Ensera Salidi seduai Sepatu

ENSERA : SALIDI SEDUAI SAPATU


01. GENTERAN – DIAU KADIRI

DULU KALIA bisi orang dua iko diri menyadi. Nama iya ke tuai Salidi lalu iya ke biak Sapatu. Seduai nya sama lelaki. Apai seduai landik bendar ngasu jelu lalu landik nyumpit burong. Leboh seduai tu agi mit seduai suah bendar enggau apai ngiga jelu ka kampong. Seduai bulih bendar akal enggau jalai ngulih ka jelu ari seduai meda ka gaya apai seduai ngereja pengawa nya.

Leboh umor Salidi sapuloh taun lalu umor Sapatu kira lapan taun dia indai seduai parai. Mina tinggal sida tiga mapai agi begulai ngidup ka diri. Sakumbang indai seduai udah parai, dia seduai enggai tinggal apai seduai kadiri di rumah. Suah bendar sida tiga menyanak bemalam di tanah leboh ke udah bejalai jauh dalam kampong. Tang laban Salidi seduai Sapatu tu anembiak ke mereti, nya alai seduai menyadi bulih bendar penemu enggau reti bejalai dalam kampong ke nadai di uan mensia.

Kira dua taun udah indai seduai parai, dia apai seduai pan kena sakit balat. Apai seduai enda dapat ngiga utai diempa, dia seduai menyadi nurun kadiri kadalam kampong ngiga pemakai. Pemedis apai seduai makin sahari makin balat agi majak. Iya nyau enggai makai, enggai ngirup ai agi. Meda apai seduai tak majak balat sakit seduai nyau mansang tusah ati. Tusah nyangka apai seduai tak enda tau idup.

Kejang apai seduai deka ngapus ka seput diri seninjik bendar iya ulih mansut ka jako dua tiga leka ngajar seduai.

“Ni nuan Salidi enggau adi nuan Sapatu. Aku tu mati ! Seduai begulai manah-manah diau enggau pangan. Anang belaya enggai ka seduai tusah. Aku nadai pesaka ditinggal ka seduai. Semina utai dikebisi aku, sumpit dua puchok ke sama besantok ka temaga. Seduai sama bempu sangkoh nya siti siko. Sangkoh nya tau bendar dikena seduai ngidup kadiri. Iya tau nulong seduai ti maia bisi penusah besai sereta enda diadang seduai. Seduai enda tau enda rajin gawa enggai ka seduai nadai utai diempa. Seduai anang jai enggau orang bukai enggai ka orang enda bebasa ka seduai,” pia ko jako ajar apai seduai kejang iya parai. Udah nya apai seduai lalu ngunjor ka diri sereta lalu ngapus ka nyawa diri.

Tusah bendar meh ati seduai menyadi tu tadi tinggal apai seduai nadai agi enggau begulai. Umor Salidi kira baru manggai dua belas taun, lalu Sapatu kira baru sapuloh taun leboh apai seduai parai. Dia meh seduai menyadi tak ngidup ka diri nadai apai nadai indai enggau begulai di rumah di tanah. Samoa pemedis enggau pemerinsa disepi seduai iya magang. Merinsa meh seduai tu ngidup ka diri, nyadi anak patu balu nadai apai indai enggau begulai.

Nyadi rumah ke endor seduai diau nyembuah kadiri enda jauh ari kampong. Ari ulu rumah seduai maioh bendar bukit ke besai. Jelu, ikan burong enggau macham buah kampong agi maioh bendar dia. Dia alai seduai menyadi lantang ngidup ka diri. Utai ditanam ba redas agi ga maioh baka pisang, tebu, bukau enggau ubi, nya meh ke pengidup seduai menyadi. Semina padi nadai tentu maioh laban sida enda bulih bumai taun nya.

Nyau sapemanjai taun udah nya, utai ke pemakai seduai menyadi pan mansang kurang sekurang. Padi seduai pan nyau abis lalu bakanya ga utai ditanam nyau ka abis magang. Udah nya Salidi lalu bejako enggau adi iya Sapatu.

“Nama chara tua ngidup ka diri deh adi. Nya baka samoa utai kebisi tua nyau abis magang. Tua tentu apin tau bumai,” pia ko iya.

Ninga Salidi bejako munyi nya, dia Sapatu lalu sedan-sedan nyabak, sinu ati ninga jako aka iya. Meda adi iya nyabak dia Salidi bejako baru enggau iya. “Badu nuan agi nyabak adi. Anang nuan tusah ati. Pagila tua nguji ka pengamat jako apai ke madah ka sangkoh ti ditinggal ka iya tau nulong tua maia suntok bakatu. Anang agi nyabak, pagila tua nurun begiga kadalam kampong,” pia ko Salidi.

Ninga jako Salidi munyi nya, dia baru Sapatu lalu badu agi nyabak. Moa iya pan bisi ga lantang mimit. Udah nya seduai menyadi lalu tindok mejam ka munok mata ini, tindok jenak meh seduai menyadi, kuroh munyi ka matak unak rutan wi. Dinga tak rauk-rauk kukok jagau manok tuntong. Dinga tak kalau-kalau nyawa wok empeliau berua di randau kubal kampong. Hari pan tawas ga teberingkas siang. Panas pan meretas ga manchar terang. Seduai menyadi pan lalu mensugau ga angkat dani. Seduai pen lalu berapi. Udah tembu makai seduai pen lalu begari.


02. GENTERAN - NYUMPIT

SALIDI LALU bejako enggau Sapatu : “Nuan adi enda iboh mai sumpit, lak ka aku aja pan nyumpit ka tua. Nuan ngema raga basong alai tua engkah burong ke ulih nyumpit,” pia ko iya.

“Barang ko nuan meh aka,” pia ko saut Sapatu.

Udah nya seduai lalu nurun nyumpit ka kampong. Datai seduai dalam kampong, dia seduai lama bendar berunding ngiga tunga jalai, laban seduai enda tentu ingat ka bekau jalai lama sida iya suba. Nyau kelama seduai udah bejalai baru tetemu ka ratan jalai lama. Seduai lalu nitih jalai nya. Enda lama udah nya baru seduai bisi ninga nyawa burong richah bendar makai buah kara. Seduai lalu limpang ari batang jalai nepat ka munyi nyawa burong ke richah. Seduai lalu tepeda ka puchok kara besai bendar. Buah kara benong mansan, ngenjing ruat puchok laban buah. Burong enda nemu agi pemaioh bepakai ka buah kara, tak nadai didinga menoa laban nyawa sida richah berebut ka buah. Samoa bansa burong bisi dia magang.

Seduai lalu bejalai begadai-gadai nyubok burong ngagai pun kara. Datai dia Salidi lalu nyimpan laja iya ngagai lubang sumpit. Udah nya lalu dikesoh ka iya. Peda laboh ga burong siko. Kesoh ka iya baru peda laboh ga siko. Dia meh tudah Sapatu enda ngetu belanda ngumpol bangkai burong. Nama agi deh pemulih seduai iya burong. Raga nyau penoh, nya baka dibinching seduai, nyau sama penoh jari kadua-dua piak seduai menyadi.

Seduai lalu mulai ka diri ka rumah. Sapatu gaga bendar pulai ngema burong ngena raga. Kira pemanah iya hari seduai menyadi pen datai ga di rumah. Seduai lalu beguai mela burong laban perut udah lapar sahari-hari nya enda merarau. Samoa ke enda abis empa lemai nya disalai seduai iya ngambi ka tan ditaroh.

Tembu nya baru seduai bejako enggau pangan diri : “Nyangka amat meh kini jako apai enggau tua suba. Nama tak mudah bendar tua bulih burong saharitu tadi. Enti tak mujor bakanya berari-ari jemah ila ni enda lantang tua ngidup ka diri,” pia ko seduai.

Malam nya seduai menyadi jenak bendar tindok bekau udah lelak nyumpit sahari nya tadi. Pagi hari siti udah badu seduai makai dia Sapatu nanya Salidi baru. “Kati agi tua nyumpit baru saharitu aka ?” pia ko iya.

“Eh, dini nya tak nyumpit berari-ari. Ngetu dulu meh tua ngambi ngedua hari. Burong ke ullih tua kamari ga agi maioh, udah nya ila nyumpit baru ga,” pia ko Salidi.

Sahari nya seduai diau, lalu nadai mindah jauh. Seduai mina nurun ngambi kayu api. Dua hari udah nya seduai agi diau nat ka burong ke udah ulih. Nya meh seduai ngenjing enda ngetu makai salai burong. Nama nyawa agi deka masok agi diempa seduai.

Nyau ka empat hari udah nya tadi sereta dani tindok pagi siti dia Salidi lalu bejako mai Sapatu nurun nyumpit. “Nyumpit baru tua saharitu lagi adi,” pia ko Salidi.

“Au,” pia ko Sapatu. “Tang aku mai sumpit siti ga lagi. Rindu bendar aku meda nuan nyumpit burong. Aku ga deka belajar nyumpit,” pia ko iya.

“Au meh adi. Nama penyalah nuan mai sumpit. Tua ga sama bisi siti siko,” pia ko Salidi.

Sereta udah badu makai pagi nya, seduai lalu nurun sama nyan sumpit sapuchok siko. Agak pan sama ngema siti siko ga seduai. Laja enggau temilah sama mai kadiri. Udah nya bejalai meh seduai niti jalai ke dulu kamari deka nepat ka pun kara ke besai dia. Tang leboh seduai bejalai nuju pun kara nya seduai nadai ninga nyawa burong richah makai buah kara munyi ke dulu suba.

“Bah, nama tak nadai burong saharitu deh aka ?” pia ko Sapatu.

“Enda nemu meh, nyangka bisi kara bukai endor burong belidar makai,” pia ko Salidi.

Meda nadai burong, seduai pan mupok ga bejalai mending ka tunga nyawa burong. Pengelama seduai udah bejalai siko pan nadai burong bisi dipeda. Meda hari udah bulih bendar ngalih, dia Salidi lalu mai Sapatu pulai, enggai ka suntok malam.

Udah nya seduai lalu mupok mulai ka diri ka rumah. Laboh di rantau jalai pulai karumah siko pan nadai ga burong bisi dipeda seduai ba puchok kayu. Tusah bendar ati seduai iya diri menyadi. Nyau kapuas puas seduai bejako serabana ka diri nadai bulih burong dia seduai bisi meda kayu sakayu bisi bunga. Datai dia Sapatu lalu lengi-lengi engkadah puchok kayu nya. Nyau kelama iya merening angkat deh iya bisi meda burong siko manah bendar gamal. Iko iya mirah, bulu iya lichin lalu bulu dada iya biru kuning, pala iya mirah. Tang deh burong nya mit bendar.

“Manah bendar burong nyin deh aka. Bisi nuan meda iya. Nyin nyah, semak bunga kayu ba dan puchok,” pia ko Sapatu.

“Ni burong ti ko nuan adi ? Nama aku tak nadai meda utai deh,” pia ko Sapatu.

“Iga nuan enda meda. Nyin nyah, bisi utai ke mirah ba antara daun dua iti nyin,” pia ko Sapatu.

“Au, nyin. Bisi meh aku meda. Burong kunchit kemeli nyin kau, mit endar. Nama guna ngiroh diri enggau burong ngemit nya. Empa idup pan enda meh chukop,” pia ko Salidi.

“Enti nuan enggai nyumpit, lak ka aku. Lagi nuan ngambi iya ti laboh lagi,” pia ko Sapatu.

“Au, lagi meh aku ngambi iya, atas ga nuan tekena ka iya,” pia ko Salidi.

Udah nya ambi Sapatu laja, lalu disimpan iya dalam sumpit, lalu dikesoh ka iya. Peda tak lalu nyau burong kunchit kemali laboh. Salidi pan lalu nyau ga belanda ngambi bangkai burong. Nama deh gaga bendar Sapatu meda pemanah bulu burong nya.

“Tu pan pama meh aka, ari tua ke nadai bulih siko,” pia ko Sapatu.

Seduai menyadi lalu mupok mulai ka diri. Iya pan pemanah iya hari seduai menyadi pen datai ga di rumah. “Kati ko tua tu enda mandi dulu ?” pia ko Salidi.

“Enda pan aka, guai ka tua nunu burong tu. Nyau lapar perut enda merarau saharitu. Lagi baru tua mandi,” pia ko Sapatu.

“Enti udah munyi nya, tunu meh burong tu dulu,” pia ko Salidi.

Seduai sama mansang deka nunu burong nya ka dapor. Datai seduai dia, Salidi lalu ngambi kerubong machis. Digusak-gusak iya dia, dinga tak nadai maioh laja machis dalam kerubong. Nya baru iya ngebak ka kerubong machis, angkat deh ka dua iti laja agi tinggal dia.

“Machis tu nadai maioh agi adi. Anang enda bejimat ka nuan menjadi ka iya, enggai ka padam. Enti padam nadai endor tua bulih api,” pia ko Salidi.

“Au meh aka. Ukai nya baka ke baru ningkoh ka machis deh aku,” pia ko Sapatu.

Udah nya iya lalu ningkoh ka machis sabatang. Tingkoh ka iya lalu mau. Enda lama udah nya padam ga dipuput ka ribut. Ambi iya ga laja machis siti, tingkoh ka iya, peda menyadi. Baru ka ditungkun ka iya ngagai kayu lalu padam ga dipuput ka ribut.

“Oi aka !” Abis machis tua. Tang api lalu enda menyadi,” pia ko Sapatu.

“Nya nyah ! Nuan ga ngumbai diri nemu menyadi ka api. Enti bakatu parai tua nadai api. Ukai orang bisi semak tua ditu alai tua minta api,” pia ko Salidi.

Sapatu lalu sikok-sikok nyabak enda tesaut ka Salidi. Iya tusah ati meda api lalu enda menyadi. Kunchit pan lalu enda ga ditunu.

“Nama chara tua bulih api deh aka ?” pia ko Sapatu.

“Enda nemu meh adi. Nadai chara bulih api. Orang nadai ga semak ditu alai minta api,” pia ko Salidi.

Dia Sapatu lalu balat agi nyabak ninga aka iya madah ka nadai jalai bulih api. Iya sinu ati kai diri enda tepenyadi ka api, lalu kunchit iya pan but ga enda ditunu.

“Anang nuan agi nyabak adi. Lagi aku ngiga api ka tua. Atas ga nuan berani tinggal kadiri ditu nganti aku pulai,” pia ko Salidi.

“Au meh aka. Berani aku tinggal kadiri. Amat ga nuan nemu alai bulih api. Sayau endar ati ka kunchit aku nya enda ditunu,” pia ko Sapatu.

“Aku minta api ngagai Ini Manang di langit din. Ukai nya jauh, nyin kilah remang ke burak nyin rumah iya,” pia ko Salidi.


03. GENTERAN – NGIGA API KA LANGIT

ENDA LAMA udah seduai bejako munyi nya, alai Salidi lalu pansut ka tanju. Sapatu pan pansut ga nyereta iya. Datai seduai di tanju, dia Salidi lalu ngajar Sapatu : “Lagi adi, enti aku kira udah datai tengan langit nyin, nuan enda tau enda nyaut aku. Aku ngangau ka nuan ari nyin lagi. Nuan madah ka pemesai aku dipeda nuan ari baroh tu,” pia ko Salidi.

Tekala nya Salidi lalu nyau begantong terebai ari tanju mansang minta api ngagai Ini Manang. Datai iya di tengah langit, dinga bisi nyawa iya bemunyi ngangau ka adi di baroh tu.

“Pal pal Wal ! Besintal tali pangka ! Ni mesai aku dipeda nuan diatu adi ?” pia ko iya.

“Besai ! Agi mesai manok sabong !” pia ko Sapatu nyaut iya.

“Pal pal Wal ! Besintal tali pangka ! Ni mesai aku dipeda nuan diatu adi ?” pia ko iya ga ngangau ari langit.

“Besai ! Agi mesai manok indu !” pia ko Sapatu nyaut iya.

“Pal pal Wal ! Besintal tali pangka ! Ni mesai aku dipeda nuan diatu adi ?” pia ko iya ga ngangau baru ari langit nyin.

“Agi besai ! Agi mesai burong puna !” pia ko Sapatu ga nyaut ari baroh tu.

Udah nya ditanya Salidi baru ga iya. Iya lalu nyaut madah ka Salidi mesai burong empulu. Nyaut baru ga iya madah ka siko nya mesai burong layang. Udah nya nyau mesai burong pipit, nyau emsai burong kunchit. Mit agi ga ari nya, nyau mesai indu kumbang. Mansang mit agi ga nyau mesai indu pitak, mesai lalat, mesai nyamok, mesai keringit, alah sampai ka iya nyau ayas nadai dipeda agi udah mensilup langit burak.

Dia tudah Sapatu tembu lenggi-lenggi engkadah Salidi ke udah nyau niki ka langit. Nyau kelama-lama, anti iya datai nadai ga Salidi pulai. Nya baka hari nyau lemai salemai, nadai ga iya pulai. Ati Sapatu nyau bisi irau sereta takut tinggal kadiri dia. Nyau kepuas iya di tanju, tama ga iya ka dalam langkau, pansut ga iya ka tanju, bedau ga Salidi nadai pulai ari langit.

“Enti bakatu, nama penyadi aku tu tinggal kadiri-diri ditu samalam tu lagi. Aku ga nadai api,” pia ko iya bejako kadiri berandau nengali.

Nyau kapuas-puas iya tusah ati tinggal kadiri, iya lalu ngangau ka aka iya.

“Pulai sapulai nuan Salidi aka aku,
Ditu kunchit but enda ditunu
Asi bari teda aku.”

Bejarit endar iya ngangau ka aka iya munyi nya, tang nadai ga siko nya pulai. Udah nya nyau inggar agi ga iya ngangau ka aka iya.

“Pulai sapulai nuan Salidi aka aku,
Ditu kunchit but enda ditunu
Asi bari teda aku.”

Nyau kelama-lama iya chegit-chegit bediri di tanju pulai ga iya ka dalam langkau. Udah nya pansut ga iya ka tanju. Hari pan nyau lemai endar. Iya pan nyabak ga takut tinggal kadiri. Nadai ga Salidi datai pulai ngiga api ari langit.

Leboh iya ke ngetu ngangau ka Salidi dia iya bisi ninga utai tak serap-serap datai ari babas. Puchok kayu munyi ka dikusai, babas beselelai. Pending ka iya baru dinga iya nyau majak inggar sainggar, semak sasemak.

“Nama utai nya lagi ?” pia ko ati iya. Iya nyau getar-getar takut. “Mua enti nya tak antu lagi, nya baru aku tu parai. Mua meh aka aku Salidi enda nemu aku parai,” pia ko iya bejako kadiri. Iya lalu rauh-rauh nyabak. Pansut baru ga iya ka tanju, lalu ngangau ka Salidi ;

“Pulai sapulai nuan Salidi aka aku,
Ditu kunchit but enda ditunu
Asi bari teda aku !”

Nadai ga Salidi pulai ngiga api. Dia iya lalu niki ngagai puchok reraga tanju deka meda ka utai ke munyi nya. Utai nya agi jauh, peda iya puchok kayu enggau babas endang beselelai kena pansa utai nya. Tanah asai ka berenyang. Sepi iya pala diri asai ka bulih mesai sintong. Bulu pegu lalu bediri. Tuboh getar-getar, tulang lembut enda ulih bejalai tegar.

Nya baru iya nemu nya Antu Birah Raya datai ari kampong baung nadai dinga kasuong nyumboh bujang, kampong sunyi nadai dinga kasuwi buau orang. Peda iya antu nya bejalai sipa-sipa minching tungkat, ngena sirat sebelit. Bok iya ensebam nyau burak baka bunga lalang. Pala iya belancham baka rintong. Leka mata iya bulih mesai buah kepayang. Ngeli iya dua igi chuit-chuit baka ke bulih mesai tungkul pisang. Bulu dada, bulu lengan enggau bulu betis iya ensuyam baka randu dabai.

Nya meh Sapatu nyau ka luput takut meda penyai gamal antu nya. Deka rari enda ga dapat rari, laban lembut tulang. Ensepi diri enda ulih lari, iya lalu ngingkak. Enda ga iya ulih ngingkak balat laban tulang lembut. Peloh iya nyau bepanchor nelusor tuboh. Iya pan nyau pegari kemi, pegari tai takut ka antu.

Antu Birah Raya pan datai ga ba tengah laman. Iya lalu ngangau ka Sapatu : “Jadi rumah nuan uchor ! Oi Uchor ! Jadi rumah nuan !” pia ko antu ngangau ka iya. Lama Sapatu enda nyaut antu. Ninga Sapatu enda nyaut lalu ngangau baru ga antu nya.

“Oi uchor, jadi rumah nuan !” ko antu.

“Jadi aki. Niki meh !” pia ko Sapatu.

“Dini alai aku nyandih ka tungkat aku tu deh uchor ?” pia ko antu nya nanya iya.

“Sandih ka ba pun kayu di kaki tangga dia meh aki,” pia ko Sapatu.

Udah nya lalu disandih ka Antu Birah Raya nya tungkat iya ba pun sibau, peda tumbang ga sibau. Disandih ka iya ba rian, tumbang ga rian. Disandih ka iya ba engkala, peda rebah ga engkala. Disandih ka iya ba nangka, peda rebah ga pun nangka. Samoa kayu ke alai iya nyandih ka tungkat nya rebah magang, tak nadai tan laban nya.

“Oi Aki ! Uji sandih ka ba batang kemelang sumpah, ba pun sabang begayah enggi niang apai nya. Peda batang iya mansau chinang-chinang baka ke dibalut lampang tekang darah. Peda nuan daun nyau nyerabumbun ngelamun pun nipah tanah,” pia ko Sapatu.

Ninga Sapatu madah ka iya nya tan alai nyandih ka tungkat, nya baru Antu Birah Raya lalu minching tungkat iya kia. Datai dia lalu disandih ka iya. Peda tak enda beguyat. Anang ka rebah, lentor pan enda ga batang sabang.

“Kati baka deh aki ? Tan nya alai tungkat nuan ?” pia ko Sapatu nanya antu nya.

“Tan uchor, tan !” pia ko saut antu.

Udah nya Aki Antu Birah Raya pan lalu niki ka rumah. Peda nyau sendat moa pintu pala tangga laban pemesai tuboh iya. Datai iya ba tanju, dia iya lalu dudok jangah-jangah, kelah-kelah udah lelak bejalai.

“Sapa orang enggau nuan ditu deh uchor ?” ko iya nanya Sapatu.

“Nadai orang enggau aku tu aki. Kadiri, laban aka aku Salidi apin pulai ngiga api ka langit kin ka ngagai Ini Manang,” ko Sapatu.

“Dini alai apai seduai indai nuan deh uchor ?” ko iya.

“Apai seduai indai lama udah parai,” pia ko Sapatu.

Udah nya maioh utai ditanya ka antu ngagai Sapatu. Nyau kapuas seduai iya berandau dia antu lalu ngasoh iya ngiga kutu. Sapatu madah ka diri enggai, laban enda kala ngiga kutu. Keras ga antu majak ka iya ngasoh ngiga kutu, iya madah ka diri enggai, laban enda nemu ngiga kutu. Nyau Kepuas antu nya majak ka iya, nyau deka ga ngiga kutu, laban takut ka antu nya munoh.

Udah nya disilak ka Sapatu bok antu. Peda iya pansut meh sida kala, kemebai, sempada, lembayar, ular, indu semada, indu kesa, indu semut, indu geranjang enggau macham indu penyengat bisi dia magang. Meda utai bakanya, dia Sapatu madah ka diri enggai agi ngiga kutu iya. Iya enda berani ka ular enggau lembayar enggau indu penyengat ngenjing selabubu pansut ari pala antu nya.

Nya meh uchor. Enti nuan enggai ngiga kutu aku, awak ka aku ga ngiga kutu nuan,” pia ko antu nganu iya.

“Aku nadai kutu nyan aki,” pia ko Sapatu.

Dia antu lalu ngumbok Sapatu madah ka diri deka ngiga kutu ba pala iya. Nyau keleju-leju, puas iya ngumbok, dia Sapatu nyau ulih umbok antu. Iya lalu nyurong ka pala diri ngagai antu ngasoh iya ngiga kutu. Nama agi deh, gaga endar meh antu meda iya deka ngasoh iya ngiga kutu. Silak ka iya bok Sapatu, nadai ga iya nemu kutu. Puas nadai nemu kutu dia, antu nya lalu enda liat agi ati. Tak lalu digelam iya pala Sapatu ba senentang bubun aji. Nama deh tudah Sapatu lalu kejar-kejar mati. Udah Sapatu mati, tuboh iya lalu diempa antu datai ka abis. Samoa darah ke machir-achir sebelah gelegar pan abis ga didilat iya. Udah nya baru iya mulai ka diri ngagai kampong ke endor iya diau.

Apin lama antu nya udah nyau pulai ngejang ka endor nya, alai Salidi pan datai pulai minta api ari langit. Agi jauh, iya ending udah rauh-rauh ngangau ka adi iya. Iya nemu siko nya takut tinggal kadiri dia. Kangau ka iya dia, nadai ga siko nya nyaut. Kangau ka iya nadai nyaut. Ninga adi iya nadai nyaut Salidi lalu beguai-guai niki ka rumah.

“Oi adi ! Oi adi ! Ni nuan nadai nyaut !” pia ko iya.

Nadai ga adi iya nyaut. Nyau puas iya rauh-rauh, dia iya lalu nurun ka tanah ngiga adi iya. Tilik iya sebelah baroh tanju nadai ga, perening iya sebelah ngelingi rumah, nadai ga dipeda. Abas iya ngagai pendai, nadai ga adi iya dia. Selam iya ba ai nadai ga dia. Peresa iya abi kaki, nadai ga meda bekau ba tanah luchak.

“Kini ka tunga Sapatu tu ?” pia ko iya berunding dalam ati diri. Udah nya iya lalu nyabak tusah ati enda nemu tunga Sapatu. Lemai nya iya enda berapi enda makai seruran nyabak berari-ari enda nemu tunga menyadi iya Sapatu.

Dikangau iya nadai ga Sapatu nyaut, dianti iya pulai nadai ga datai. Dia iya lalu ngali ka diri semak moa pintu. Sangkoh sumpit enggi iya empu enggi adi iya sama di-imbai ka iya ba tuboh semak iya ke gali. Dia iya lalu nyampi :

“Oi, ni kita Petara Aki Petara Ini,
Petara Apai Petara Indai.

Uji dinga ka kangau, dinga ka tempalau,
Dinga ka sada, dinga ka selada aku tu,
Nyadi adi aku Sapatu udah nyau
Nadai temu tunga pendiau.

Nya alai uji padah, uji tunggah
Uji peda, uji selada tunga iya,” pia ko leka sampi Salidi.

Pejam ka iya mata enggai ga tindok. Nyau kaleju-leju tak baru besabong kulit mata iya, dia iya asai ke betemu enggau apai seduai indai iya. “Kini ka tunga Sapatu deh apai ?” pia ko iya.

“Dini nya bisi dianti nuan pulai deh anak, iya ga udah parai diempa Antu Birah Raya tadi,” pia ko apai iya.

Enda lama udah nya hari pan tawas ga teringkap siang. Dinga iya tak rangau-rangau anak empeliau adau berua ba randau kubal arang. Dinga iya sandah enda udah duah-duah ditanah matah lembang. Kukok manok pan udah rauk-rauk ngerak Salidi tindok madah ka hari siang.

Tak angkat ngesai meh Salidi
Nyapai semilu batu chanai
Alai iya ngansah perapang pedang panjai,
Awak ka tajam geremai makai tulang.

Tak angkat mengkanjong meh Salidi
Lalu nyapai semilu batu anggong
Kena iya ngansah perapang pedang jengkong,
Awak ka tajam di ujong
Nyimpong gupong tangkai lempuang.

Udah nya iya pansut ka tanju
Tinggang terutu ujan jarang.

Iya meda gelegar tanju tak basah bekau darah adi iya. Lalu ditilik iya ari baroh gelegar meda bisi tekang darah adi iya kira mesai bunga machis, lekat ba pengerat. Ambi iya tekang darah lalu engkah iya ba pinggai besai. Bap iya enggau pua kumbu lalu dipuput iya dia. Puput-puput iya dia, peda nyau mansang besai sabesai tekang darah nya tadi. Puput iya baru besai agi, puput iya dia, peda nyau mesai buah pinang puda, mesai buah pinang tuai. Puput iya baru peda nyau mesai lengan, mesai pah, mesai pala. Udah nya baru iya ninga orang ngangau nyebut nama iya.

“Kami tu Raja Petara. Kami tu datai nulong nuan ngidup ka menyadi nuan Salidi. Anang nuan tusah. Idup iya lagi,” pia ko nyawa orang nya ngangau ka iya.

Puput iya baru ga dia, peda adi iya nyau bisi tuboh baka mensia. Nyau kelama, baru iiya idup baru nyadi mensia. Angkat meh Sapatu nya tadi lalu diberap Salidi. “Akai-rai aka, jenak endar aku tindok,” pia ko iya.

“Mapap nuan. Dini nuan bisi tindok. Enda nuan ingat ka diri parai diempa Antu Birah Raya,” pia ko Salidi.

Udah nya baru Sapatu ingat ka antu nya amat bisi datai dia lemai siti tinggal Salidi ngambi batu api ka langit.

“Amat meh nya. Amat bisi antu datai ditu,” pia ko Sapatu.

Seduai lalu begauk engau pangan diri. Ati Salidi bisi ga lantang mimit tang iya agi ringat ka Antu Birah Raya. Tumu pagi siti, apin seduai ngereja utai bukai dia Salidi lalu ngaga perengka piring. Pandok ka iya telu manok, tutok ka iya tepong ka penganan tempa. Lulun iya asi pulut, bisi nya chelum lalu bisi ga guning. Girau ka iya ga padi pulut digaga ka letup. Kemas iya nyendia ka perengka piring, iya lalu engkah utai nya ba tabak. Dia iya miau enggau manok ngangau ka Raja Petara. Iya madah ka diri meri puji laban Raja Petara udah nulong iya ngidup ka adi iya Sapatu.

Udah kemas seduai miring, nya baru Salidi ngasoh Sapatu nusoi pun jerita iya ke dibunoh Antu Birah Raya. Sapatu lalu nusoi jerita antu nya ke munoh iya leboh seduai ngiga kutu, tinggal Salidi ngiga api ka langit.

“Au meh, sepi asai antu nya lagi,” pia ko Salidi.


04. GENTERAN – MUNOH ANTU BIRAH RAYA

UDAH NYA tadi Salidi lalu ngambi batu. Iya lalu dudok ngansah nyabur niang apai iya suba. Nama agi penajam nyabur ngenjing enda tau inggap lalat ba mata.

Badu merarau tengah hari nya Salidi lalu ngajar Sapatu : “Lagi adi kira maia hari leboh nuan ke dibunoh antu nya kamari, nuan ngangau ka aku. Leka jako kangau nuan munyi ke lemai kamari ga,” pia ko iya. “Lagi aku belalai baroh tangga. Tang nuan anang takut. Samoa jako antu nya saut magang ulih nuan. Ukai enda leboh iya niki tangga nya lagi, nya baru aku mantap iya,” pia ko Salidi ngajar adi iya.

Hari pan pemanah iya, dia meh Salidi nyikap diri ngena terabai siti, nyabur enggau sangkoh kebat niang apai iya sapuchok sama dibai iya. Iya lalu nurun ka tanah. Dia iya belalai ba baroh tangga. Sapatu tu tadi lalu berengkah ga ngangau ka Salidi munyi jako iya lemai kamari.

“Pulai sapulai nuan Salidi aka aku,
Ditu kunchit but enda ditunu
Asi bari teda aku,” pia ko iya.

Apin bangat lama udah nya dinga munyi utai datai ari kampong. Munyi gu hari jai ga babas kena teruju iya.

“Bah nya iya aka. Ngadang nuan !” pia ko Sapatu.

Dinga munyi utai mansang semak sasemak. Redup tanah pan nyau didinga ga kena indik kaki iya. Babas kena teruju iya beselalai ka kiba ka kanan. Udah nya Antu Birah Raya pan datai ba tengah laman. Iya lalu nanya : “Dini alai aku nyandih ka tungkat aku tu uchor ?” pia ko iya.

“Sandih ka ba endor ke kamari meh aki,” pia ko Sapatu.

“Au uchor. Nama nya tak nuan ke kamari gad eh uchor,” pia ko antu.

“Ukai aki, ukai aku ke kamari. Aku tu menyadi iya,” ko Sapatu. Nyau ngelala Sapatu nya baru ga deh keparat Antu Birah Raya nya.

Nama agi pengaga ati antu, laban iya ngadang diri deka makai anak mensia nya. Apin iya niki tangga, dulu iya ketawa rakah rakah gaga ati.

Udah nya lalu niki Antu Birah Raya nengah tangga. “Niki aki, niki, lalu meh,” pia ko Sapatu.

“Au meh uchor. Keba aku datai endang deka lalu,” pia ko antu.

Leboh antu nya baru nunjan tangkal tangga, dia Salidi lalu kerakikik ngeli ngering diri dulu deka mantap iya. Iya pan antu udah datai ba tengan tangga, Salidi lalu angkat merejok mai terabai sereta lalu mantap iya ba rakat kaki dua piak. Antu nya tadi enda iboh ka Salidi ke mantap iya. Agi iya majak ka diri niki tangga. Meda bakanya, Salidi lalu ngelih ari sapiak tangga, nya baru iya ngerurok perut antu enggau sangkoh. Udah nya baru antu nya rebah melempai atas lalau. Peda patah ga lalau, nya baru laboh ka tanah. Datai di tanah lalu dipantap Salidi ba rekong, pantap iya ba moa. Peda tingkil tungkol idong. Tang apin ga antu nya mati. Jari iya seruran kitau-kitau deka nyapai kaki Salidi, tang enda ga ulih, laban siko nya sikar merejok kin kitu.

Nyau kepuas Salidi ke mantap sereta numbok antu nya ngena sangkoh iya pan lalu parai. Peloh Salidi pan bepanchor ga nelusor tuboh. Gaga endar ati seduai meda antu nya udah mati. Nya meh bangkai iya ngenjing bejor-bejor, garing-garing baka batang tapang ba baroh tangga.

“Bah, kati ko tua muai bangkai antu nya lagi deh aka ?” pia ko Sapatu.

“Irit tua lagi. Buai ka ai. Awak ka iya diempa baya betemu nyawa, empa jagu betemu iko,” pia ko Salidi.

Udah nya ambi seduai iya telu pelir antu lalu belah ngena duku. Datai di rumah lalu dibudu seduai ngena garam. Penyadi ka seduai api lalu disalai ba para.

Tembu nya baru seduai ngirit bangkai antu ngagai tebing sungai. Datai ba pala tebing lalu di baring ka seduai ka ai. Nama agi, nyau mensimbor ai laban bangkai antu nya. Iya lalu rarat kili kin, baka pengerarat bangkai udok, bangkai manok.

Tembu seduai ngemata ka pengerarat bangkai antu raya seduai lalu pulai ka rumah. Tembu makai lemai nya seduai lalu tindok, nat ke diri udah lelak dikuyak pati punggong. Lelak di kechiak pun berang, lelak di tuboh buku tulang. Tak enda berasai, dinga udah rangau-rangau anak jelu empeliau adau bejengkau ka buah kubal arang. Dinga udah rauk-rauk kukok manok jagok, mantok abok dalam dulang. Dinga burong udah kekaung nebak bungkong ragai menuang. Peda hari nyau tawas teringkas siang. Udah nya seduai menyadi sama angkat dani.

Nyadi bini Antu Birah Raya ke tinggal laki iya di rumah nyau irau meda laki iya nadai pulai samalam nya. Di anti iya pulai ari lemai sampai ka pagi, lalu ga nadai datai. Nya alai dia deh ati iya nyau deka nurun ngiga penunga laki iya. Udah kemas bebela pagi nya iya lalu begari. Pasok ka iya baju burong, tanggoi seraung, nyandik selok lintong, pasok ka iya kain mengkudu naka pala patong. Sereta iya badu begari, iya pan lalu nurun bejalai ngiga endor laki iya. Nama agi anak gamal tudah tuai, iya ga bungkok, minching tungkat siti. Nya baka bulu pala iya nyau repok-repok buban baka bunga lalang.

Bejalai meh tudah tuai sapagi-pagi nya, sungai di ulu, sungai di ili, bukit diturun bukit ditiki, nepat ka menasan jalai jani, lembang dipelakang pulai ka ai. Nyau kelama, nya baru iya rembus ba rapi kampong semak rumah sida Salidi. Nya baru iya bisi meda batang jalai raya. Iya lalu bejalai nyidi tunga ujong jalai nya. Iya pan datai semak rumah seduai menyadi dia iya lalu ngetu bediri tenjik-tenjik, enda inggar mending ka seduai nya ke berandau diri sama diri. Iya lalu ngansak semak agi, mending ka randau seduai nya. Tang seninjik seduai nadai ngenang diri ke udah munoh Antu Birah Raya kamari.

Tekenyit seduai ninga manok bebar di ujong tanju. Dinga kerukik ga bala anak itik, enda ga seduai iboh. Udah nya manok tak majak begau, lalu empekak. Sapatu lalu angkat ari nya ke gali lalu nilik ari seling dinding, nadai ga iya meda utai ke dirara manok.

“Eh, adi. Nama gila beduli ka manok ke bemunyi. Nyangka bisi meda menaul,” pia ko Salidi.

“Enda aka, tak lain asai ati aku. Nyangka tak bisi orang dipeda manok ke bemunyi nya,” pia ko Sapatu nyaut.

Apin lama seduai udah bejako berara ka manok, dia seduai ninga orang bisi ngangau ari tanah. Ninga orang bisi ngangau dia Salidi lalu pansut ari rumah. Sereta iya pansut lalu tepeda ka bini Antu Birah Raya. Dia Salidi lalu ngangau ka iya ngasoh niki.

“Oi Ini ! Lalu, niki meh ini !” pia ko iya.

“Au meh uchu. Enda diasoh lalu endang deka niki meh aku,” pia ko bini Antu Birah Raya.

Udah nya iya lalu niki ka rumah. Seduai iya bisi ati geli meda penyai gamal iya. Nya ga pemungkok belakang, iya ga nyandik selok lintong. Pala iya buban, moa ngerecham. Sida tiga lalu dudok berandau. Enda berasai alai hari tengah hari.

“Berapi nuan adi ka kitai tiga,” pia ko Salidi nganu Sapatu. “Init u tentu lapar, lalu nyangkong iya.”

Sapatu lalu berapi surong kaki, surong jari. Kaki baka ke sengat semada, jari baka ke muar kesa. Benong Sapatu berapi dia Salidi lalu nanya ka pejalai bini Antu Birah Raya.

“Nyadi ke tu ini, ukai ga nuan salah datai, salah nemuai, endang baka kitai. Tang aku enggai laun nemu penemuai nuan. Kati ko nuan tu nemuai lantang, bisi utai dipeguai ka nyuntok ati ?” pia ko Salidi.

“Amat meh nya uchu. Aroh iya ga nuan nanya. Ukai ga aku salah nemuai salah datai ngapa ngagai kita. Tang ke tu bisi penemuai nyuntok ati meh aku tu unchu. Nyadi kamari aki nuan, Antu Birah Raya nyau turun ngiga utai ka lauk. Anti aku pulai lalu nadai pulai. Nya alai aku tak irau ati, enda nemu penunga iya. Kati ko deh uchu bisi seduai meda iya mansa menoa kita ditu ?” pia ko bini antu nya.

“Aku enggai laun nyaut nuan ini. Nya pengelama kami dua udah diau kadiri ditu, baru nuan tu lah temuai bisi niki rumah kami tu. Nyadi pasal aki ke nyau, kami dua enggai bula ka nuan , kami dua tu enda nemu tunga iya. Niki ka rumah kitu nadai iya ini. Mansa kaki tangga nya enda meh kami dua nemu. Ga semampai utai bisi bejalai mansa dia,” pia ko Salidi.

“Enda temu tunga meh aki nuan, enti udah munyi nya,” pia ko bini antu.

“Yau ga nuan ngabas kebukai ini. Ukai nya baka ke sabuah tu rumah kitai dulu.” Pia ko Salidi.

“Nya meh uchu, irau endar ati aku ka aki nuan tu, tak nadai temu tunga.” Pia ko bini antu.

“Lagi pan nuan mupok ini, nganti kitai udah merarau,” pia ko Salidi.

“Nama utai ka lauk kitai tu deh aka ?” pia ko Sapatu.

“Nya papal budu rusa kitai ba para. Nya tunu ka lauk ini, isa kitai nadai lauk bukai,” pia ko Salidi.

Udah mansau magang utai dipandok Sapatu, sida tiga lalu belaboh makai. Tudah bini antu Birah Raya diberi seduai lauk papal telu pelir laki iya. Seduai iya empu belauk utai bukai. Gaga endar ati bini antu nya ngumbai diri amat belauk pachak rusa. Iya enda ngelala, enda belaba ka nya telu pelir laki diri.

“Nemu endar seduai ngaga pachak rusa neh uchu. Nyamai pachak tu sepi aku,” pia ko iya.

“Baik ti nyamai ini. Makai kenyang meh diri. Kami dua nyau puas makai pachak. Ukai nya ngetu hari kami dua bulih jelu,” pia ko Sapatu.

Kenyang endar iya makai tengah hari nya belauk pachak telu pelir laki iya empu. Udah badu makai, dia Salidi lalu madah ka diri deka nurun bira enda lama. Iya lalu nyengkau duku.

“Kapa nuan duku deh uchu ? pia ko bini antu.

“Kena aku nibak utai ka sengkilu,” pia ko Salidi.

Iya lalu nyau nurun. Datai iya di ai, lalu nangkal batang ke melintang sungai Batang nya jamban sida nyemerai sungai. Tembu iya nangkal batang, iya lalu mandi. Datai iya di rumah lalu dudok baru berandau enggau ini antu nya tadi.

“Tak lain asai mata aku tu ini. Tak ka ngantok. Manah kitai gali nat ka diri dulu. Lagi baru nuan mupok. Nadai utai diseguai ka nuan. Tak bemalam enggau kami dua ditu pan tau meh nuan ini,” pia ko Salidi.

“Au meh uchu. Barang iya meh. Mata aku pan berasai deka ngantok ga,” pia ko iya.

Sida tiga lalu sama ngali ka diri. Dia sida ninga manok di baroh rumah tak empekak munyi tu ;

“Pekak peki, Ini belauk telu pelir aki.
ekak peki, Ini belauk telu pelir aki.”

Ninga manok enggai badu empekak dia bini antu lalu angkat. “Nama main manok tak enggai badu empekak munyi nye deh uchu ?” pia ko iya.

“Eh, endang munyi manok kami dua ditu nya ini. Nama sida baru meda temuai nya niki rumah kami endang empekak munyi nya,” pia ko Salidi.

Dinga empekak baru ga manok nya tadi. Tak lain asai ga ati iya. Tak bisi sangka ka diri belauk telu pelir laki iya empu. Dinga munyi baru ga manok nya empekak.

“Pekak peki, Ini belauk telu pelir aki.
Pekak peki, Ini belauk telu pelir aki.”

Ninga tak tentu munyi pekak manok nya tadi, dia deh iya lalu ringat : “Oh uchu ! Salah pengawa seduai ti bakatu. Tentu seduai udah munoh laki aku. Nya kabuah iya nadai dianti aku pulai,” pia ko bini Antu Raya.

“Saru nuan ini. Nadai kami dua munoh aki,” ko seduai.

“Anang bula ka aku seduai uchu. Seduai aku pakai lagi,” pia ko iya.

“Enda kami dua bula ka nuan ini. Anang ini anang, anang ngunyah kami dua mata-mata nuan. Pala nuan disalai kami dua lagi,” pia ko seduai. Berani ga seduai deka nyalai pala bini Antu Raya.

Udah nya seduai lalu berengkah ngelaban iya. Iya keras nyangka seduai munoh laki iya. Seduai serengking madah ka diri nadai munoh. Nyau kapuas, sia deh bini antu lalu bekenjing deka nerekam seduai. Salidi lalu merejok nyengkau duku. Iya baru deka ngedar ka duku kena mantap antu nya, duku iya lalu anchor nyadi ai. Angkat ga iya ngambi sangkoh. Datai iya dia lalu dientum ka iya ba belakang antu nya. Apin datai mata sangkoh, peda udah bebali anchor nyadi ai. Udah nya samoa utai ke dikena iya munoh antu nya anchor magang.

Meda bakanya Salidi lalu mai adi iya lari ka ai. “Lari tua adi,” ko iya. “Anang tua agi ngelaban antu nya di rumah tu. Nya baka perengka tua udah abis magang.”

Seduai lalu ngebu ka diri belanda lari ari rumah lalu niti jalai pendai. Dia meh bini antu Raya luntap-luntap belanda nunda udi seduai menyadi niti jalai pendai. Tengar agi seduai iya belanda, tegar agi agi ga bini antu nya nitih ka seduai.

Datai seduai di ai lalu nyau nyemerai sungai nya ka seberai. Peda bini antu nya tadi pan datai ga di puting batang. Enda chechamang iya lalu niti batang jalai ka seberai. Iya pen baru nengah senentang tengah batang, dinga tak semetak munyi utai. Peda deh tudah bini antu lalu temebor laboh ngagai ai sungai ked eras. Iya lalu chapu-chapu ba ai. Iya rauh-rauh minta ambi seduai. Anang ka seduai deka ngambi iya, seduai lalu ngambi buloh ke tajam-tajam dikena nuroh iya ari tebing. Nama deh tuboh bini antu nyau telih magang. Nya baka darah nyau malut tuboh iya. Iya majak lembut salembut. Nyau puas iya ke bedanjar sebelah ai, lalu mati lemas.

Udah bini antu nya mati dia seduai iya lama tenjik tenjik ngila ka bangkai iya rarat ditaban ka ai kili kin. Apin seduai pulai ka rumah dia seduai dulu mandi. Mandi nyelam meh seduai ngampoh ka tandan bau nuking. Mandi bekechimbong masah ka punggong pati pinggang. Mandi betipok ngunsut rusok ruang belakang. Mandi nyemerai ngelab ka bungai pangka pasang.


05. GENTERAN – ULAR NABAU

MALAM NYA seduai menyadi jenak bendar tindok. Kuroh seduai munyi ka matak unak sega enseluang. Tindok lina meh seduai mimpi meda perenama bulan terang. Tindok singit meh seduai mimpi nesa jerit kaban bintang.

Nyau enda berasai dinga tak rauk-rauk kukok manok labang. Dinga tak rangau-rangau wok anak adau empeliau arang. Dinga tak bemunyi sida babi nyungkor tali dulang tapang. Peda tak tawas meh hari teberingkas siang. Mata panas pan nyau meretas mandang babas madang senggang. Ribut pan nyau kesut-kesut muput ka julut tanjong melintang. Seduai lalu dani.

Leboh seduai makai pagi nya, Salidi lalu nusoi jerita diri ke minta batu api ngagai Ini Manang di langit din suba. “Lantang bender meh tua adi, laban batu api ke diberi Ini Manang nya tau bendar nulong tua ngidup ka diri,” pia ko iya.

“Au, nelap endar meh Ini Manang enggau tua neh aka,” pia ko Sapatu.

Udah nya Salidi lalu ngajar Sapatu jalai ngena batu api ajih ke diberi Ini Manang. “Nya meh adi. Aku enggai enda ngajar nuan jalai ngena batu api ajih tu, laban aku selalu mindah ari rumah. Enti nuan deka ngena batu api nya, nuan tau nyampi munyi tu ;

“Ni-ma, na-ni pansut api ! Ni-ma, na-ni mau api ! Kor-kor-kor ! Tulong Salidi.”

“Udah nuan nyampi munyi nya lalu engkah ka batu api ba kayu ke deka ditunu nuan. Enda lama udah nya nuan meda api lalu mau lekat makai kayu nya,” pia ko Salidi.

“Udah nya Salidi lalu naroh batu api dalam telak atas para. Seduai menyadi lalu nyau nurun mandi.

“Aku mai sumpit aka, nyangka bisi burong inggap ba puchok kayu semak jalai pendai,” pia ko Sapatu. “Enda iboh pan Sapatu. Enda iboh mai sumpit, enggai ka tua lama diau da ai lagi,” pia ko Salidi.

Tang Sapatu keras deka mai sumpit. Meda iya bakanya, nadai ga jako Salidi. Nyau meh seduai nurun mandi. Dia Sapatu kuir-kuir nyan sumpit mansang mandi.

Nyadi leboh seduai iya bejako ka jalai ngena batu api nya tadi, angkat deh Ular Nabau endang udah bisi ngereran di baroh rumah mending ka jako seduai. Ular Nabau tu endang bisi ati deka ngenchuri batu api nya. Udah nyau seduai menyadi nurun mandi, Nabau nya lalu nyau niki ka rumah ngiga batu api. Giga iya kia nadai ga temu. Giga iya kia nadai ga temu. Nyau kapuas-puas Ular Nabau ngiga, nya baru iya tepeda ka utai tak liau-liau baka bara api dalam rumbang telak atas para. Iya lalu nelan batu api kadalam perut. Tembu iya nelan batu api nya, iya lalu nyau beguai-guai mulai ka diri kadalam babas.

Nyau kelama udah nya Salidi seduai Sapatu pan pulai ga mandi. Datai seduai di rumah dia Sapatu lalu deka berapi tengah hari. Tekenyit iya meda batu api nadai agi datas para.

“O, aka, nadai agi batu api ajih tua. Peda nuan batu api nadai agi dalam rumbang telak, nadai agi ditu,” pia ko Sapatu.

“Eh, ditu meh iya tadi. Nadai nya tau mindah kebukai,” pia ko Salidi. “Nadai aka, nadai ditu,” pia ko Sapatu.

Angkat Salidi lalu meda ka batu api. Peda iya amat nadai agi dia. “Amat nyau meh batu api tua tu deh adi. Sapa orang ngenchuri nya tadi. Jampat endar ga orang ngambi nya kau. Nama tua mandi enda bangat lama iga. Iga orang bangat nemu alai tua engkah nya,” pia ko Salidi.

Udah nya seduai menyadi sama bekananas ngiga tunga batu api. Abis samoa utai di para kikeruga, abis utai ba telok dinding diserungkai seduai. Abis giling tikai dikerembai, tang nadai ga seduai nemu endor batu api ajih nya.

Nyadi Ular Nabau, udah iya bulih batu api, iya pen nemu ga sampi kena ngasoh batu nya menyadi. Tiap pagi tiap hari iya bejalai mai batu nya ngagai maioh endor. Iya nunu sarang nunu tansang sida burong sida jelu dalam kampong din. Tusah magang meh samoa bala jelu bala burong laban iya. Orang nadai berani ngelaban iya laban iya besai sereta kering, iya ga bisi batu api ajih. Sida mina nat ka ati diri pedis tang nadai berani ngelaban iya.

Nama agi deh Ular Nabau tu tadi, datai hari nyau ga iya bejalai lalu nunu samoa sarang samoa tansang jelu enggau burong. Telu enggau anak orang ti bisi temu iya abis diempa iya magang.

Nyadi Salidi seduai Sapatu ke ngiga batu api tu tadi lalu nadai temu. Dini nya bisi temu, ga iya nyau ditaban ka Ular Nabau. Dia deh Salidi lalu mutap munyi orang ke niap singkap pinggai lelayang, lalu muchau munyi Melanau nimbau tukau indu penchalang. Nyampi meh iya munyi Menani Kaban Manang. Nyau kepuas seduai menyadi lelak ngiga lalu nadai ga temu, dia seduai lalu dudok.

“Deka endar meh orang ngayah ka tua tu adi, meda tua ke nadaiapai indai enggau begulai,” pia ko iya. “Au aka, enti orang bisi deka madah ka tua endor batu api tua nya enda pama,” pia ko Sapatu.

Leboh seduai menyadi ngeringak berandau ngenang pasal pengenyau batu api, dia seduai meda tikus burak siko ngerayap ba dinding.

“Peda nuan tikus nyin ngerayap ba dinding,” pia ko Sapatu nganu Salidi.

Meda tikus nya tak jinak, dia Salidi lalu ngangau ka iya. Tikus nya baka ke nemu reti jako seduai. Ninga Salidi ngangau dia tikus lalu beguai nurun ngagai seduai. Datai iya dia lalu nusoi rita diri. Iya nusoi penusah samoa jelu dalam kampong din ke dikeduan Ular Nabau.

“O, tentu nya batu api ajih kami dua adi ke dikena iya nunu sarang, nunu tansang jelu di kampong din,” pia ko Salidi.

“Dini seduai bulih batu api ?” pia ko tikus. “Ulih aku minta ari Ini Manang di langit din,” pia ko Salidi.

“Enti munyi nya tentu Nabau nya ngenchuri batu api seduai,” pia ko tikus. “Iya meh nya, enti pia unggal tikus,” pia ko Salidi. “Dini alai iya diau di kampong din ?” pia ko Sapatu nanya tikus.

“Din meh iya diau enda jauh ari lubang ke alai aku diau,” pia ko tikus. “Enti munyi nya manah nuan ngulu ka kami dua adi ngiga Nabau nya,” pia ko Salidi. “Barang iya meh,” pia ko tikus.

Jengkau Salidi seduai Sapatu nyabur enggau sangkoh siti siko, seduai lalu nyau nurun nitih ka tikus ngiga alai Ular Nabau nya diau. Bejalai meh sida tiga sapagi-pagi nya, sungai di ulu, sungai di ili, bukit diturun, bukit ditiki. Nyau kalama baru datai ba tisi kampong alai lubang Nabau nya.

Apin sida tiga mansang semak ngagai lubang Nabau, dia tikus dulu ngajar seduai menyadi jalai ngelaban ular nya. “Enda jauh agi ari tu, ba baroh pun kayu ke besai nyin, dia alai lubang Ular Nabau nya. Datai kitai din lagi, seduai lalu ngipa iya ba moa lubang. Aku bemain ba semak moa lubang ngambi ka iya pansut,” pia ko tikus.

Leboh sida tiga datai semak moa lubang, dia sida endang udah meda bekau nabau tama kadalam lubang. Pemesai papak kelantar dada iya baka ke bulih mesai papak kelantar bangkong timbau. Kesoh seput iya dalam lubang din nyau munyi rauh peputan. Moa lubang nyau terang kena pandang batu api ajih ke ditaroh iya ba baroh rekong.

Udah nya sida tiga lalu belator. Salidi bejalai ba moa lubang ari kanan, lalu Sapatu ari kiba. Tikus pan lalu berengkah ga bemain ba moa lubang. Dia meh iya belanda kin kitu. Enda lama udah nya kira sasempa mansau pinang, kira ngelama kilat sakejap ngelambai petang, dinga nyawa Ular Nabau enda nemu agi penginggar dalam lubang. Tanah berenyang, kampong beguyang laban nyawa iya. Iya lalu ngusai ka sengkilong diri.

Peda pansut pala iya nyengok ari moa lubang. Batu api ngenjing terang ba baroh rekong iya. Dia meh Salidi seduai Sapatu enda engkebut ngila ka Nabau pansut ari lubang. Peda taring iya ngenjing begelong bekumbang pansut ari nyawa. Pala iya ngenjing beperiga tumboh tandok. Dilah kelur-kelur, liur bepupu, mata mirah nekang jerenang. Tisik iya begerinjing. Isi bedengkal baka senggal buah petai.

Baru setengah tuboh iya pansut ari lubang, dia Salidi lalu manjong nyentok ka kebong langit ngeruang, nerais munyi orang ke baris nimbak ka senapang. Dinga nimbal ga Sapatu ari lubang sapiak nyin. Salidi lalu enda chechamang ngerejang Nabau ngena sangkoh bangkau kekitau nanang lempuang. Sangkoh agong ngentong beradong ruang belakang. Sapatu pan mantap rekong nabau ngena nyabur chudor pengundor darah langkang, badi anding beranaing makai untak tulang. Tang Nabau nya bangat kelalu kebal. Enda ruji mesai tekis abi beliong kabang, enda rajai mesai sayat daun kemelang. Merejok Salidi lalu nepan ba belakang iya, dia iya lalu mantap pala ngena nyabor, tang enda ga masok. Merejok ga Sapatu lalu numbok iya ba perut ngena sangkoh enda ga masok.

Ensepi diri dikeduan orang bakanya dia Nabau lalu deka ngelaban Salidi. Deka disuap iya Salidi ba pala, tang salah laban siko nya sikar nyeliah ka diri. Dia iya lalu mantap rekong Nabau nya. Peda bisi bakal mimit. Angkat baru Nabau nya lalu deka nyipat iya ngena iko, tang enda ga kena laban Salidi meremi ka diri ngagai tanah. Pantap iya dia Nabau ba pun iko. Nya baru iya telih, peda darah lalu mengkeching pansut. Nabau lalu ngalun ka Sapatu ka baroh tang siko nya pan sikar ga nyeliah ka diri. Dia iya lalu ngerurok ular nya ngena sangkoh. Peda tak lekat sangkoh ba baroh rekong. Ular nya lalu mutar deka mantok Salidi. Dia siko nya lalu ngitas iya ngena nyabur. Peda tak rarah rang iya sapiak. Ditandu Salidi baru peda rarah ga rang ari atas. Udah nya Nabau lalu mansang lembut salembut, laban mabok darah. Ensepi diri udah lembut dia tudah Nabau lalu nyengkilong ka diri dela ngelalai ka batu api.

Leboh ular nyurok ka pala diri dalam sengkilong dia deh tikus lalu angkat merejok, lalu nerakam batu api ba baroh rekong Nabau. Meda batu api nya udah ilih tikus, dia Nabau lalu begila diri baru. Tikus lalu nyau naban ka batu api. Nabau lalu ngelantar deka nitih ka Tikus, tang iya enda tentu dapat tegar agi. Leboh iya mansa Salidi seduai Sapatu, seduai nya lalu sama sereta numbok iya ngena sangkoh. Sangkoh seduai pan sama lekat gab a tuboh ular nya. Iya pen lalu mati.

Sereta udah mati Ular Nabau nya tadi, nya baru Tikus lalu nyua ka batu api ngagai Salidi. Gaga endar meh ati seduai menyadi meda batu api udah pulai baru. Udah nya samoa jelu enggau burong dalam kampong nya lalu bemunyi magang gaga meda seduai udah tebunoh ka Ular Nabau nya. Sida lalu belagu muji pemerani seduai menyadi :

“Salidi seduai Sapatu pemadu berani,
Seduai iya kempang mutus ati,
Munoh Ular Nabau ke ngachau kami.
Seduai iya dikingat ka kami berari-ari.
Pengawa seduai iya patut dipuji.
Sapatu seduai Salidi
Anembiak ke pemadu berani.”

Seduai iya gaga bender ati ninga bala jelu enggau burong udah muji pemerani seduai ke udah munoh Ular Nabau. Seduai lalu madah ka diri pulai ngagai samoa jelu. Sida lalu sama lantang bendar ati.

Udah nya seduai menyadi lalu mupok mulai ka diri. Tikus lalu bejalai dulu nganjong seduai iya pulai. Hari pen pemanah iya sida tiga lalu datai gab a temuda bali rimba madang empasa ubi abok. Datai di danau madang bukau keliau bepangku dudok. Angkat sida ari nya lalu datai di munggu Berangan Telu, alai tumboh kayu akar menyuai ke merundai bekaul ujong. Kejang ka sida tiga ari nya lalu datai ba jalai pampang tujoh ke nuju ngagai rumah seduai. Tikus nganjong seduai naka nya aja. Iya enda lalu ka rumah.

Kejang ka seduai ari nya, lalu nurun ka baroh datai ba tengah laman sida iya empu. Menalan nyapan enggi seduai iya sungkor dupan babi menoa. Menalan lada kair empeda manok banda.

Datai seduai di rumah dia Sapatu lalu berapi. Berapi meh iya surong kaki surong jari. Jari baka ke muar kesa, kaki baka ke sengat semada. Asap melap datai di para, asi pan lega. Asap melap datai di sadau, api pan mansau. Asap melap datai di perabong, asi pan ditanggong. Seduai lalu makai bedamai nadai lauk, makai bejangong beketup tunjok.

Udah badu makai seduai lalu gali nat ka diri. Tindok meh seduai malam nya, dia seduai lalu bemimpi.

Mimpi asai ka meda bulan melan-melan tanggar peranama. Mimpi asai ka meda petakang bintang tiga.

Mimpi asai ka megai selepai langit la-bira. Mimpi asai ka kena puput ka selulut rebut puntang reraga.

Asai ka mimpi kena pusin ka angina Surong daya. Asai ka mimpi dibai bua ka bepangka mua baka.

Ba pengujong mimpi seduai, dia seduai asai ka belayar ngagai luar Tasik China. Nepan di luan kapal Johara. Nunggang gumbang pasang bebunga.

Udah nya seduai asai ka sangkai di pantai Tanah Malaya. Lalu dialu Tuai melayu betemu enggau Tungku Datu Setia.

Dia seduai iya lalu dibai iya niki ngagai ladi Opis Raja. Dia seduai asai ka diberi orang bintang ka terang mandang dada.

Dia orang lalu bejako enggau seduai iya, “Ila seduai tau nyadi besai pegari nama, tampak rita megai menoa awak ka bansa tediri mansang”.

Udah nya seduai iya sama tedani. Nyau berunding ka samoa utai ke udah dipeda, udah ditengah, nya baru seduai nemu nya tadi deh mimpi seduai iya ke meda utai nya.

Udah nya seduai lalu tindok baru. Enda lama udah nya dinga tak rangau-rangau nyawa anak empeliau adau berua di randau kubal arang. Dinga tak rauk-rauk kukok jagok manok labang. Sandah pan dauh-dauh di tingkah tanah tebiang. Peda hari tak nyau tawas teringkas siang. Seduai lalu dani.

Badu makai pagi nya seduai lalu berunding ka jalai diri berumah baru, laban anak langkau seduai nyau jai. Seduai lalu salubang runding deka mesan ka bala jelu enggau burong ke diau di kampong mai sida berumah. Seduai lalu ngasoh manok sabong siko terebai nesau samoa jelu enggau burong.

Nya alai lalu terebai meh manok sabong ngagai kampong. Iya lalu nesau samoa jelu enggau burong madah ka sida iya, Sapatu seduai Salidi mai sida ngaga rumah ka seduai. Hari pan lemai, manok sabong nya pulai ga betesau.

Tumu pagi siti samoa bala jelu enggau burong lalu datai magang kia deka enggau seduai nya ngaga rumah. Sida lalu jamah udah, japai udai. Enda lama peda tembu rumah seduai nya naka pemanah-manah. Tembu rumah nya tadi, dia sida lalu madah ka diri pulai ka kampong baru.

Berengkah ari nya Salidi seduai Sapatu lalu lantang senang ngidup ka diri. Mimpi seduai ke udah pan nyentok ga, nya alai seduai lalu tediri nama tau ngiring menoa.