
Orang ke ngambat sida pan udah nganti ba pala tangga , dia sida ti pulai bejalai ka ulit pan lalu niki. Serta sida tu niki, dia orang ke nganti ba pala tangga lalu nimbak ka senapang. Sida ke pulai bejalai ka ulit nya pan lalu nimbal enggau panjong ke nyaris tiga kali baka orang ti gaga kediri pulai ngayau bulih pala munsoh. Sida lalu di genselan ngena telu manok lalu diasoh makai telu manok sigi siko serta di beri ngirup ai tuak. Benong senapang nya di timbak ka, serta orang ti bejalai ka ulit nya niki, dia bala bukai ke nganti ba ruai lalu nerantang ka setawak nimbal sida ke ba pala tangga nya tadi.
Sida ti niki ka orang ke pulai bejalai ka ulit serta enggau sida ti baru pulai bejalai ka ulit nya lalu bejalai betangkan niti ruai sampai ke sida iya nyau datai ba ruai orang ti ka ngetas ulit nya tadi. Datai sida ba ruai nya dia sida lalu manjong baru tiga kali, udah nya baru sida iya dudok ba ruai orang nya. Udah sida dudok dia orang ke beempu rumah lalu miau sida ke pulai bejalai ka ulit nya enggau manok. Udah sida iya tembu di biau dia siko ari sida ti enggau bejalai ka ulit nya, ti udah dipadu ka nyadi tuai lalu di asoh orang ngereja pengawa ngetas ulit lalu tama ke bilik ngambi kebok tauka baku ke di kena orang nanggam ulit. Lalu mai kebok tauka baku nya pansut ke ruai.
Datai di ruai iya lalu muka tungkus ulit nya, lalu pengawa ngetas ulit pan berengkah. Udah semua ulit nya di ketas dia utai ke nyadi ke ulit nya lalu di simpan iya dalam labu nya tadi. Udah nya baru orang ti ngetas ulit tu tadi nganjong labu nya ke alai engkah ulit ke udah diketas nya ngagai sunagi tauka pendai serta lalu ngerarat ke labu nya. Udah tembu pengawa tu iya lalu pulai ke rumah baru. Datai iya di rumah, dia iya lalu ngambi semua sumbok isang ke ulih di bai sida iya pulai bejalai nya lalu di engkah begulai enggau antu pala ke di kemisi ka orang ti ba rumah panjai nya tadi.
Nyadi pengawa belian sara bungai, orang ti pulai bejalai ka ulit, enggau pengawa orang ti ngetas ulit pan udah tembu. Orang maioh pan lalu diberi makai pagi. Udah tembu makai pagi nya baru orang berengkah ngereja pengawa muai tebalu serta di tangkan ka pengawa ngambi tebalu enti pengawa tu bisi di kerja. Tang enti orang ke mati nya sigi udah balu dia pengawa nadai agi kelimpah ari sida kaban belayan ti ngambu pangan diri nyadi kaban belayan ngena adat ba mua orang maioh.
No comments:
Post a Comment