Thursday 31 March 2011

Ensera Kumang Betelu

 

KUMANG BETELU

01. GENTERAN – KELING NAMPOK

NYADI DULU kalia di menoa sabengkah ke benama Gelong Batu Benang dia bisi rumah sabuah ke panjai bendar kira bulih tigapuloh pintu. Nama orang ke nyadi tuai, nyadi penghulu dia nya Tutong Ulup Demong Bujang Lemandau Gendang ; lalu iya endang ripih turun menurun asal waris pengulu ke lelaki endang megai menoa nya. Nyadi ripih ari indu, indai Kumang endang asal orang dia, lalu iya nyadi tuai samoa indu dalam menoa nya, iya mega dipebasa ka lebih agi ari samoa indu bukai. Iya endang beberita ditemu orang disebelah dunya. Nyadi apai Kumang tu anak pengulu siko ke diau di tisau langit, lalu iya datai ari nyin nepat lalu jadi enggau indai Kumang. Nya beranak ka Kumang.

Nyadi leboh Kumang nyau dara raya, reti nya maia iya tau diator belaki, indai seduai apai iya endang selalu berunding dalam ati seduai, berunding ka sapa orang patut kai laki anak seduai.

Leboh maia nya bisi pengulu siko ke diau enda berapa jauh iga ari nya, ba menoa ke benama Tinting Panggau Gegiau Takang Isang. Pengulu nya bisi anak lelaki siko nama Keling. Keling tu nyadi tuai kayau di menoa nya, lalu dikangau ka orang raja berani tauka bujang mali balang. Keling endang pegari bendar dalam perang, laban iya nadai kala sabau dalam kayau, nadai kala balang dalam perang. Terubah Keling pegari bendar berita udah bekau sida menang leboh sida ngayau ka langit ngelaban Apai Sabit Bekait. Leboh ngayau nya maioh bendar dengah ulih sida. Pulai ngayau nya sida lalu niri ka gawai besai, gawai nya sakali katanju. Sida ke begawai nya mela pala ulih ngayau, lalu gawai nya dikumbai enchaboh arong.

Leboh udah pukas udah luas samoa pengawa ngayau tu tadi, alai lemai siti leboh sida dudok berandau enggau diri sebilik dia deh apai Keling bejako enggau indai iya, madah ka diri nyau bisi ati deka ngator Keling ngentap ka diri ngintu ruang bilik.

“Aku,” ko iya, “bisi utai deka dikenang enggau nuan indai anak, laban aku meda tua tak sama nyau tuai, meda sida anak pan tak lama ga udah bujang. Nya alai enti nuan besenutok enggau runding aku, aku bisi ati deka ngator iya bebini.”

Nya alai saut indai Keling. “Aku nadai panjai jako, tak samoa runding dipanggai ka aku ngagai nuan magang, enti diator ko nuan, nya ator ga meh, baka iya amat nyau lama ga udah bujang endang patut maia diator bebini. Enggai ka kelalu lama rumpas nyau bisi pulai ngagai kutok kitai empu kedudi hari ila.”

Dia deh apai iya lalu nguing ka jako ngagai Keling empu. “Nya munyi anak, utai kai udah dikenang kami dua indai nuan salemai tu ; kati ko asai runding nuan empu ninga ator tuju ati kami dua indai nuan ? Nya alai ke tu awak ka jako nya tak nyemetak, minta saut nuan meh kami dua indai nuan. Dalam pia kami dua minta saut nuan, tang enti nuan apin tulih ka saut diatu, tau ga nuan betanggoh dulu,” ko apai iya.

Nya alai Keling lalu nyaut, “ukai nama agi meh apai, indai, pasal jako seduai ti ngator aku ngentap ka pendiau diri, menyadi diri empu. Aku apin ulih ngeleka ka saut lemai tu, nganti aku aku udah berunding kira dalam kandang sebuol peti, udah nya baru aku nyemetak ka saut ngagai seduai,” ko iya.

Dalam kandang empat lima hari nya, dia Keling berunding, ama meh ati iya deka bebini, ama ga ati iya lembau bebini, laban bisi ga ati iya agi belala bujang.

Nya alai nyau ketujoh hari iya udah berunding, lemai nya iya nurun ka tanah lalu bejalai ngagai nanga sungai siti ke enda jauh iga ari pendai sida. Nyadi ba julut nanga sungai nya bisi batu siti manah sereta nyelai. Nama batu nya ko cherita tuai, nya pengerawang ati. Leboh agi menya barang sapa orang bisi utai mar dirunding suah orang nampok ba batu nya, lalu barang sapa ke bidik lansik suah ga Petara bisi nulong, tang maioh agi orang ke enda bulih. Nya alai malam nya Keling lalu nampok dia, leboh iya tindok, dia deh iya bisi mimpi. Dalam mimpi nya iya ninga orang bejako, tang nadai dipeda tuboh.

“Nama gaga nuan dia Keling ?” pia ko jako orang nya.

“Aku tu tussah ati laban apai seduai indai ngasoh aku bebini, aku tak agi belala bujang,” pia ko saut Keling.

“Ee, anang nuan muai jako apai seduai indai nuan, bebini meh nuan, enda apai nuan ngator nuan bebini indu ke enda manah, nadai kabuah nuan enggai. Aku nemu indu ko ati iya. Aku tu Raja Genali datai ari bebuli ai mulas, nyambut tempias kaki wong.”

Keling lalu tepeda ke kenaya gamal Raja Genali, pala iya baka pala mensia, tuboh iya baka gamal tuboh lelabi, jari kanan iya ngenggam genteran sangkoh lunju, kaki iya bekenji ba gam batu. Keling bisi bendar ati deka agi bejako enggau Raja Genali tang iya nadai nyaut agi leboh Keling ngangau ka iya baru. Udah nya Keling lalu dani, nya baru iya pulai ka rumah, lalu gali ba panggau penindok iya empu. Dia iya lalu berunding ka jako Raja Genali ke didinga iya dalam mimpi nya tadi. Iya lalu bejako dalam ati diri.

“Enda meh aku patut muai jako apai seduai indai, nama mimpi aku tak munyi nya,” ko iya.

Iya lalu mutus ka runding diri, lalu besemaia deka nitih ka ator apai indai ke ngasoh iya bebini. Sereta udah badu makai pagi nya, dia apai Keling ngasoh seduai indai iya sama dudok semak iya; leboh sida sama udah duduk dia, apai Keling lalu bejako nampong jako iya enggau Keling minggu dulu nyin suba.

“Aku anak, agi deka nampong jako pasal utai ke dikenang aku enggau nuan bekutai,” ko apai Keling, “laban saharitu nyau ngerampit ke delapan hari pengelama jako nya udah. Nya alai aku deka ninga ka pengabis runding nuan meh aku tu anak,” ko iya.

Indai Keling pan bejako ga nampong jako apai iya nya tadi kujong agi. “Saut meh anak, jako apai nuan nya. Enti nuan udah madah ka runding diri ngambi ka kami dua apai nuan nyamai nemu, baka aku ukai bisi jako maioh. Nama utai udah abis dirunding sida apai nuan, endang enda kala mantah,” ko indai iya.

Udah abis jako indai iya nya tadi, nya baru Keling bejako, “Ng, apai,” ko Keling, “ukai nama agi baka jako seduai indai ti deka ngator aku menyadi diri empu nampong ruang bilik kitai. Aroh iya ga laban utai besai bakanya endang enggi kita apai indai; aku bekutai alai tak laun nyaut laban utai ke ngemesai nya ba aku siko enda ulih putus ka dalam sahari dua aja. Nya alai ka tu apai, kita agi nampong jako nya, lalu kita udah ga meri awak aku berunding dalam kandang kira sebuol peti, lalu diatu asai ka udah ga putus runding aku pasal ator seduai indai. Aku nyau berasai berat bendar berunding ka ati seduai, keba kita ngator laban maia iya udah patut. Nya alai ke tu apai, nadai bantah meh aku baka enggau jako seduai,” ko Keling.

Apai Keling lalu madah ka diri deka ngator iya bebini ngambi indu dara siko sarumah enggau sida Tutong orang Gelong Batu Benang. Nama indu nya Kumang lalu iya nya meh naka pemajik indu ke bisi di menoa nya.


02. GENTERAN – MELAH PINANG

TIGA HARI udah bekau nya, alai apai seduai indai Keling lalu mai empat lima iko sida sarumah bukai enggau seduai nemuai ka Gelong Batu Benang nanya Kumang ka bini Keling. Datai seduai din lalu nusoi pejalai diri, madah ka diri nanya bini. Apai Kumang lalu gaga bendar ati ninga jako nya, lalu diterima, disambut iya.

Udah nya apai Keling seduai apai Kumang lalu ngaga timpoh semaia hari deka menyadi gawai melah pinang. Nya alai timpoh digaga seduai iya sepiak bulan, laban maia seduai ngaga semaia nya anak bulan, lalu seduai sama enggai enda ngintai ka diri melah pinang maia bulan perenama. Udah nya orang di Gelong Batu Benang lalu berengkah nyendia ka diri menyadi gawai melah pinang Keling seduai Kumang.

Pulai nya tadi apai Keling lalu mai bala anembiak iya begaga tuak enggau utai bukai mega nytendia ka gawai. Sida iya sama ngemendar nya nengkira gawai laban sida betangkup sama orang bansa raja, laban lama bendar sida udah nadai pengawa melah pinang enggau pangan. Leboh tuak udah mansau, utai bukai pan udah ga sikap orang lalu ngaga timpoh maia pengawa nyadi. Malam nya sida di Gelong Batu Benang lalu baum deka ngeletak hari pengabang datai. Nya alai pemutus aum, empat hari puang, kelima pengabang datai.

Nyadi ator sida iya, Tutong diasoh ngambi ngabang ngagai Tinting Panggau, lalu maioh sida bukai ngambi ngabang ngagai rumah bukai. Sida ke ngambi ngabang, ngasoh orang ngabang lalu datai di Gelong nitih ka timpoh baka ke udah diletak dalam aum nya tadi.

Tutong lalu nurun mansang ngambi ngabang, iya pan ngena ngepan, ngena pekayan chukop gaya, baju iya digaga ari ubong setera, lalu disulam enggau benang mas, kanchin baju iya pirak ngenjing burak bendang-bendang. Iya nangkin nyabur chudur nyendaun lalang.

Leboh Tutong datai di rumah orang di Tinting Panggau, iya lalu dudok ngagai ruai sida Apai Keling.

“Oh, lalu akan ! Lalu ! Dudok !” pia ko jako Apai Keling.

“Au meh aya. Legai kayu bansu endang datai deka lalu,” ko Tutong.

Apai Keling lalu nganchau tikai lalu ngambi perengka pinang sirih, sida sarumah pan lalu maioh ga ngulu Tutong ti baru datai. Nyau kelama udah berandau dia, alai Tutong lalu nusoi pejalai diri.

“Aku tu aya,” ko iya, “datai ari Gelong, kabuah aku tu ngambi ngabang, ngabang ka pengawa kitai ke deka melah pinang. Nya alai timpoh udah diletak kami ari nyin kemari tiga hari tu agi puang, kempat pengabang datai,” ko iya.

Udah abis jako Tutong alai apai Keling lalu nyaut. “Nya alai, baka pejalai nuan, akan, lemai tu lagi aku ngempuru ka kami sarumah, mai orang sama ngabang, tu ga tak rumah kitai empu ke betangkup empu pengawa melah pinang,’ pia ko jako apai Keling nyaut jako Tutong.

Enda lama udah nya, alai Tutong madah ka diri mupok laban pengawa kachoh kiroh di rumah nadai hari nemuai lama.

“Aku tu aya,” ko iya, “tak lain gamal dipeda nuan, baka ke enda rindu lama nemuai ngagai kita. Tang iya ukai pia, laban pengawa enggi kami sabuat di rumah din benong kisok bendar, nya alai aku tak ngarau nemuai ngagai kita semadi laban utai enda tau enda dikereja,” ko Tutong.

Malam nya Tutong lalu mai sida sarumah baum, berunding ka sambut sida enggau bala pengabang. Leboh orang udah sampai datai, dia deh apai Kumang lalu bejako.

“Nya alai aku minta kitai maioh tu ngetu dulu randau bukai, laban nyau deka nusoi kabuah aku ke ngumbai kitai begempuru,” pia ko jako iya. “Tang aku empu enda nusoi nya, awak ka unggal aku Ngelai nya nusoi berita ngagai kita maioh nya,” ko iya.

“Nya sabarang nusoi meh, baka kami maioh tu semina tau mending ka iya aja,” pia ko saut orang maioh.

Nya baru Ngelai lalu berengkah bejako; nama agi deh ngenjing taung-taung nyawa Ngelai bejako ba moa maioh. Iya ga lanchar dipanggong enggau endang manah serengong jako. Orang tak telenga lilih ninga jako iya.

“Nya alai timpoh gawai kitai nyau ka chukop, tiga hari agi puang, kempat pengabang datai, utai enda tau enda diperunding ka kitai baka basa kena kitai nyambut pengabang, bakani ko sambut kitai, ko runding kitai maioh tu ?” ko Ngelai

Lalu bejako meh anembiak siko dia nyaut iya. “Nya munyi jako orang ke tuai, nya alai kitai anang enda nyaut, sama mansut ka runding enggau penemu diri empu,” pia ko iya.

“Uji tak lalu nuan dulu nyaut, nuan ga endang udah bejako, lagi baru kami bukai ga bejako,” pia ko sekeda sida bukai ga nyaut jako iya nya tadi.

“Barang iya meh,” pia ko iya ga. “Enti kita ngasoh aku dulu bejako, nya bejako ga meh. Ukai nya baka ke nelan, ga mansut ka jako,” ko iya. “Dalam runding aku mudah bendar utai tu dikereja, kitai ga anang ngereja utai ke enda tentu temu kitai. Nya alai baka bala pengabang ti sida datai ila, asoh tiki temuai, barang alai sida dudok sebelah rumah kitai tu. Udah orang sampal datai, ator kitai dudok berintai ba panggau, udah nya lalu sibor enggau ai tuak. Nya naka sambut ko aku, laban enti sambut bakanya, iya tentu muntang bendar dikereja, iya ga enda maioh belanja,” ko pengujong jako anembiak nya tadi.

Udah nya samoa sida sarumah bela bejako magang madah ka runding diri, tang semina tiga iko aja sida salubang jako enggau anembiak ke dulu bejako nya tadi; lalu samoa sida sarumah bukai bela deka ngaga sambut diator manah agi. Sida enda nemu nyemetak ka gamal ator sambut, tang sida lalu manggai ka jako ngagai orang ke tuai, awak ka sida nerang ka jalai basa ke manah, basa ke dikerindu ka orang maioh.

Ninga munyi nya Ngelai lalu ngasoh Tutong bejako, ngadu ka sambut enggau peniki pengabang. Nama deh, Tutong ga endang landik agi ari Ngelai ngerintai leka jako; orang ngenjing nadai engkeretik mending ka iya.

“Nya alai kai tu, pia ko tu unggal, nuan meh ngator nya, iya ga jako kitai sarumah tu udah bepanggai ba samoa kitai ke tuai agi bulu pala mutar ka pengawa,” ko jako Ngelai nuntong Tutong enggau jako.

Udah nya Tutong lalu bejako ngerintai samoa macham tangga basa, pasal uti sambut pengabang kena niki ka pengabang leboh maia gawai melah pinang, kenyau ari uti tuai dulu kalia alah datai ka kamaiatu.

“Nya alai,” ko Tutong bejako, “siko ari kitai sarumah tu nyadi wan ai, reti nya, ngemata ka penatai pengabang. Enti pengabang udah datai di pendai, pengabang lalu diasoh mandi lalu begari, tang anang guai niki, nama kitai empu rumah apin bisi ngambat pengabang ka ai. Udah nya kitai lalu ngalu pengabang ka tanah, kitai mai gendang, maio menira, mai ai tuak, mai piring enggau manok. Datai kitai di menalan dia kitai lalu nganchau tikai, lalu ngator tuai-tuai pengabang dudok dia, kitai nanya ka burong nyangka sida bisi burong enda manah, burong salah, utai nya dulu bela di tanah, nya baru tau niki. Udah tembu nya baru mai pengabang niki. Iya ke dulu bejalai mai bala, lalu iya nya nyan menira. Di tengan tangga digaga ka kitai wong, bebendai enggau setawak ka gerugu, ai tuai kena ngelanggar orang dia; lepas nya pengabang lalu dipejalai ka niti rumah dilanggar bala indu enggau ai tuak ba genap-genap belah ruai. Udah nya baru pengabang didudok ka di panggau.

Udah samoa pengabang dudok, baru biau enggau manok, nya baru meri ai basa, orang ke bisi pangkat beruntong saratus gelas ai tuak, iya ke baroh agi semilan puloh gelas ai tuak,” ko Tutong ngerintai samoa basa enggau ator niki ka pengabang.

Samoa orang maioh rindu magang ninga ator nya, nya alai lalu bakanya sida nyambut penatai bala apai Keling leboh gawai melah pinang Kumang seduai Keling ba rumah orang Gelong Batu Benang.

Nya alai leboh datai ba maia hari pengabang ke datai sida lalu nyambut pengabang nitih ka ator ti udah disebut Totung nya tadi. Nyau udah lepas tengah malam, leboh maia orang ke bejako melah pinang dia orang lalu ngempuru ka samoa pengabang maioh, empuru ngagai ruai sida apai Kumang, laban orang nyau deka bejako ka pengawa melah pinang.

Orang bejako ngari ka ripih ari lelaki nya Laja, lalu orang bejako ngari ka ripih ari indu nya Ngelai. Nya alai apin Laja bejako anembiak siko lalu bediri, ngerara orang maioh enda ngasoh inggar.

“Nya alai samoa kitai maioh tu anang inggar agi, laban bisi orang deka bejako nusoi berita ngagai samoa kitai,” pia ko jako iya.

Udah nya Laja lalu bediri bejako. “Kami tu datai mai tuboh, mai bala, endang nitih ka danji, nitih ka semaia enggau sida apai Kumang. Kabuah penemuai kami ke nyau sampal enggau indu enggau kalu, enggau engkerumong enggau guong, laban kami deka minta pedua ka sida iya batu pesedan bulan perenama, batu petakang bintang tiga enggau batu intan tampong gemala, nya tau ga bebali nyadi anak mensia tau ga iya nyadi ubat ngasoh raja pengumbai reta, pematak barang. Kami tu udah bedanji enggau sida Tutong besemaia medong selok lintong, lalu bebelah ka gupong buah pinang,” pia deh ko jako Laja.

Sereta udah abis jako Laja nya tadi alai Ngelai lalu bediri ga bejako nimbal enggi Laja.

“Au meh unggal Laja,” pia ko jako Ngelai, “mua meh pemanah pejalai kita. Nya alai enti kita minta pedua ka kami batu intan, batu bulan, batu petakang bintang tiga, batu gemala, nya bisi ga kami ditu ngembuan, tang deh utai nya enda tau diambi ngapa diambi pia, laban kami bulih iya menya diberi Sempeta tuai lama, sua Biku Bunsu Petara sua Pantan Inan Jagia. Nya alai iya diatu disengkilong tedong, dijaga naga ular bisa. Kitai sama ninga ular naga, datai ari empat suku dunya, ka bengeli mua pemisa, genap pesedan bulan perenama iya betapa ngadap ka moa ngagai matahari tumboh,” pia deh ko jako Ngelai.

“Au meh unggal Ngelai,” pia ko jako Laja, “enti batu intan batu bulan bisi utai ngibun, utai nyaga, kami enda takut laban kami mai pengaroh gembar tuboh, mai ubat serangkap genap. Kami mai taring uting babi menoa, tandok rusa ke periga pampang tiga. Suah ubat tu udah diuji ka kami ngelaban ular naga ngambi ka iya enda tau nebah nyawa nuking ka rang,” ko Laja.

“Enti munyi nya tau kita bulih utai ti digiga kita,” pia ko Ngelai. “Kita ga chukop utai dibai utai dikena, ukai datai pia datai ngapa.”

Ninga munyi nya lalu gaga meh ati Laja, dia iya bejako baru. “Nya alai batu intan tu dibai kami pulai ka penyurai rumah panjai, din ila diengkah kami ba penaik besai, didudok ka kami atas tikai pandan bekuang. Udah nya lalu bebali nyadi selangkoh tuboh besai, lalu dibiau kami enggau selanjau manok tawai biring gerunggang. Iya lalu ditaroh kami tegoh-tegoh nyadi ubat besai pematak utai, pengumbai wang,” pia ko jako Laja. Iya lalu madah ka diri gaga rindu mai batu intan batu bulan nya pulai. Nya alai jako sida lalu abis naka nya.

Nyau lama hari udah tawas, bala sida Laja pan pulai ga mai indu ke ulih sida iya minta nya tadi ; bala pengabang bukai pan pulai magang laban pengawa udah abis. Leboh datai di Tinting Panggau dia Kumang lalu dibai tama ngagai bilik sida Keling empu.

Malam nya sida lalu belator bebiau. Keling seduai Kumang sama-sama dudok datas setawak. Setawak nya tadi sama dibungkor enggau kumbu muau kai beria mandang moa, menyeti bali berandau kai tanda anak Raja.

Nya alai orang miau Kumang seduai Keling nya Aya Bujang Tuai ke dikumbai sida, Aya Nawang Gundai tujoh kali matai betawai baru bisi buok mesai kepai buntal melenang, Aya Mama tau ka tugu sakai serang. Orang sarumah nya sama begempuru kia kai magang. Apai seduai indai Kumang pan sama bisi enggau gempuru dia. Seduai datai sama sereta orang ke mai indu ari Gelong pagi tadi.

Bakatu ko munyi leka biau Aya Bujang Tuai ke miau Keling seduai Kumang :

“Sa, dua, tiga, empat,
Lima, enam, tu-u-joh !
Aku miau ka selanjau manok tawai,
Dibinching aku enggau puting tunjok tigai.
Ukai nengkebang ukai muntang.
Tang aku nunda penti Antu Gerasi,
Datai ari tisi langit landai.
Nunda pantang Belang Pinggang,
Datai ari sengayang nyang cherai.
Aku ga nunda biau Sempeta tuai lama
Seduai Sempandai.
Leboh seduai iya kai ngaga
Kitai nyadi mensia.
Aku kai miau ka selanjau
Manok pungka-laki,
Dipegai aku enggau tunjok ujong jari.
Aku ga nunda biau Sempeta
Seduai Seragenti.
Leboh seduai kai ngaga hari
Pegari tawas segenda.

Nya alai ke lemai tu,
Aku miau Keling seduai bini.
Seduai iya kai udah dibelah,
Ka kitai buah pinang tuchi.
Seduai iya kai udah diator,
Kitai begulai diri melaki bini.
Nya alai laban pengawa
Kitai bepanggai ba Petara.
Aku minta Petara ngintu lalu nyaga,
Aku minta Petara ngimbai lalu ngemata,
Awak ka seduai iya beranak betelesak.
Lalu bejereki nguan menoa.
Tegoh baka batu munjong gempala.
Tinggi langit luar gentira.
Besai tasik luar nanga.
Anak uchu seduai iya jemah ila.
Anak beribu serak,
Uchu betampong uchu
Pegari dalam dunya
Gayu guru ko Sentuku.
Umor panjai ko Sempandai.”

Sereta udah tembu bebiau nya tadi, lalu rami meh orang maioh dia, ngirup tuak, ngirup arak, makai penganan, makai penyaran, samalam-malam nya alah nyentok ka tawas. Orang lalu berenong semain samalam-malam nya ngelulu ka seduai iya sama serasi jadi begulai. Pengerichah enggau pengerami orang ke biak mencha enggau ngajat di punggang puting setak enda ulih tusoi agi, munyi ke runtoh ruai laban sida ke begendang sereta lalu diumba enggau nyawa orang ka manjong. Hari pan tawas sida lalu terebam ngali ka diri, bisi meh sida nya dua nyau ngelu pala, bisi mega nyau lelak bekau ke rami dua hari nya ke udah.

Nyadi pinang Kumang seduai Keling ke dibelah sida lima sirap, nya alai lima malam ga seduai iya di Tinting Panggau alai nemuai nyundang pinang ka Gelong. Udah chukop kelima hari alai seduai pan nurun ga nyundang pinang. Burong di rantau jalai sama manah, kenyap sama lantang, orang kulu kili nadai parai, nadai bebadi, nya alai enda mega seduai tanggul belega.

Pulai nynudang pinang ari Gelong Batu Benang seduai lalu sama ngentap ka pendiau diri di Tinting Panggau nampong ruang bilik sida Keling. Seduai ngidup ka diri baka orang maioh tu mega. Maia turun mantun, nubu maku, mansai nubai, bumai seduai sama bulih gerah, bulih mudah. Seduai sama serasi jadi begulai ngamat ka leka sampi orang ke enggau seduai leboh maia bebiau dulu suba.


03. GENTERAN - BETUBOH BISI

KADUA TAUN Keling seduai bini iya udah beguilai, nya baru Kumang betuboh bisi. Nyadi pagi hari siti leboh maia kandong Kumang nyau deka chukop bulan, Keling melah kayu api di tanju, lalu Kumang nutok beras ba tempuan ruai sida iya empu. Limpang ari iya ke nutok beras nya, dia Kumang tak bejarit bendar tama ka bilik. Nyau kenam kali iya udah tama ka bilik alai Keling lalu nilik ari seling dinding, dia iya meda Kumang tak pansut ari tajau sida sigi ke pemadu besai. Tajau sida sigi nya besai bendar, endang tak asai ke diau ba bilik siti asai diau dalan nyin. Leboh Kumang tama tajau nya tadi, iya nadai nemu Keling bisi ngemata ka pengawa iya. Udah Kumang tama ka bilik nyau ketujoh kali, dia Keling nilik baru ari seling dinding, iya meda Kumang pansut baru ari tajau nya tadi. Ati Keling irau bendar meda iya baka ke bisi utai dikereja enggai kena peda orang. Udah nya Kumang pansut baru ka ruai lalu nampong pengawa iya ke nutok nya tadi.

Keling pan agi ga mengkang melah kayu api, tang ati iya seruran irau ka pengawa Kumang tak nyelai bakanya. Enda liat agi ati iya, lalu tama ka bilik lalu ngebak ka tudong tajau besai kai udah alai bini iya tama. Leboh iya udah ngebak ka tudong tajau dia iya lalu tekenyit meda telu tujoh igi dalam nyin. Lalu ko pikir ati iya : “Tentu tu telu bini aku.” Ati Keling ringat sambil malu bendar, laban nadai kala ninga mensia tau betelu bakanya. Keling lalu pansut ka ruai, dia iya merati ka kandong bini iya. Peda iya nadai kandong agi, perut bini iya tak nyau ngelempis mit.

“Oh !” ko ati Keling dalam nyin. “Naka meh pemalu aku tu, laban bini aku nya tak nyelai ari mensia bukai bap langit tu,” ko iya.

Iya lalu tama baru ka bilik lalu ngebak ka tajau nya tadi. Peda iya telu nya tentu tujoh igi, lalu sigi-sigi kira mesai ujong betis iya empu.

“Tusah ngapa laban utai nyelai bakatu. Manah agi buai enggau telu nya,” ko ati iya. Iya lalu nanggong tajau sarang telu nya lalu dituang iya ngagai ujong bilik sida. Nama dih, baka ke nuang pekasam bulat, ko orang iya nuang telu nya, lalu pampul iya idong diri takut ka bau banggar telu enti nya pechah datai di tanah. Nama dih, munyi redup buah embawang laboh puda, ko orang redup telu nya ga laboh ka tanah, tang tak enda pechah, mimit pan enda ga telu sigi-sigi bisi berabi.

Udah nya baru Keling nurun ka tanah mai sangkoh siti. Datai iya di tanah enda chechamang alai iya lalu natok telu nya sigi-sigi enggau ujong sangkoh iya. Udah ditatok iya sigi pansut ga anak mensia siko ari nya, tatok iya ga sigi bakanya ga, pansut ga anak mensia siko. Tujoh igi telu nya, tujoh iko ga anak mensia pansut ari nya.

“Oh !” ko iya. “Enda mih aku kala, enda umor aku kala meda utai nyelai tu. Nadai meh aku nemu Kumang nya tau ngandong ka telu tujoh igi, lalu telu nya ngada ka anak mensia. Nyelai meh Kumang tu ari samoa indu bukai. Deka aku ngumbai diri enda bepenti ka iya betuboh bisi naka ulih ga aku menti diri empu, ngingat ka samoa utai ke mali dikereja. O, kada enda menawa Raja Genali, laban iya ngajar aku bebini ngambi Kumang suba, nambah ka jako apai seduai indai,” ko ati iya.

Benong iya agi tusah ati di tanah berunding ka penyelai utai nya, alai Kumang pan tama baru ka bilik lalu nemu telu iya nadai agi dalam tajau. Udah nya iya lalu malik ngagai ujong bilik meda Keling ngeringak bediri ngila ka anak iya di tanah baru mechah pansut ari telu.

“Oh ! Mati meh laban iya nya !” ko Kumang. “Naka-naka meh penyayau anak tua digaga nuan bakanya deh Keling. Lapa-lapa alai nuan bengat ngaga sida bakanya deh Keling ?” ko Kumang.

“Eh, nama kesayau, ukai bisi guna, siko pan sida nadai meh bisi mata, samoa sida buta magang-magang,” ko Keling.

“Ni enda buta, sida ga ditatok nuan ngena ujong sangkoh,” pia ko Kumang nganu Keling.

“Badunda sangkoh meh kena aku natok sida iya. Aku ga enda nemu reti. Nadai kala meda utai ngenyelai nya. Aku ga malu meda nuan beranak nyelai ari orang bukai bap langit tu,” pia ko Keling nyaut bini iya.

“Eee Keling,” ko bini iya. “Enti enda digaga nuan bakanya, enda anak tua buta.” Udah nya bini iya lalu nurun ka tanah lalu ngambi anak iya pulai ka rumah. Bini iya merap tiga iko, lalu Keling nyau ka enda teberap ka empat iko.

Dalam dua tiga bulan udah bekau nya selalu bisi temuai datai ngagai sida ; orang datai ari maioh bengkah menoa, laban orang baru ninga berita mensia bisi tau betelu, lalu deka meda ka gamal anak mensia ada ari telu. Samoa orang maioh ti datai ninga rita nya alit bendar ati, laban nadai kala ninga mensia tau betelu. “Kenyau ari rangkat dunya nyadi kalia alah datai ka diatu, nadai kala ninga mensia tau betelu. Nyelai meh dunya kamaia hari tu,” ko jako orang maioh.

Lalu ko orang bukai, “Nyangka anak nya tau ajih.” “Eh, anak petara nya,” ko sekeda. “Eh, endang anak Kumang seduai Keling,” ko sekeda, “tang menawa alai sida nyelai bakanya.” “Anang jako nya,” ko sekeda, “kitai enda nemu penyadi sida nya kedudi hari jemah ila.”

Nyadi samoa anak Keling tujoh iko nya tadi nadai alai mantah ba perengka tuboh bukai, semina penyelai samoa sida iya meh buta magang-magang. Jangka kabuah alai sida buta laban dipechah ka Keling ngena ujong sangkoh, ukai endang mechah kediri empu. Enti enda pia nyangka sida endang sigi menawa ari kandong indai sida empu.

Keling seduai bini iya tak tusah bendar ati laban anak seduai iya tak buta magang-magang bakanya. Kenyau ari anak iya udah ada alah datai ngagai maia umor sida iya udah lebih sataun Keling nadai ngetu ngasoh samoa orang kai bisi penemu ngubat mata sida iya. Manang enggau dukun ngenjing besundor pulai mansang bebela ka mata anak seduai. Belian enda ngetu malam belian, begawai nadai kala ngelaung lemai ga sida Keling begawai bedaya ngiga chara ngerai ka mata sida nya.

Abis penuai manang di menoa nya, dikumbai sida Manang Chelong pan diambi sida belian. Iya nya meh naka penyidi manang di menoa nya. Samoa orang ke dipelian ka iya ngelamatu jarang bendar ketisau enda suman, amat baka ka muai empeleman. Manang Chelong nyau tuai bendar, mata enda lansik, pending enda ninga utai, ngeli nadai agi, belakang nyau bungkok, bulu pala iya nadai agi chelum selambar. Nya meh iya, ke diambi orang nyau ulih ngiring baru tau bejalai. Nya alai belian meh iya dia samalam-malam nya, belian besagu-ayu. Hari siti sida lalu nganti mata bala anak Keling bisi insor pama, tang lalu nadai ga insor pama.

“Enda ulih meh sida tu, enda ulih gerai ka ngena leka pelian. Semengat sida tak udah jauh bendar dipeda aku, nyau ngili Batang Mandai,” ko Manang.

“Enda nemu chara meh kami tu aki, tak bepanggai ba nuan nya meh, bedaya ka sida iya. Sabarang chara ko nuan titih ka magang. Anang ngantong penemu diri ba kitai sabilik tu,” ko Keling.

Udah pulai Manang Chelong nya tadi dia sida agi nganti, nganti mata sida nya bisi insor pama, kapa deh ngumbai bisi insor pama, ngenjing ngasoh mata sida bekerambit rapit agi ari selama.

“Enda meh nemu daya ngerai ka mata sida nya,” ko Kumang. “Nya baka tengkira reta dalam bilik nyau silik kena ngupah orang ke bisi penemu ngubat sida,” ko Kumang gut-gut mutap kediri empu.

Kumang seduai Keling sinu sereta nelap enggau anak seduai taja mata sida nya buta. Sida sarumah pan selalu nyaup seduai iya nyapi sida nya makai leboh maia seduai ngereja pengawa bukai. Nya meh seduai iya sataun-taun nya jarang bendar mindah ari rumah. Seduai enda enggau orang mindah kiba kanan, laban kiroh ngintu anak seduai nya ke enda tau enda disapi makai enda tau enda diberi mandi.

Leboh anak iya agi mit, Keling apin ngaga nama sida iya. Kira leboh umor iya ke biak nyau tegar belanda nya baru iya ngaga nama sida nya. Iya ke tuai Kilat nama, nangkan ka nya Galong, Sandau, Jisi, Ilin enggau Galang, lalu iya ke biak bendar bunsu ka sida, Mujong nama.

Dua taun udah nya, dia deh ati Keling seduai Kumang tak bisi berubah pengerindu ka anak seduai, laban seduai nyau berasai puas, berasai leju nupi sida nya. Seduai nyau berunding ka pemuas diri nyangkong samoa sida nya tujoh iko saumor idup.

Nyadi lemai siti Keling bejako enggau bini iya. “Tua enda ulih agi ngidup ka anak tua, laban sida nadai tau gawa. Dini tua tesangkong ka sida gawa salama umor idup.”

“Nama chara tua enggau sida nya ? Dini endor tua engkah sida ?” pia deh ko Kumang.

“En, nama ketusah, pagila aku ngaga langkau dalam kampong din, dia alai tua engkah sida nya,” pia ko Keling nyaut bini.

Samoa sida menyadi tu tadi nadai nemu apai seduai indai sida bisi runding bansa nya, laban jako nya endang dikejako ka seduai iya kediri enda didinga anak seduai tujoh iko nya.


04. GENTERAN – BATU PALA KERA

NYA-A, TUMU pagi hari siti dia Keling lalu nurun mansang ngaga langkau dalam kampong din, nitih ka pemutus aum seduai melaki bini. Dua hari pengelama Keling ngaga langkau baru tembu. Mentara tiga hari udah bekau nya, alai Keling nganjong anak iya ngagai langkau nya. Leboh iya nganjong sida, dia iya lalu sedia mai bekal, beras kira chukop tiga gantang pemaioh, lalu lauk kira chukop empa sida tuboh tujoh iko nya saminggu. Leboh Keling nganjong anak iya tujoh iko nya tadi kadalam kampong, dia iya ngambi tali siti lalu ngasoh sida bepegai dia magang, laban tali nya nyamai kena iya ngiring sida leboh nengah babas.

Kelang sida deka nurun dia Keling ngasoh samoa sida bepegai ba tali nya magang, nya baru sida mupok nurun. Samoa sida sarumah tu nemu reti kabuah alai Keling ngaga anak iya bakanya. Maioh bendar nyabak, laban sida sinu ati berunding ka sida nya tak dibuai kadalam kampong, lalu nadai orang enggau begulai. Nyangka, enti bisi semina nyawa rusa, nyawa kera, nyawa kijang, nyawa beruang. Tambah mega bisi pan jelu nya semak nadai ga chara sida enggau, sida ga buta enda meda utai.

Nya-a, mupok meh Keling nya tadi nganjong bala anak iya kadalam kampong. Nyadi langkau ke digaga iya nya jauh kedalam kampong, nyau setengah hari pengelama sida bejalai baru sida datai din. Leboh sida datai din, sida menyadi tujoh iko nyau lelak bendar, tang lebih agi ga iya ke benama Mujong laban iya bunsu ka samoa sida. Sida ke bejalai nyau abis ikak tulang bakakelah-bakakelah. Sereta datai sida di langkau lalu ngempas ka diri gali magang-magang, enda kala ensepi utai medis nya.

Apai sida semuti samalam aja bemalam enggau sida dalam kampong, udah nya iya mulai ka diri ka rumah. Pagi nya, apin mulai ka diri, iya dulu ngajar sida tujoh nya berapi lalu mela pemakai ka diri empu. Mar bendar sida mereti ka samoa ajar apai sida, laban sida ke enda lansik, semina arap ka pending aja kena ninga.

Leboh nya nadai sida nemu apai sida enggai beranak ka sida agi, lalu sida pan enda ga nemu diri deka ditinggal ka apai sida dalam kampong, lalu enda begulai enggau apai seduai indai sida baka selama.

Leboh hari nyau ka lemai, sida pan lama ga udah nadai ninga jako apai sida agi. Sida lalu ngangau ka iya : “Ui ! Ui ! Ni nuan apai !” ko kangau sida. Tang apai sida enda ninga agi, laban iya lama udah ninggal ka sida. Salemai-lemai nya sida bejarit bendar ngangau ka iya, tang nadai nyawa orang didinga nimbal sida. Nyau kelama sida nyau badu agi ngangau, laban udah lelak nebah nyawa, tang Mujong ke biak agi ka sida mengkang rauh-rauh nyabak. Dia iya maring ka diri sebelah langkau ngangau ka apai iya minta ambi, minta bai pulai. Hari nyau lemai sida pan nyau berasai lapar ga. Lemai nya sida enda berapi laban agi maioh asi dipandok apai sida pagi tadi, lalu nya endang chukop kai dempa sida tengah hari enggau lemai nya. Malam nya baru sida nemu diri udah dibuai apai sida dalam kampong, nya mun ati sida balat agi tusah.

Nyau pagi siti baru sida nguji berapi kediri empu, tang asi sida enda mansau enggau manah. Maioh bendar sida betu leboh berapi lalu bakanya mega asi sida enda mansau baka pemansau enggi orang ti enda buta. Leboh beras sida nyau udah abis, dia sida tusah bendar laban nadai nemu jalai ngiga pemakai agi.

Tumu pagi hari siti baru menyadi sida ke tuai, iya ke benama Kilat bejako, “Kitai nadai pemakai agi, nya alai nadai pengujong bukai kitai tu ila tentu mati keberuran diperinsa ka apai seduai indai kitai bakatu. Tang nama runding kita, nama jalai kitai ngiga daya ngiga chara ngidup ka diri ?” ko iya.

“Enda nemu runding meh,” pia ko saut sida bukai. “Tang asai ka manah agi kitai mindah ari endor tu, lalu ngelelang ka diri dalam kampong, nyangka ukor kitai bisi betemu enggau sabarang orang, lalu minta kasih sida mai kitai pulai ka menoa awak ka kitai tau nyadi ulun orang. Nya pan pama ga ari kitai ke mati keberuran dalam kampong tu,” pia ko jako sida.

Nyadi menyadi sida ke tuai lalu salubang runding enggau jako menyadi iya bukai. Apin sida bejalai, dulu sida ngambi randau lalu ba randau nya samoa sida bepegai. Udah nya baru sida mupok. Nya-a, bejalai meh sida neresap sebelah kampong, sungai di ulu, sungai di ili, ai di semerai, bukit ditiki, lembang dipelakang nitih ka jelan jalai jani. Leboh sida iya ke bejalai, nemu ai ngirup ga sida, nemu buah empa, nemu kantok kayu empa ga, tak barang utai empa meh sida, laban perut bangat lapar. Siang hari bejalai, malam hari bejalai, dia lelak dia ngetu. Leboh mata deka tindok lalu ngali ka diri dalam babas lalu tindok dia ga sida. Suah mega sida bejalai samalam-malam enda ngetu. Nemu ga sida bagi siang enggau malam laban sida ngasai ka siang hari bisi angat, lalu leboh malam iya jauh chelap, lalu samoa burong enggau utai bukai dalam kampong nadai bemunyi. Leboh sida bisi berasai angat burong pan richah bendar, nya meh tanda hari tawas jangka ati sida. Sakumbang sida ka bejalai suah bendar sida tetemu ka tebiang tingkah batu. Leboh sida enda tetengah ka nya lalu nguing ka pejalai sida kabukai. Suah bendar sida nyemerai ai bah, suah mega sida nikal, leboh ai enda ulih semerai. Suah mega sida merinsa chelap laban ujan, laban sida enda nemu ngaga dunju.

Sabulan-bulan nya sida udah lelang dalam kampong nyau hari siti sida tetemu ka batang kayu besai sakayu rebah melintang jalai, lalu ba endor nya bisi tampak panas mimit. Laban tulang sida nyau lembut, sida lalu ngetu dia gali, lalu tindok magang. Nyau kelama sida udah tindok, lalu datai Gerasi siko besai bendar gamal. Lama iya merening sida laban iya enda ngadang bisi anak mensia diau dalam kampong dia.

Diperening iya, peda iya samoa tujoh iko nya kurus magang-magang. Iya nadai runding deka makai sida, tang iya bisi ati sinu meda penusah gamal sida. Antu Gerasi lalu ngerak iya ke benama Mujong. Mujong tekenyit angkat, dani lalu manjong.

“Huu, uchu ! Nama gaga kita ditu ?” pia ko tanya Antu Gerasi.

“Hess, nama utai gaga, kami tu buta magang, enti nuan deka empa abis, empa lengis ka kami tu, nyamai agi mati ari idup merinsa bakatu,” pia ko Mujong nganu Antu Gerasi.

“U-u ! Ni tau dempa deh uchu. Enggai aku makai kita,” pia ko Antu Gerasi.

Antu Gerasi lalu mantai ka ubat ari kandi iya, lalu disua ka iya ngagai Mujong. “Tusu ubat tu ulih nuan,” ko iya nganu Mujong. “Ubat Batu Pala Kera tu,” ko iya.

Ati Mujong kakang bendar deka nusu ubat nya, ukai iya takut ka diri mati, tang iya takut ka ubat nya ngasoh iya merinsa udu agi ari kai udah ngelamatu.

“Anang nuan kakang,” ko Antu nya. “Enda aku ngayah ka nuan. Tentu ubat Batu Pala Kera nya tau ngerai ka nuan.”

“Nama guna ngerai ka aku ; empa nyah, lak ka aku mati,” ko Mujong. “Nadai aku kala ninga pala kera tau kai ubat.”

“Enti pala kera bendar, amat enda tau kai ubat, tang tu Batu Pala Kera, ubat enda buta,” ko Antu Gerasi.

Agi ga ati Mujong kakang. Balat agi ga Antu nya mesol ka iya nusu ubat pala kera. Nyau kelama baru Mujong nusu batu nya. Tekalanya deh mata iya lalu menchelak. Iya lalu meda gamal tuboh Antu Gerasi nya chelum, sereta bebulu lalu tau mega tuboh iya bebali mirah. Antu nya lalu nusoi gamal diri empu ngagai Mujong.

“Aku tu Antu Gerasi Bukit. Tuboh aku tau bebali mirah baka kain kasumba. Tuboh aku ke bebali mirah nya tiga kali sataun. Pengelama iya mirah sabulan dalam sakali idar. Leboh maia tuboh aku chelum nya maia aku nelap, leboh idar iya mirah baka kasumba nya maia aku mangah. Leboh maia nya idar aku selalu nebah nyawa malam hari demeram lalu manjong ngenakut ka samoa utai idup dalam dunya tu. Tandok tunggal aku nya tajam bendar, iko aku nya panjai ga melulor, tau dibelit ka aku ba pala ka labong. Siku aku belancham baka sangkoh, kukut aku begelong baka gelong taji sulat,” ko Antu.

Sereta udah abis jako Antu nya tadi, Mujong lalu manjong ensepi diri udah menchelak lalu tau meda utai. Iya manjong tujoh renggat. Nya alai laban penginggar panjong iya, bala sida menyadi kai agi tindok pan lalu ensugau tekenyit tedani.

“Oh, mati kitai tu !” pia ko jako sida.

“Enda mati !” pia ko saut Mujong. “Tu baru idup.”

Mujong lalu nyapi batu pala kera nya ngagai genap iko sida menyadi iya. Tekala nya mega samoa sida iya lalu sama nemchelak lalu lansik meda utai.

Leboh sida udah menchelak magang, ubat nya lalu diambi Gerasi nya pulai baru. Udah nya iya lalu lesap.

Nyadi sendi sida ti bediri dia bisi sibau raras sakayu ngeringak bebuah, benong mansau bendar. Sida lalu makai buah nya alah datai ka sida nyau kenyang bendar. Udah nya baru lalu mupok bajalai ninggal ka endor nya. Enda lama udah nya sida lalu datai ba kaki bukit sigi. Lalu ba kaki bukit nya sida tusah bendar kena balut semada, kena sepit kala enggau kena sengat embayar, enda tentu ulih alai sida bejalai. Buah sibau rarah maioh bendar ba menoa nya, tang genap pun buah nya dibelit ular kandawang enggau tedong, lalu enda ulih ambi sida.

Nyau kelama sida udah bejalai, alai sida lalu datai ba tengan bukit nya dia sida lalu bisi nemu lubang batu siti. Sida bemalam lalu tindok dia. Sida enda berani tama kedalam lubang batu, tang tindok diluar. Leboh belator deka tindok malam nya Mujong diasoh sida semak agi ngagai moa lubang laban iya biak agi, enda ngasoh iya tindok semak tisau babas. Leboh sida baru ka tegeram tindok dia Mujong bisi ninga utai bemunyi dalam lubang. Munyi orang ke ngansah besi enggau batu kasar. Mujong lalu angkat nelai Kilat aka tuai sida madah ka iya bisi ninga utai dalam lubang batu.

“Nyelai bendar utai bemunyi dalam lubang dinga aku, enda aku berani, tak tumboh asai bulu aku ninga utai munyi nya. Tak munyi orang ke ngansah besi ba batu kasar,” pia ko Mujong

“Eh, tindok meh, anang inggar agi, kini ka nuan agi angkat,” ko Kilat nyaut iya. Kilat pan ninga ga utai ke bemunyi tang iya enggai nampong jako Mujong, enggai ka sida takut. Mujong lalu gali baru, tang mata iya enggai tindok. Nyau lala udah nya baru utai nya nadai agi bemunyi, nya baru Mujong deka tindok.

Nasit bendar sida iya malam nya, laban utai ke empu lubang batu nya enda pansut. Enti utai nya pansut, nya baru sida iya bebadi bendar. Nyadi orang ke nguan lubang nya Antu Gerasi Gemalang Tanah. Kenu ko jerita, gamal Antu Gerasi Gemalang Tanah nya besai bendar ; tuboh iya bebulu baka duri maram, tandok iya bauh, iya ga tajam baka mata sangkoh. Pending iya ga luar, dilah iya panjai bendar tau dibelit ka iya ba pala. Pala iya belancham baka rintong, ngeli iya chelum baka arang. Taring iya dua iti beruit baka berayang lalu sama pansut ari rang. Nyadi munyi ke didinga Mujong nya tadi, nya meh munyi Antu Gerasi Gemalang Tanah ngansah taring enggau ngeli iya ba batu kasar.

Kabuah alai Antu Gerasi enda pansut malam nya laban iya agi nganti bulan perenama nyentok. Nyadi bulan di langit tiga malam agi baru iya peranama nyentok. Tambah mega Antu nya agi bisi utai dempa dalam lubang batu, laban anak bulan nyin kamari iya bulih bendar ngasu. Dua pagi dulu ari nya iya udah bisi nangkap anak mensia dua iko tesat dalam kampong enda jauh ari moa lubang batu ke alai iya diau. Nitih ka dalam jerita, suah bendar orang di menoa nya kenyau ari kalia udah lesap enda temu tunga pemati. Semadi nyau kelama iya, baru bisi manang tuai siko endang ngembuan engkerabun bisa bendar nya ke ulih ngenatai ka diri semak lubang batu, lalu suah meda Antu Gerasi Gemalang Tanah nya tama kedalam lubang ngema mensia ke udah ditangkap iya. Mensia nya dipeda manang dima antu nya tunsang. Nya mun orang di menoa nya nemu lubang batu siti nya sigi diwan Antu Gerasi Tanah ti endang mangah endang selalu ngasu anak mensia ka dempa iya.


05. GENTERAN – PENCHARAN

TUMU PAGI hari siti sida tujoh lalu angkat ari lubang batu, sida lalu bejalai ninggal ka lubang batu lalu ngiga bukit ti tinggi. Enda berapa lama iga udah nya sida lalu datai ba kaki bukit sigi. Sida lalu niki ka tuchong. Leboh sida datai di tuchong hari nyau lemai bendar, sida lalu bemalam dia. Malam nya sida ngambi daun kayu kai antap sida tindok. Malam nya sakali sida teguran, leboh sida udah jenak bendar tindok datai sawa siko kira bulih mesai kisar lalu ngelanggar sida ke ti tindok. Tang seninjik ular sawa nya enda ati ngayah ka sida. Udah bekau kena langgar sawa, sida lalu enggai agi tindok, laban ati agi geli. Leboh sida dani pagi siti sida lama nadai tentu meda utai laban ambun balat bendar pagi nya. Maia hari nyau tinggi ambun pan nadai agi, laban panas nyau angat nya baru sida ulih meda rampa menoa jauh ari nya.

Iya ti tuai ka sida menyadi lalu niki kayu, ninjau deka meda rampa menoa. Datai iya di puchok kayu lalu malik ka kiba, malik ka kanan, nadai ga meda rumah orang, tang samina bukit enggau kampong aja. Udah nya sida ke biak agi betangkan-tangkan niki tang sida enam iko nya nadai meda utai bukai semina meda bukit enggau kampong baka ke dipeda Kilat aka tuai sida nya tadi. Udah nya baru Mujong ga niki kara sakayu, kara nya jauh tinggi agi ari kayu bukai ke dia. Ari puchok kara nya iya tepeda ka umai orang sebelah ba kaki bukit nya dibaroh din “O,” ko Mujong, “Nama nyin tak baka umai ? Nyangka umai kini utai nyin ?” ko iya.

“Uji abas ulih kitai enti nuan bisi meda utai nyelai,” pia ko jako sida menyadi bukai enggau iya.

“Lak ka aku dulu ngabas,” pia ko Kilat tuai ka sida.

Nya-a, lalu nyau meh iya nurun datai iya di tengan bukit dia iya betemu enggau remaung ngenjing ngeringik ka ngeli malik ngagai iya. Takut meh ati iya meda nya lalu nikal, pulai baru ka bukit.

“Ee, jampat bendar nuan ?” pia ko sida bukai. “Nama dih, bisi nuan nemu umai ?”

“Hess,” ko saut iya, “Dini bisi nemu umai, bula Mujong ngumbai diri bisi meda umai. Kitai sama meh malik kia kai tadi, nadai ga kitai meda utai baka umai. Jauh bendar aku nurun ka baroh kin ka tadi, datai ba ai sungai di baroh din. Lapa deh aku, laban ke aus lalu ngirup ba tengkebok siti ari ili kaki wong,” ko iya.

Nyadi ati sida menyadi bukai enda tentu arap ninga iya nusoi diri, laban sida meda iya bangat enda lama iga, enda patut udah datai ba ai sungai di baroh din. Udah nya tiap iko sida bukai ngabas ngagai kaki bukit magang, semina Mujong enda enggau ngabas. Samoa sida nya tadi nadai tetemu ka umai, lalu pulai ka tuchong bukit nya baru. Meda sida enda tetemu ka umai, nya alai Mujong empu lalu nurun ngagai kaki bukit. Samoa sida menyadi enam iko nya tinggal di bukit nganti pemulai Mujong ke ngabas umai dipeda iya ari puchok kara. Nya bala menyadi iya enam iko nya agi tinggal di bukit, lalu naka nya jerita sida menyadi Mujong.

Leboh Mujong datai di baroh ba kaki bukit iya lalu rembus ba umai sebelah tak nempuak dia enda bedandang enggau orang. Iya lalu bejalai nengah umai nya. Nyau datai ba tisau serarai umai sapiak nyin dia iya meda pencharan rusa siti, tang iya enda nemu nama utai gamal nya. Dalam pencharan nya dipeda iya bisi buah pisang digantong orang dia. Buah pisang nya mansau bendar. Ati iya tetengok bendar meda buah pisang nya, iya pan lalu tama pancharan. Datai iya dalam nyin tak enda kakang lalu entun iya sikat buah pisang nya tadi : pintu pancharan pan lalu ingkas. Nama dih, leboh pintu udah ingkas lalu nadai jalai iya pansut. Suah bendar iya nguji nanggong pintu tang enda ulih, laban batu ke tating pintu nya bangat kelalu berat. Leboh iya nyau lelak iya pan lalu nudok ka diri, makai buah pisang laban perut iya lapar bendar.

Sahari-hari nya sida menyadi Mujong nganti iya pulai tang nadai datai. “Nama main Mujong tu lalu enda pulai. Kada enda diterekam remaung alai iya lalu enda datai,” pia ko jako sida menyadi iya. Dia meh sida irau ati ka iya, laban sida endang ngadang iya bisi utai nganu, ngadang iya nama enda diterekam jelu mangah, dibunoh munsoh. Nya alai mati meh iya ko ati sida menyadi ke nganti iya lalu enda pulai.

Nyadi leboh hari nyau ka lemai Antu Raya ka empu umai pan lalu nurun ari rumah iya ngabas umai lalu ngabas pencharan. Leboh iya datai ba semak pencharan iya meda pintu udah ingkas. Ati iya andal bendar, laban iya ngadang pencharan nya tentu bulih jelu. Antu lalu ngenegar ka pejalai diri, leboh iya udah datai semak pencharan dia iya meda bisi anak mensia siko dalam nyin.

“Ha ! Ha ! Nya iya ! Anang ! Endang mali lebu pencharan aku tu !” ko iya bejako kediri. Leboh Mujong ninga lalu meda pemesai gamal antu nya ke datai semak, iya lalu mengkasak sereta nyerarat nyabak balat bendar takut ka antu nya. Iya lalu ngangau ka bala menyadi, minta ambi sida, tang ni deh sida ninga kangau iya, sida ga jauh.

Enda begadai-gadai alai Antu Raya tama kedalam pencharan lalu nangkap Mujong, lalu dikandut iya enggau tanda sirat.

“Tu baru aku bulih uchu,” pia ko Antu Raya bejako kediri dalam ati iya din. Antu Raya lalu beguai-guai pulai ka rumah mai uchu iya nya tadi. Leboh iya datai di kaki tangga, iya lalu ngangau ka bini iya.

“Ui ! Indai Dom !” ko iya.

“Ooi !” Ko bini iya nyaut ari dalam rumah. “Nama utai dikangau ka nuan sulu ?” Ko iya nyaut.

“Ha ! Ha !” ko Antu Raya, “tu baru tua betuah.”

“Tuah nama nya ?” ko bini iya.

“Betuah meh, peda nuan pemanah utai ulih aku,” ko saut iya.

Ninga munyi nya bini iya lalu beguai-guai pansut, lalu ngambat iya ngagai pala tangga.

“Ha ! Ha !” ko Antu Raya, “tu baru tua bisi uchu.”

“Dini endor nuan bulih utai nya ?” ko bini iya nanya.

“Ulih aku, ulih aku nemu tama pencharan aku ba tisau umai,” ko saut Antu Raya

Bini iya lalu ketawa rakah-rakah sentai landai.

“Hah-hai-nyo ! Amat bidik meh nuan ti bakatu,” ko iya.

Udah nya Antu Raya lalu muka sintal tanda sirat ti kena iya ngandut Mujong. Bini Antu Raya lalu mai iya tama kebilik. Datai di bilik dia iya lalu meri uchu iya makai. Terubah Mujong geli ati makai laban nadai kala makai utai gamal nya, ukai utai ke masai dempa iya. Tang laban perut bangat kelalu lapar, kelalu keberuran, tak enda berasai utai nya nyamai enggau enda nyamai, endang manis magang disepi iya. Kenyang bendar iya makai leboh nya laban perut kelalu udah lapar.

Leboh Mujong udah badu makai dia iya lalu bejako enggau Antu Raya madah ka diri bisi menyadi enam iko, lalu sida nya agi tinggal di tuchong bukit enda bangat jauh iga ari endor nya.

“Nya alai aku deka bejalai lalu ngabas sida kin, nyangka sida agi bedau enda mindah ari nya,” ko iya.

“Anang nuan irau ka sida,” ko bini Antu Raya nganu iya, laban sida iya udah di iru Bunsu Gemalang Tanah kai uchu iya, lalu diau begulai enggau iya dalam lubang batu. Dalam lubang batu nyin din bisi rumah sabuah ke manah alai sida iya diau,” ko ini iya, bini Antu Raya.

“Kati alai nuan nemu dih ini ?” ko Mujong.

“Kati ko aku enda nemu deh uchu, aki nuan ga tau tilit di burit benda guchi, tau peda di tapa dada jari. Nya alai nuan anang mindah ari tu, lalu kai uchu kami dua aki nuan, lalu bempu pesaka reta kami dua,” pia ko ini bejako enggau iya.

Aki seduai ini Mujong nelap enggau iya ; nya alai iya pan betah ga diau dia, lalu nadai ati deka mindah. Semina siti aja kabuah alai iya tak suah dipeda bisi enda tentu lantang laban nadai diri sama bela enggau besulu. Suah bendar gamal iya dipeda tak silu-ilu merampau diau baka ke bisi utai dikenang. Tentu iya bisi ngenang kaban menyadi iya ke enda segulai sajalai enggau iya agi.

Nyadi rumah Antu Raya nya enda tentu jauh iga ari tebing ai, lalu ngelingi rumah nya maioh bendar macham kayu buah. Nyadi samoa buah dia tak selalu bebuah berari-ari nya ke ngelantang ka ati iya besahari-sahari. Enti enda ketagal nya tentu balat agi iya dipeda silu-ilu.


06. GENTERAN – BINTANG BANYAK

NYADI MALAM siti maia bulan perenama kembong, langit pan terang bendar malam nya laban bintang maioh bendar baka ke diara ; babas di dunya tu ngenjing bepandang gadong tampak laban pajar bulan.

Malam nya anak Bunsu Bintang Banyak ke apin lama udah ada, lalu diulur indai iya ari langit, ditepan ka iya ba remang burak siti mipau bendar. Nepan ba remang nya lah anak Bunsu Bitang banyak nurun begadai-gadai lalu terengkah ba umai Antu Raya.

Tumu pagi hari siti Antu Raya nurun ka umai, datai iya di umai, dia iya bisi ninga munyi nyawa sabak anak mit. Lalu disidi-sidi iya tunga munyi nyawa sabak, nyau kelama baru iya tetemu ka endor. Temu iya dalam madang padi ke bauh bendar. Peda iya dih tak anak mensia.

“O, o !” ko iya bejako kediri, “tu baru aku bulih uchu indu.”

Nyadi anak mit ke temu iya nya tadi indu, kira umor baru dua bulan. Nya-a, enda lama meh iya di umai laban iya beguai-guai naban ka uchu iya nya pulai ka rumah. Leboh Antu Raya nya baru datai ba menalan di kaki tangga, dia iya lalu ngangau ka bini iya.

“Ui, Ini, Digat ! Ni nuan bisi dia ? Peda nuan pemanah utai ulih aku pagi tu,” ko iya.

Bini iya lau nyengok ari moa enyawan. “Nama utai ulih nuan nya ?” ko iya nanya laki iya.

“Aku bulih uchu indu pagi tu,” ko iya nyaut bini iya. Udah nya iya lalu niki ka rumah, datai iya di rumah lalu disua ka iya uchu nya tadi ngagai bini iya. Bini iya lalu mai uchu nya tama kebilik, lalu digali ka iya ba atas talam mas, bantap ka tikai sulam enggau benang pirak.

Pagi siti baru seduai ngaga ka uchu nya nama. Apin seduai iya nyebut nama dulu seduai ngator asi tujoh tumpok dipanggai ka iya atas lumpong besi. Genap iti tumpok nya tadi endang udah diberi nama magang, lalu barang bagi ke dipantok manok nya mih nama iya. Udah nya Antu Raya lalu ngengkah ka manok sabong siko lalu ngasoh manok nya mantok asi. Manok nya lalu mantok tumpok siti ke dikumbai Dara Langit. Nya kabuah alai anak Bunsu Bintang Banyak nya lalu digaga ka nama Dara Langit. Dara Langit seduai Mujong sama-sama kai uchu Antu Raya. Naydi manok sabong nya tadi dikumbai manok pagah, lalu enda tau dibunoh awak ka iya mati tuai abis umor.

Nyadi Mujong seduai Dara Langit sama diambi Antu Raya kai uchu, tang seduai iya enda diikumbai diri menyadi. Antu Raya semina ngidup ka seduai iya aja nganti seduai tau ngidup ka diri empu. Nyadi leboh seduai sama udah besai tuai, Mujong pan nyau bujang raya ga ; Dara Langit pan nyau dara naka iya ga, dia Antu Raya pan lalu ngator seduai iya jadi diri melaki bini. Leboh seduai udah jadi, dia ini iya lalu meri Dara Langit tinchin pengajih sebentok. Tinchin nya endang lalu enda kala lengka ari jari tunjok jari iya berari-ari.

Lama udah nya, alai ini iya Antu Raya lalu ngasoh Dara langit ngambi tungkol tekala ka babas. Dara Langit pan lalu nurun ga ngambi tungkol tekala ; ukai nya baka ke nadai ga endang maioh bendar tekala ba menoa nya. Enda lama iga iya ngiga lalu bulih. Leboh iya pulai datai di rumah, dia ini iya pan lalu bejako. “Tabor ka tungkol tekala ti ulih nuan nya,” pia ko iya.

Nya-a, ninga ini iya ngasoh nabor, lalu ditabor ka iya ga tungkol tekala nya tadi. Tabor ka iya kulu, tabor ka iya kili, peda tak kemaia nya rumah sida lalu nyadi rumah panjai bulih lima puloh pintu. Iya ke endang rumah sida empu nyau nyadi tengah-tengah, laban rumah baru nya tadi tak nyadi lalu ngarong ka iya ari ulu, ari ili. Tang samoa rumah ti nyadi ari tungkol tekala nya tadi apin bisi mensia nguan. Nya alai rumah nya bedau puang. Dara Langit nanya ini iya, “kati alai tungkol tekala tau nyadi rumah deh ini ?” ko iya.

“Baduenda meh uchu, nuan ga bisi tinchin pengajih.” Ko saut ini. “Samoa utai dikedeka nuan tau nyadi tau datai magang.” Ko iya.

“Oh, pia dih ini. Enda aku nemu tinchin tu bangat ngemesai nya guna,” ko Dara Langit.

Tiga hari udah nya, alai ini iya ngasoh iya nabor ka tungkol tekala nya baru ga dalam rumah, di baroh rumah, di sadau, di bilik enggau di ruai. Bini Mujong lalu ngereja nitih ka asoh ini iya. Tungkol tekala nya ke laboh di ruai nyadi mensia lelaki, lalu iya ke laboh di bilik nyadi indu, laboh di sadau nyadi mayau, di tempuan nyadi ukoi. Samoa ke laboh di baroh rumah nyadi babi enggau manok.

Lelaki siko ba ruai sebelah, lalu indu siko dalam sapintu bilik. Tiap iko lelaki enggau indu nya lalu jadi enggau tangkup diri empu dalam bilik sapintu-sapintu nya. Babi enggau manok enggau samoa utai tupi bukai endang sama bisi tangkup magang.

Sida babi, sida manok, ukoi enggau mayau tak lalu nemu endor bilik orang kai empu sida iya. Samoa perngka reta kena idup sedia chukop magang ba tiap-tiap pintu sida. Tibang di sadau penoh magang laban padi, irun penoh magang ga laban beras. Samoa utai kena gawa bukai baka kapak enggau duku chukop magang dikena.

Mujong lalu nyadi Tuai Rumah sida iya. Iya mega megai ator enggau adat-adat dalam rumah nya, lalu ngulu ka orang maioh dalam samoa jalai pengidup. Mujong tu orang ke pintar sereta nelap ati, lalu bisi pengasih ka orang maioh.

Pun taun nya Mujong lalu bedua benih ka samoa anembiak iya dalam rumah nya. Leboh nyau maia deka ngengkah ka diri bumai, Mujong lalu ngator alai samoa anembiak iya. Sida bumai bedandang laban enda diasoh nempuak kadiri. Leboh sida ngengkah ka diri bumai, sida dibai Mujong mantap ngena burong rintai. Udah tembu rintai panggul nya baru sida nebas. Nyadi sida Mujong sabilik semina kadiri aki iya aja nebas. “Semina kediri aku pan nebas, umbas meh ka umai kitai,” pia ko jako iya.

Semina tiga hari aja iya nebas lalu tembu umai sida. Leboh seduai agi kediri semina seduai melaki bini aja, ka sahari aja iya nebas umbas ka umai seduai. Nyau datai soh maia nebang, nebang ga iya. Iya nebang enda bulih setak hari lalu tembu. Sida sarumah bukai nya sama nebang ga, sida nebang lama, enda baka enggi Antu Raya. Sida bukai ngereja pengawa baka enggi kitai maioh tu ga, semina aki Mujong nya jauh jampat ari orang bukai.

Nyadi leboh sida baru udah tembu nugal, dia dih aki iya bejako enggau Mujong seduai bini iya.

“Kami dua ini nuan deka tindok dulu ; kami dua tindok tiga bulan. Enti maia jagong udah tau dempa ila, nya baru kami dua dani, tang seduai ngerak kami dua. Enti seduai ngerak kami dia ila, tai mata kami dua tingkoh enggau pengelubak besi, nya baru kami dua ini nuan dani,” ko iya.

Antu Raya seduai bini iya pan lalu berengkah ga tindok. Seduai iya tindok di sadau ba panggau gantong seduai empu dia. Nyau datai ba maia mantun, mantun ga Mujong seduai bini iya. Sida sarumah pan bakanya ga, sama gawa magang. Nyau tau dempa jagong nya baru Mujong mangkong mata aki iya.

Nya-a, udah nya dani ga mih seduai, sama-sama dani. Ai endang udah sedia kena seduai empungas. Empungas mih seduai dia, bulih sapasu siko ai kena seduai sama masu moa. Enggi aki iya temaga kai sabut perunsut kena iya ngerindas ngeli enggau gusi. Enggi ini iya dawai kai sabut perunsut kena iya ngerindas ngeli enggau gusi muai tai ugi. Dia meh seduai gerut-gerut munyi ke ngukus buah nyiur sama ngerindas ngeli enggau gusi seduai ngena sabut perunsut.

Endang baka Antu Raya seduai bini iya, nama leboh maia antara buol pengawa bakanya mih seduai ita tindok berari-ari. Bakanya ga Mujong seduai bini iya enda tau enda ngerak seduai leboh maia buol pengawa nyau deka datai.

Nyadi lemai siti dia deh aki iya bejako enggau Mujong. “Kami dua ini nuan deka pulai ka tisau langit, laban ari nyin endang penatai kami dua ini nuan menya. Di tisi langit din aku bisi menyadi tujoh iko. Sida ini nuan pan tujoh iko ga diri menyadi,” pia ko jako aki iya enggau Mujong seduai bini iya.

Ninga jako aki iya melinya Mujong lalu nyaut. “Aku enda ngasoh seduai pulai diatu, pulai enda pulai pan seduai ini nyau jemah ila ga. Aku apin deka ditinggal ka seduai ini ; ukai aku nemu gawa. Kati ko kami dua ngidup ka diri. Nemu ga aku gawa, nyau jako tak enda tau salah, tang dini nya baka agi bisi seduai ini enggau begulai,” pia ko Mujong nyaut iya.

“Kami dua ini nuan enda tau enda pulai, tang seduai tinggal ditu anang tusah ati. Enti sema bisi penusah nama-nama, bisi munsoh datai nyerang kita kini, pangkong enggau guong besi kai digantong ba tulang perabong kitai din. Nama nya dipangkong, ninga kami ari tisau langit ; kamaia nya kami lalu datai ditu,” ko iya.

“Ninga pan kita enda meh datai lengkas, ukai nya semak ari nyin kitu,” ko Mujong nyaut.

“Ng, jampat kami datai, kami ga tau ngena karong kilat. Sakali engkesap ka mata kami lalu datai,” ko iya nyaut Mujong. Ninga jako iya tak keras munyi nya enda ga Mujong balat nan ka iya agi.

Tujoh hari udah bekau nya, nya baru aki seduai ini iya nurun lalu deka pulai ka tisau langit. Kejang seduai deka nurun ini bejako enggau bini Mujong. “Tinchin aku ba nuan nya taroh manah-manah enggai ka iya nyau,” ko iya.

“Au mih ini, dini aku deka nyerida ka iya ngapa,” ko saut bini Mujong.

Udah abis jako nya enggau ajar bukai seduai lalu mupok. Apin lama udah ngejang ka rumah, alai Antu Raya lalu ngangau ka ribut, kilat enggau ngitar. Ribut pan lalu mangka, kilat pan lalu bekakijap, ngitar mua pemalat, ujan lalu berembat. Udah nya seduai lalu masok ka baju kilat, tak sakejap mata lalu datai di tisau langit din. Udah seduai datai din, baju lalu dibuka seduai. Sereta udah dibuka seduai baju, kilat lalu ngijap sakali iya lalu terebai pulai baru ngagai menoa sida iya empu ngagai Nanga Lubang Ribut ke bepuput balat bekesoh. Ngagai Lubang Ujan ke nelian jampat laboh. Raja Kilat, Raja Ngitar enggau Raja Ujan sama-sama berumah ba antara langit enggau tanah.


07. GENTERAN – TINCHIN PENGAJIH

TIGA BULAN aki seduai ini iya udah pulai ka tisau langit, alai Mujong lalu mai anembiak iya pegi. Kabuah alai pegi laban deka matau menoa lalu ngiga pengeraja, ngiga tajau ngiga reta. Pengelama sida pegi semaia tiga bulan enti udah bisi utai ulih, enti apin bisi utai ulih lama ga agi ari nya. Nadai tentu letak semaia ga sida ka pegi nya tadi. Leboh pegi nya samoa lelaki sida sarumah enggau magang-magang, laban nadai kala meda menoa bukai. Nyadi sida ti pegi nya belayar ngena bandong sida Mujong sabuah digaga aki Antu Raya menya ; bandong nya benama Burong Undan.

Sakumbang laki sida pegi, samoa bini sida iya tinggal di rumah magang, lalu ngintu ruang bilik diri empu. Tujoh hari orang udah nurun pegi dia deh bini Mujong hari nya bisi mandi, tang seninjik ga iya ke mandi leboh nya nadai orang sereta. Leboh iya berunsut ngena kerupak pau dia iya ingat ka tinchin ba tunjok, iya lalu muka tinchin nya ari jari iya, laban takut ka iya laboh ka ai. Tinchin nya tadi lalu dipanggai ka datas batu ari ulu ai iya ke mandi. Udah iya tembu berunsut alai iya lalu nyepoh ka diri lalu nyemerai enda lama. Angkat deh, tinggal iya nyemerai datai ikan juak siko lalu nyuap tinchin ke ba atas batu nya tadi.

Nya-a, nyau mih tinchin nya ditelan ikan juak. Juak nya tadi lama bendar enggai tentu mindah selalu bemain kayo-kayo ba semak nya dia, ngibun iya ke mandi. Kejang iya deka pulai nya baru iya ingat ka tinchin datas batu. Mansang iya kia deka ngambi meda tinchin nya tak nadai agi datas batu. Lama iya ngiga, tang lalu nadai temu. Giga iya sebelah-belah nya dia, tilik iya dalam ai, sagam iya baroh batang, baroh batu, lalu nadai ga temu. Ati iya nyau bisi sangka ka tinchin nya udah telan ikan juak ke seruran kayo-kayo semak nya dia. Ati iya pan nyau mansang kesal ga, kesal betati ka tinchin pengajih nya tak nyau ngapa nadai kabuah-buah.

“Naka meh aku tak nyau tinchin nya,” ko iya bejako kadiri, “Nadai meh penyadi aku tu agi ila, tinchin aku nya ga udah nyau.”

Nya-a, pulai meh bini Mujong nya tadi mandi, pulai mai ati tussah, tusah ngenang tinchin iya udah nyau. Iya lalu nadai madah ngagai orang bukai, enda becherita ka diri udah nyau tinchin. Nya alai nadai ga meh orang nemu iya bisi nyau utai. Enda nemu baka enti iya tak bisi madah, nyangka bisi ga kini chara orang berunding ngiga, tang iya ga tak enda madah, tak nat ka diri nadai bemunyi.

Nyau dua tiga hari udah nya gamal iya pan mansang tusah ka tusah. Orang ngelala iya bisi utai ngasoh tusah, tang enda nemu kabuah. Iya nyau lembau makai. Tuboh iya pan nyau mansang berupai kurus. Samoa utai ke ditupi iya nadai tentu ditengkani iya agi. Babi enggau manok pama mimit laban sida tau ngair, tau nyungkor kediri empu, tang tudah mayau seduai ukoi ke lebih agi merinsa. Suah bendar sida nadai buya leka asi datai ke empat lima hari. Ukoi seduai mayau pen nyau sama kurus semina kulit ngelamun tulang agi tinggal.

Nyadi ukoi seduai mayau nya endang bai Antu Raya ari tisau langit nyin menya. Seduai sama-sama mereti ka jako mensia. Seduai pan sama landik bendar bejako ngena jako pangan diri. Seduai sama nemu tinchin bini Mujong udah nyau. Nyau kapuas seduai ke udah nat ka diri merinsa, seduai lalu mutus ka runding diri.

“Diau ditu pan tua mati ga, nya alai manah tua ngiga tinchin nya ngagai rumah Sultan Melayu,” ko seduai.

Nitih ka berita dinga seduai bisi orang madah ka ikan juak ti nelan tinchin nya udah rari ngagai menoa bukai. Leboh iya mansa menoa Sultan Melayu dia iya ulih orang berikan lalu dibeli Sultan laban iya meda ikan nya nyelai bendar gamal. Nadai kala orang di menoa nya bulih ikan bansa nya. Leboh kuki Sultan meruti perut ikan nya dia iya lalu tetemu ka tinchin dalam perut ikan. Seninjik bendar ga leboh nya bini Sultan bisi bediri dia ngemata ka kuki iya mela ikan. Bini Sultan lalu mai tinchin nya ngagai laki iya. Udah nya lalu ditaroh Sultan tegoh-tegoh dikunchi dalam peti kayu menyirih, endang gaga tukang ke pandai dalam menoa nya. Peti nya endang diengkah ba bilik siti ke ngimbai alai Sultan tindok. Enti malam hari tinchin nya dipeda liau-liau baka bara api. Enti siang hari nadai ga gamal iya baka batu bukai. Bilik nya tadi endang dijaga orang mata-mata tuboh tiga enda kala lina. Bilik nya dintu bala soldadu dua puloh satu enda kala lepa.

Tiga hari udah nya, alai mayau seduai ukoi lalu mupok ga bejalai. Lama bendar seduai bejalai baru datai ba nengeri Sultan Melayu. Seduai ke mansang nya tadi, suah tama dalam bandung orang ti bedagang ngagai nengeri sabengkah-sabengkah, lalu nepan dia. Suah mega seduai iya bedarat, lalu nengah kampong enggau rumah orang ba menoa ke diteresa seduai mansang. Suah bendar tudah ukoi niki rumah orang lalu dipalu orang leboh iya ngeranau periok asi orang ngiga utai dempa. Leboh seduai datai di nengeri Sultan, malam nya mayau lalu bulih pulut panggang siti ari rumah laut. Nyadi tudah ukoi tak nyau abis malui, abis mega belakang dipalu orang malam nya laban iya enda tau bejimat leboh niki rumah orang ngeranau periok asi.

Nyadi enggi mayau, pulut panggang ke ulih iya nya tadi enda dempa, tang diengkah iya ba semak moa lubang ba pun kayu sapun. Iya empu pan lalu ngipa dia. Leboh nyau deka dini hari datai tikus labang siko lalu makai pulut panggang. Mayau lalu merejok nerekam tikus.

“Anang munoh ! Anang munoh ! Anang munoh aku,” ko Tikus.

“Bunoh ! Endang pemakai aku !” ko Mayau.

“Anang !” ko Tikus, “Minta kasih.”

“Enti nuan deka nulong aku, enda meh aku munoh nuan,” pia ko Mayau.

“Barang iya mih,” ko Tikus, “lagi aku nulong nuan. Nama pengawa asoh nuan kereja aku ?” ko Tikus.

“Aku ngasoh nuan ngambi tinchin ba dalam burit peti Sultan Melayu,” ko Mayau nganu iya.

“Au mih,” ko Tikus. “Tang nuan sama engggau aku tama ka bilik. Din nuan dudok datas peti, lalu aku ngulih ka tinchin,” pia ko Tikus nyaut Mayau.

Mansang meh Tikus seduai Mayau ngagai rumah Sultan. Seduai datai di kaki tangga hari pan nyau tekerebak tawas. Kuki Sultan pan angkat ga menjadi ka api kena mandok ai angat.

“Anang guai tua ngambi tinchin nya malam tu,” pia ko Mayau. “Tengah malam pagila baru tua niki rumah Sultan baru.”

Nyadi sahari-hari nya tadi, Mayau lalu begulai enggau Tikus dalam lubang ba pun punggu sakayu. Lubang nya umbas bendar alai seduai begulai. Dia mih seduai iya begulai enda ngachau pangan, laban endang udah semaia enda tau ngayah ka pangan. Suah ga liur Mayau bentali nitik tetengok meda Tikus, tang enda ga berani ngachau pangan. Tikus pan nundok bendar ga ka Mayau sahari-harinya.

Leboh malam nyau lama udah tegayam petang, utai pan nadai ga agi engkeretik, Mayau lalu mai Tikus mupok ga bejalai baru ngagai rumah Sultan. Nya-a, pansut meh seduai ari lubang, lalu bejalai meh seduai begadai-gadai betunda-udi. Tikus dulu, Mayau nunda udi iya. Leboh jam kira maia tengah malam seduai pan lalu niki napat ka peti alai Sultan nyimpan Tinchin Pengajih bini Mujong. Mayau dudok atas peti, Tikus lalu kerit-kerit ngerit peti nya enggau ngeli iya. Nyau kelama udah nya dani deh Sultan ninga utai tak kerit-kerit.

“Aie, ado tikus sio bunyi kerit-kerit sio,” ko Sultan.

“Miau-yiau !” ko Mayau.

“Eh, ado pusa jua bunyi sio,” ko Sultan ga. “Kelat raso mato tu, tidor bahru lah kito.” Ko iya.

Nya-a, lalu tindok baru ga mih Sultan nya tadi. Tikus pan mupok baru ga nebok peti. Peti pan nyau ka kebus, alai Sultan pan dani kenyap, lalu ninga tikus agi kerus-kerus.

“Gilo jua tikus iyo. Apo barang dimakan nyo sio,” ko Sultan.

Ninga Sultan dani, Mayau lalu bemunyi baru ga, Tikus lalu ngetu ga ngerit peti. Ninga Mayau bisi bemunyi, Sultan lalu tindok baru. Enda lama udah nya peti pan kebus. Tikus lalu manggum tinchin lalu bai iya pansut. Mayau lalu merejok munyi ke ngagai Tikus. Iya lalu pansut nitih ka Tikus. Seduai tak enda kakang lalu terejun ka tanah. Datai di tanah nya baru Tikus meri tinchin ngagai Mayau.

Nyadi Ukoi samalam-malam nya nadai tindok selalu betiki ka rumah orang ngiga utai dempa. Nya mih, ukoi enda lama dinga meraung, enda lama dinga engkaing dipalu orang, laban iya nengkuran dapor Laut. Tawas hari nya baru Ukoi seduai Mayau betemu enggau pangan.

“O Unggal !” ko Mayau nanya Ukoi. “Nama utai ulih samalam tu ?”

“Ess, nama utai ulih, belakang aku tu abis malui dipalu Laut,” ko iya.

“Kati ko alai orang bangat ngasar nya enggau nuan ?” Kada enda nuan ngeruga dapor orang deh, unggal ? ko Mayau nanya iya.

“Nya udah tentu,” ko iya. “Ni nya ulih tat ka perut aku ga lapar asai ke dikeruk,” ko Ukoi.

“Nya amat,” pia ko Mayau, “tang kitai idup tu ukai tau nadai akal ga dih, nya nuan nadai nemu belalai. Laut baduenda deka meh sida malu nuan, nuan ga ngeregu dapor orang,” pia ko Mayau.

Tudah Ukoi nyau nadai saut agi, peda ai mata iya ngerenjing bakarenjoi beteritik, perut nyau genting kelalu lapar.

“Tinchin udah ulih aku,” ko Mayau. “Pagila tua mupok mulai ka diri, malam tu tua makai kenyang ditu, enggai ka enda dapat bejalai.”

“Barang ko nuan meh,” ko Ukoi. “Tambah ga aku enti sahari tu tua angkat, tentu enda dapat bejalai. Ni nyadi utai bangat ngelapar tu,” ko iya.

Nyadi malam nya sama begiga ga seduai. Mayau niki rumah Laut lalu naban ka tekang asi. Ukoi seninjik bendar iya malam nya, tetemu ka rumah dapor China kebun enda ingat tambit, bekau apai tuai China nya siko sakit chirit pedis perut malam nya. Tama meh Ukoi lalu nemu ikan tenggiri siko udah dipanggang segala tak lalu ditaban ka iya. Mayau udah iya makai asi, lalu nat ka diri gali ba selepak bandir kayu. Ukoi pan ngali ka diri ba baroh rumah Laut, nganti hari tawas.

Sereta tawas hari Ukoi pan lalu datai ga ngagai Mayau ke nganti iya ba pun kayu.

“Kati baka samalam tu dih unggal ?” pia ko Mayau.

“Ng, pama ga agi, enda ga perut asai ke sahari kamari,” ko Ukoi.

“Enti munyi nya mupok meh tua mulai ka diri saharitu,” ko Mayau.

“Nya mupok meh. Bah, kati ko tinchin sapa tua mai ?” ko Ukoi.

“Nya bai aku, ni nuan tau mai iya,” ko Mayau.

“Lak ka aku mai,” ko Ukoi. “Nuan enda tentu tau nyemerai.”

“Barang iya meh,” ko Mayau. “Tang nuan anang enda bejimat.”

“Anang irau,” ko Ukoi. “Aku enda kala cherida enggau utai.”

Mayau lalu nyurong ka tinchin ngagai Ukoi. Seduai pan lalu mupok. Tiga hari seduai udah bejalai endor datai ba batang ai siti. Enda kakang seduai lalu terejun ka ai, lalu nyemerai. Sakumbang seduai di puak ai, rebut pan bepuput deras agi, umbak ai mansang balat sibalat. Mayau seninjik bendar bisi tetemu ka papong batang, iya lalu belatoh ba nya.

Ukoi nyau kapol-kapol, kelah-kelah laban bakat, dia nyawa iya rangap-rangap, dilah nyau melulor. Enda lama sedekan, enda lama sedekan ga iya. Iya pan baru ngelui puak ai, alai tinchin lalu laboh ari nyawa iya.

Leboh seduai sama udah sangkai di tebing, Mayau lalu nanya Ukoi. “Ni tinchin enda nyau laban nuan ?” ko iya.

“Akai-rai,” ko Ukoi. “Nyau ka lemas aku laban bakat tadi, tak enda berasai, tinchin lalu laboh ari nyawa aku.”

“Ah deh, nya ga baka nuan. Nya mih alai aku kai enda ngasoh nuan mai tinchin, tang nuan ga keras. Tu baru tua mati, pulai pan nadai ga guna. Manah agi tua nikal ngagai rumah orang ti enda jauh ari tu,” ko Mayau.

Ukoi pan lalu enda berani bejako, laban iya takut ka Mayau nganu, tang ai mata iya ngenjing bakarenjoi laboh.

Nya-a, udah nya seduai lalu mupok ngagai rumah orang. Malam nya seduai begiga ka utai dempa. Ukoi pan suah bendar dipalu orang leboh iya nengkuran dapor. Nyadi Mayau bisi tetemu ka rumah dapor orang enda ingat tambit moa enyawan, iya lalu tama rumah, lalu ngebak ka pintu jemari lauk. Dalam jamari nya, iya nemu ikan duay siko udah diguring. Ikan nya tadi ditaban ka iya lalu diengkah iya ba tisau pasir. Iya empu lalu ningkap ka diri ba tisau pasir ke udah dikeruang iya. Enda lama udah nya peda datai Anak Baya Labang siko, lalu makai ikan duay nya tadi. Mayau lalu merejok deka nerekam Anak Baya ba pun pegu iya.

“Udah nuan ulih aku !” ko Mayau.

“Anang munoh aku !” ko anak Baya

“Bunoh !” ko Mayau. “Laban nuan ngambi bekal aku.”

“Anang munoh, minta kasih,” ko anak Baya.

“Enti nuan deka diasoh aku, enda meh aku muinoh nuan.” Pia ko Mayau.

“Au meh,” ko Baya. “Nama pengawa diasoh nuan ? Deka aku ngereja, amat ga nuan enda munoh aku.”

“Aku ngasoh nuan nyelam tinchin aku laboh enda jauh iga ari puak ai ba kaki lubok dulu dia,” pia ko Mayau.

“Nama kabuah aku enggai,” pia ko Baya. “Aram padah ka aku senentang lagi meh aku nyelam.”

Udah nya Baya lalu nyelam, nya baru iya tetemu ka tinchin nya ba senentang puak ai ari ili kaki lubok. Leboh iya udah pansut ari ai, iya lalu nyua ka tinchin ngagai Mayau. Gaga bendar meh ati tudah Mayau meda tinchin nya udah temu.

“Terima kasih unggal Baya,” ko Mayau.

“Au mih terima kasih ga ka nuan udah enda munoh aku.” Ko Baya.

Leboh hari nyau tawas nya baru Mayau seduai Ukoi betemu baru. Mayau lalu madah ngagai Ukoi, madah ka tinchin udah temu. Nya-a, gaga meh ati tudah Ukoi meda tinchin nya udah temu.

“Aram mih mupok tua,” ko Mayau, “tinchin awak ka aku mai.”

“Eh,” ko Ukoi, “anang nuan mai tinchin. Aku baru tau mai. Aku kering agi ari nuan.”

“Barang iya mih,” ko Mayau, “tang jimat-jimat ka nuan enggai ka tinchin nya nyau baru laban nuan.”

“Anang tusah,” pia ko Ukoi. “Tua nadai nyemerai ai besai agi.”

“Nya amat,” pia ko Mayau, “tang enggai ka nuan mai iya berayan sebelah babas.”

Mayau pan lalu nyua ka tinchin ngagai Ukoi. Seduai lalu mupok ga bejalai. Nyau ketiga hari seduai udah bejalai lalu datai ba kampong siti, babas dalam kampong nya tawas bendar, tang kayu maioh bendar besai, lalu jelu endang sigi maioh diau dia.

Leboh seduai datai ba tengah-tengah kampong, tak enda mukai-mukai lalu belanda meh jelu kijang siko mansa moa seduai. Ukoi pan lalu merejok lalu nyalak. Iya lalu belanda nitih ka kijang nya tadi. Dia mih kijang seduai Ukoi belanda bebelit sebelah-belah bukit. Nyau lama Ukoi pan lelak ga lalu enda tetitih ka kijang nya agi. Leboh iya udah badu nyalak nya baru iya ingat, lalu nemu tinchin nadai agi dalam nyawa iya. Ati iya tusah bendar laban enda nemu dini alai tinchin nya berayan.

Udah nya iya mulai ka diri ngagai batang jalai raya lalu nemu Mayau dudok di tisau jalai nganti pemulai iya ke nyalak kijang.

“Bah, kati alai nuan tak gendai-gendai pulai, ni kijang ulih nuan nyalak dih ?” pia ko Mayau.

“Akai-rai, lelak bendar aku nyalak, nadai endar nasit tua, suah bendar semak, deka ditangkap tak seruran rapas berari-ari. Nyau kalama, aku lalu tinggal laban iya, naka ga pemesai, nya ga pengemu kijang nya tadi.” Ko Ukoi.

“Gemu magang meh samoa jelu dalam babas ditu, dini orang bisi kurus baka tua. Aram mih mupok tua, anang ngerindang diri agi,” pia ko Mayau.

“Anang guai,” pia ko Ukoi. “Tinchin udah nyau, enda nemu alai iya berayan, laboh ari nyawa aku leboh aku nyalak tadi.”

“Nya baka nuan, nadai pendiau-endiau bendar barang utai salak. Tu baru tua mati,” pia ko Mayau.

Seduai pan lalu berengkah ngiga tinchin, nyau kalama nya baru Mayau tetemu ka tincin, tang iya enda madah ngagai Ukoi. “Aram tua pulai, manah agi tua mati di rumah ari mati dalam babas tu,” ko Mayau. Ati iya udah lantang, tang moa iya digaga iya baka ke mua tusah.

Tudah Ukoi semadi bendar pulai, lalu moa iya ngenjing jempok laban ai mata, laban iya ngadang diri tentu mati. Nya-a bejalai mih Mayau seduai Ukoi ari nya. Tiga hari baru datai di menoa diri empu. Leboh seduai datai di rumah hari pan nyau malam. Ukoi lalu tindok di ruai, tang Mayau tama ka bilik lalu nyimpan tinchin dalam ruas beras.

Leboh bini Mujong angkat berapi pagi nya iya ngebak ka sarang beras, lalu meda tinchin bisi dalam nyin. Iya pan lalu alit bendar ati, meda tinchin nya udah pulai baru, tang iya enda nemu baka ni ko jalai iya tau pulai ari orang ke udah naroh iya. Nya alai laban ati iya udah bisi lantang pagi nya iya berapi lalu nyangkong Mayau seduai Ukoi. Bakanya ga babi enggau manok lalu sama ditengkani iya magang. Ukoi balat bendar majak ka diri makai, laban iya bangat lapar, tang iya enda nemu kati alai bini Mujong deka meri sida makai pagi nya, laban iya enda nemu tinchin na udah temu. Nyau kalama udah nya, baru Mayau madah ngagai Ukoi, madah ka tinchin udah temu baru. Iya madah ka tinchin ti udah nyau dalam kampong udah temu, lalu dibai iya pulai lalu disimpan dalam sarang beras.

Udah nya baru Ukoi nemu diri alah bendar pemintar laban Mayau. “O, punggal ! Amat pintar meh nuan berunding ka utai, enti enda laban penemu nuan tentu tua mati,” ko Ukoi.

“Ukai nama agi,” pia ko Mayau. “Kitai ngereja utai enda tau enda ari runding magang-magang, indah kitai deka mati berunding deh pengawa kitai tau saru. Nya enggi nuan leboh tua ke di kampong Laut saleka asi nuan enda bulih. Nya ga baka belakang nuan agi bedau malui bekau palu orang. Dini dih bisi akal ti bakanya,” pia ko Mayau nganu Ukoi.

Kenyau ari nya samoa babi, manok enggau samoa utai ditupi bukai sama lantang magang, laban sida nadai kala lapar agi. Iya pan nyau chukop tiga bulan, sida Mujong pan pulai ga belayar, pulai pegi ari menoa tasik. Leboh pegi nya sida bulih bendar pengeraja, reta, menoa pan maioh ga ditengah sida. Tiga hari sida Mujong udah datai di rumah nya baru bini iya nusoi penusah diri di rumah pasal tinchin iya ke nyau. Iya lalu nusoi tinchinnya apin lama udah pulai, ditemu iya dalam sarang beras.

Dalam pun taun nya bini Mujong pan lalu betuboh bisi. Leboh datai ba maia udah chukop semilan bulan semilan hari dia iya lalu beranak. Anak iya lelaki, lalu digaga ka sida nama, dikumbai Enteran Temiang.


08. GENTERAN – KAYAU SULTAN

NYADI DIATU lengka ka aku enda lama kira sempa mansau pinang jerita sida Mujong menyanak, aku deka nusoi jerita Sultan Malayu. Nya alai pagi hari siti dia Sultan Malayu lalu muka peti sarang tinchin, laban iya deka ngena nya ngabang ngagai gawai besai, gawai selamat nikah anak Sultan lumor dua dalam nengeri nya. Tekenyit bendar mih ati iya meda tinchin nya nadai agi dia, tang iya meda peti nya udah kebus ditebok tikus.

“Oh,” ko ati iya,”tentu tinchin tu udah ditaban ka tikus.”. Udah nya Sultan lalu meli peti tikus maioh bendar kena iya ngulih ka tikus di menoa nya. Maioh bendar tikus ulih sida tang nadai ga tinchin ditemu ba samoa tikus ke ulih sida. Ati Sultan pan mansang tusah agi. Iya lalu ngempuru ka samoa orang ti bepenemu dalam menoa nya ngasoh sida nujum, ngiga tunga pengenyau tinchin nya. Nyau kelama baru orang bisi nemu nujum tunga tinchin nya, madah ka iya udah pulai baru ngagai bini Mujong empu. Amat dichuri Tikus seduai Mayau. Nya alai iya nadai temu ba tikus, laban iya dibai Mayau.

Leboh Sultan udah terang bendar ninga berita tinchin nya udah diambi orang pulai, ati iya pan lalu tusah. Udah nya lalu beguai-guai iya ngempuru ka bala soldadu, lalu angkat ngayau ngagai menoa sida Mujong di Tebing Ngerising Gigi, di Rantau Buau Berapi, nya nama menoa alai rumah sida Mujong.

Sultan enggau bala soldadu iya lalu belayar ngena bandong ngagai menoa sida Mujong. Leboh bala sida nuntong di pendai sida Mujong, hari pan baru deka tekerebak tawas. Sereta sida nuntong ba pendai sida lalu manjong. Leboh nya sida Mujong baru dani tindok, tekenyit bendar samoa sida sarumah madah ka munsoh deka ngalah ka sida. Sida lalu nurun, bala munsoh lalu niki ; datai ba tengan jalai pendai dia sida lalu besatup. Sida lalu bamok dia. Bepantap meh sida dia sapagi-pagi nya ngenjing nadai tentu talah ka pangan. Leboh hari nyau ka tengah-hari dia bala Mujong nyau lembut, nyau ka alah. Maioh bala Mujong luput dipantap munsoh enggau pedang, tang laban ti kebal ngeleda luput angkat ga baru bepantap. Di alun ka munsoh surut ga sida, nyau ka datai ba kaki tangga. Bala indu anembiak di rumah nyau bakaruong nyabak meda sida deka alah.

Nya-a, nya baru bini Mujong ingat ka guong besi digantong di tulang perabong. Beguai-guai mih iya niki ka sadau lalu mangkong guong nya tadi. Tak sakejap mata, lalu ninga dih aki sida iya Antu Raya di tisau langit din. Sereta ninga guong nya memunyi Antu Raya tujoh iko diri menyadi lalu masok ka baju kilat ; tekala nya sida lalu terebai lalu terengkah ba kaki tangga rumah sida Mujong di Tebing Ngerising Gigi di Rantau Buau Berapi. Leboh kaban Antu Raya datai dia, iya ke endang aki Mujong nya tadi, lalu niki ka rumah, datai iya di rumah, lalu ambi iya anak Mujong, lalu berap, bai iya ngagai orang ke bamok ba tengah menalan di kaki tangga.

“Anang nuan mai nya dih aki,” ko bini Mujong.

“Eh, kapa iya enda meda orang bamok dih, uchu. Lak ka iya belajar bepantap,” pia ko jako Antu Raya.

Leboh sida Antu Raya tujoh iko nya tadi udah datai, ati Mujong lalu bisi lantang. Antu Raya pan lalu bejako. “Ni nuan uchu aku Mujong, ti nuan lelak ngetu nuan bamok,” pia ko iya. “Awak ka kami ngelaban munsoh.”

Ninga jako aki iya munyi nya sida Mujong lalu nyurut ka diri. Antu Raya tujoh iko nya tadi lalu bepantap ngelaban soldadu Sultan. Peda kenu dia, pedang Antu Raya ngenjing bapi-api barang udah kena pantap lalu angus ga munsoh. Barang apin mati lalu nyau ga belanda rari mengkang naban ka api ngeringak menjadi ba tuboh sida. Enda lama udah nya bala Sultan lalu surut-surut, kelama agi mimit agi ga tuboh sida nan. Nyau kelama bisi enda kini empat lima iko bala Sultan agi tinggal, semina samoa sida ke endang ditunu enda angus, dipantap enda putus aja agi tinggal, pia samoa sida bukai, enti enda rari abis ga mati. Sida ke agi idup rari lalu mulai ka diri ngagai menoa sida empu. Sida tasah sebelah-belah menoa. Maioh ga sida parai keberuran nadai utai dempa di rantau jalai. Abis penusah nusah meh sida nya udah alah laban bala Antu Raya.


09. GENTERAN – BAJU BUOK

LEBOH UDAH alah bala Sultan Mayayu nya tadi, bala sida Antu Raya tujoh iko diri menyadi lalu mulai ka diri ngagai menoa sida di tisau langit. Udah ninga pengering sida Mujong dalam perang nya, samoa munsoh bukai nadai agi berani ngayau ngagai menoa sida.

Kadua taun udah nya bini Mujong lalu betuboh bisi baru, leboh iya beranak, iya lalu beranak ka anak lelaki siko da, lalu nama iya digaga ka sida Enteran Temali. Enteran Temiang seduai Enteran Temali sama sigat gamal. Seduai mansang besai, lalu mansang ngasi ka jako apai seduai indai, lalu nelap enggau orang, pendiau seduai pan lurus sereta likun. Samoa orang enggau anembiak bukai dalam menoa nya rindu ka seduai iya magang.

Leboh seduai iya nyau bujang raya, dia deh indai iya ngaga ka seduai baju buok, tanchut buok enggau selapok buok, sayap buok. Gamal tanchut, baju, selapok enggau sayap ti ditenun ari buok nya burak bendang-bendang baka taya, laban leboh iya baru tembu tenun suba iya disepoh enggau ai ambun. Lalu tulang jait iya kuning laban iya jait ngena benang mas. Selapok seduai dilekat ka indai seduai tujoh leka marik mas, nya ketanda anak raja endang bansa besai.

Leboh gari seduai nya udah tembu tenun nya baru seduai masok ka iya, lalu nguji ka diri terebai. Enda lama seduai terebai lalu pulai baru ; ati seduai andal bendar ensepi diri tau terebai. Tiga hari udah nya seduai bejako lalu madah ka diri deka pegi meda ka gaya gamal menoa bukai dalam dunya tu.

“Nya alai baka nuan apai, udah ga nuan pegi ngeliling dunya ngena bandong. Lulu kami dua deka pegi ngena jalai langit,” pia ko seduai madah ka runding ati diri.

Ninga munyi nya apai seduai pan lalu ngasoh ga. Tujoh hari udah nya, nya baru seduai angkat terebai. Seduai ke terebai nya tadi angkat ari tulang perabong. Kejang seduai deka angkat terebai, indai seduai dulu nyampi lalu nabor seduai enggau beras kuning.

Terebai deras meh seduai baka upas kesulai tandang, terebai lasit meh seduai ari sumpit betibong tulang. Tau nginda mih seduai baka burong bekia, lalu tau ngindang meh seduai baka burong lang.

Nya-a, nya baru seduai tak ngesai ka diri lalu angkat. Terebai meh seduai bapit-apit baka seit tandan pinang. Terebai berimbai-rimbai mih seduai baka penerebai burong lang. Terebai mih seduai katas kin nengah moahari, mansa remang, lalu manggai di pintu langit gadong. Datai seduai ba pintu langit gadong dia seduai lalu nekong pintu. Ninga pintu nya memunyi, orang ti nyaga pintu lalu muka pintu nya.

Nyadi pintu langit gadong bisi tujoh lapis, ba genap iti lapis pintu nya, dia bisi orang jaga. Samoa sida tujoh iko jaga pintu endang sedia enggau pedang enggau senapang, sangkoh enggau terabai endang nadai timpang. Sida endang diasoh Raja Bintang Tujoh jaga nyangka munsoh bisi datai ari dunya tu ngayau ka langit. Nyadi pintu nya, nya mih jalai ngagai langit gadong ketujoh serak ; laban nengeri Raja Bintang Tujoh nya ba langit gadong ketujoh serak. Antara pintu nya enggau rumah Raja Bintang Tujoh disapat enggau petang tegayam malam. Nyadi pemanjai endor ke petang nya tadi kira-kira seratus depa. Lepas petang kira saratus depa nya tampak baru. Penampak di menoa nya ukai jena-jena, enda ulih sebut enggau ujong mulut. Laban orang di menoa nya betenggau ka matahari tujoh iti. Gamal matahari dia burak biru, sereta beperenching.

Raja Bintang Tujoh nya meh mentua Mujong. Lalu Enteran Temiang seduai Enteran Temali nemuai ka langit nya nemuai ngagai sida aki enggau ini seduai iya empu. Leboh Enteran Temiang seduai Enteran Temali nengah jalai petang bemalin ka Raja Bulan. Lalu baju raja Bulan nya ngasoh jalai tampak bendar lalu ulih tengah seduai senentang endor petang. Seduai alit bendar ati meda gamal menoa di langit din laban jauh nyelai ari gamal dunya di tanah tu. Nyadi sereta lepas ari jalai raya ke petang nya tadi sida nengah jalai siti manah bendar, nama jalai nya Jalai Penguji. Jalai nya amat manah, tang maioh bendar ular bisa, kendawang, tedong, enggau sawa siko besai bendar, endang rangap-rangap baka ke deka nelan orang ke mansa endor nya. Kendawang enggau tedong nya pan dipeda mangah bendar, mata iya gilik-gilik tuboh ngenjing besengal, rekong ngenjing kembu, taring tak liau-liau baka bara api, iya ga tajam bendar baka mata taji. Ari nyawa ular sawa siko nya pansut daun api ngenjing belap-belap, pansut asap ngenjing begumpal lalu besebun ngisi menoa nya dia.

Leboh Enteran Temiang seduai Enteran Temali mansa menoa nya, dia orang ke nyadi malin seduai lalu niri ka jari. Lalu samoa ular nya lalu diau enda engkebut agi. Lepas sida ari ular nya tadi, sida lalu mansa padang siti enda berapa besai iga. Ba padang nya bisi ditanam ka orang maioh macham bunga nyelai. Bisi sabatang bunga nyelai bendar, lalu nya dikumbai orang bunga Makota Langit. Gamal bunga nya baka ketapu pala raja, lalu bisi jako ditulis orang dia, Bunga Langit.

Lepas padang nya, nya baru sida datai ba pagar siti digaga ari temaga. Di moa pintu pagar nya bisi orang lelaki tujoh iko ganggam bendar gamal, bediri dia. Samoa sida tujoh nya belanjang bulu kenyalang, begagong kulit beruang, jari kiba sida minching terabai buloh temiang, jari kanan sida ngenggam genteran sangkoh lunju, bisi ga sida megai gansai mata satu, bisi ga nangkin berangin pedang salin. Sida tujoh iko nya endang orang jaga moa pintu. Udah sida Enteran Temiang mansa orang jaga, sida pan lalu datai ba semak rumah raja.

Nyadi rumah raja nya manah bendar ari luar enggau ari dalam ngenjing terang laban bintang. Bintang dia maioh bendar macham, bisi biru, mirah, kuning, burak enggau bisi benyang mandang baka bara api. Udah sida mansa nya, sida lalu tama kedalam rumah raja. Leboh sida tama lalu datai indu siko pansut ngambat sida ngagai moa pintu.

Gamal indu nya nadai utai ngemanah nya, seduai tak asai ka nadai kala meda indu ngemanah nya gamal dalam dunya tu. Endang tak tegepang asai ati seduai meda iya. Lama Enteran Temiang seduai Enteran Temali ngetu enda menseput merening gamal iya. Raras tuboh tak nadai alai mantah, kulit iya ga burak kuning. Nambah ka nya lalu diumba enggau ngepan gaya Dayak baka ke disanggit ba tuboh iya.

Indu nya ngelalu ka seduai iya. Sida lalu dudok ba tikai peradani lapis sebelas, diantap enggau tikai benang mas. Apin lama iga sida udah datai dia, alai Raja Bulan ke nyadi malin sida lalu mulai ka diri. Enteran Temiang seduai Enteran Temali lalu tinggal dia bejako lalu berandau enggau orang dia. Orang pan nanya, seduai pan lalu nusoi penatai diri. Leboh aki seduai ini enggau kaban ibu udah ngelala seduai, nama agi dih pengaga enggau pengerindu ati samoa sida.

Nyadi pengelama seduai diau di langit din tujoh hari. Dalam lima hari keterubah dia aki seduai ngulu ka seduai bejalai lalu meda samoa endor ka nyelai di langit din. Terubah, iya mai sida meda ka lubang siti dikumbai Lubang Ujan. Udah nya baru sida ngagai Pendam Antu Gerasi Langit. Udah nya baru sida ngagai menoa Pengaroh, menoa nya dikumbai orang, tuchong maioh puchong moa bakalidak. Tinting maioh taring puting bakachukak.

Datai sida iya dia amat maioh ga pengaroh. Tandok siti ga tugong, batu siti ga tugong, puchong siti ga tugong, taring siti ga tugong. Nyadi ba tengah-tengah tugong nya bisi orang tuai siko, nyau buban bulu pala empa penuai iya. Ba apai tuai orang nya, alai seduai bulih pengaroh, ubat kering, ubat raja, ubat berani enggau ubat penampong seput. Apai tuai nya dikumbai orang Aki Pengaroh. Iya nemyadi Ini Andan. Udah bulih pengaroh nya baru seduai mulai ka diri ngagai rumah Raja Bintang Tujoh. Dia Raja Bintang madah ka samoa pengeraja diri ngagai seduai.

Nyadi ba bilik siti endang endor penudok anak Raja Bintang Tujoh dia bisi tujoh iti panggau gantong dilapis enggau tikai perandani sereta diantap enggau kain benang mas. Lalu ngapit nya bisi ga panggau gantong tiga iti endang penudok anak dara Raja Bintang Tiga. Leboh maia bulan lima dalam taun padi bansa Iban dia kaban anak dara Raja Bintang nya nurun ari kebong langit ngagai tisau langit. Leboh nya sida tau dipeda Anak Mensia ari dunya tu. Ari tisi langit nyin sida bejalai lubah-lubah pulai baru ngagai penudok sida ba kebong langit. Sakumbang sida mulai ka diri nya, dia bansa Iban ke bumai bechuan, beteladan ka sida dikena ngengkah ka diri nugal tauka betanam.


10. GENTERAN – MAYANG MAS

LEBOH UDAH chukop tujoh hari seduai diau di langit, dia seduai madah ka diri deka meda ka gaya gamal dunya tu ari baroh langit nyin.

Hari siti seduai nurun ari langit lalu terebai baru ensara ka remang enggau moahari. Seduai terebai dua kali meling dunya, samalam seduai iya tindok ba atas remang ke tebal siti enda jauh ari antara dunya luar enggau dunya dalam tu. Leboh seduai bemalam dia, seduai iya dijaga indu siko datai ari lapis langit kasatu. Nama indu nya dikumbai Endu Cheremin anak Raja langit Biru. Iya diau ba langit biru pengabis peda mata kitai ari baroh tu.

Pagi siti seduai pan lalu angkat ari nya, terebai dua kali bepusin meling dunya. Nyau kelama seduai udah terebai lalu tepeda ka padang siti besai bendar. Seduai lalu inggap dia. Ba padang nya seduai meda mensia bangat maioh bendar, nyau beribu-ribu orang bisi dia. Meda orang ngemaioh nya seduai lalu majak ka diri ngansak semak agi kia. Seduai lalu nanya : “Nama pengawa kita ditu ?” pia ko seduai.

“Kami tu deka niki nyiur nyin,” pia ko orang. Orang lalu nunjok ka jari ngagai pun nyiur. Seduai lalu malik tepeda ka nyiur sakayu gelai-gelai kediri-diri nadai utai nenjang, batang enggau puchok nyiur nya sama bemas-mas, sereta beperenching baka pajar mata panas.

“Nama utai diulih ka kita ba puchok nyiur nya ?” pia tanya seduai.

“Di puchok nyiur din bisi indu dara siko bajik bendar gamal. Nama iya dikumbai orang Kumang Mayang Nyiur Mas. Barang sapa tambi ka iya ari puchok nyiur, nya mih lalu bebini iya,” pia ko orang nya nyaut.

“Kati pemaioh orang udah nguji niki ?” pia ko seduai.

“Oh, maioh bendar orang udah nguji, tang samoa orang ke udah nguji mati magang dipantok ular bisa ke diau ba pun dan baroh,” ko orang nyaut.

Enteran Temiang seduai Enteran Temali lalu mansang ngagai pun nyiur, dia seduai meda maioh bendar bangkai orang ke udah laboh ari puchok nyiur. Tang samoa orang ke berani enda iboh ka pangan ti udah mati, barang apin niki lalu niki ga keran deka nguji ka diri empu. Nitih ka gamal pemaioh rupoh tugong tulang dia, ukai mimit-mimit mensia udah parai, tang bakanya ga sida besundor nguji diri niki.

Enteran Temiang lalu bejako. “Awak ka aku dulu nguji,” ko iya.

“Uji meh,” ko adi iya Enteran Temali. “Enti nuan tentu udah enda ulih ka iya, nya baru aku ga nguji,” pia ko iya.

Enteran Temiang pan lalu niki, niki mih iya katas kin. Nyiur nya ukai main-main peninggi, puchok iya dibalut remang. Nyiur nya tadi bebatang ka mas, bedan ka mas, bedaun ka mas, bemayang ka mas, lalu bunga iya pan mas mega. Leboh Enteran Temiang datai ba pun dan baroh, peda iya pansut ular sawa siko baka ka bulih mesai kisar, tak lalu deka nyuap iya. Enteran Temiang lalu nyintak pedang salin ke ditangkin iya ari langit. Iya lalu mantap pala sawa. Pala sawa nya pan lalu putus. Sereta udah putus siti, tumboh baru gap ala siti. Tujoh kali pala sawa nya beganti, lalu tujoh kali ga iya seruran mantap nya berari-ari, nya baru pala sawa nya nadai agi pansut. Udah nya sawa ngelantar lalu beguru merupoh laboh ka baroh.

Enteran Temiang niki katas agi. Leboh iya datai ba dan nyiur kedua ari baroh, dia ular kendawang lalu angkat ari sengkilong iya, deka mantok Enteran Temiang. Enteran Temiang lalu nyintak pedang lalu mantap rekong kendawang, lalu putus, pala kendawang lalu laboh ka baroh. Kendawang tu nyelai baka sawa nya tadi ga, iya tau tujoh kali beganti tumboh pala ari rekong ke udah putus. Tujoh kali ga Enteran Temiang mantap datai ke kendawang nya enda tumboh pala agi.

Leboh kendawang udah alah, Enteran Temiang lalu niki katas agi, lalu datai ba dan ketiga. Dia iya besatup enggau kuta duri tajam. Mar bendar iya nengah duri nya. Lama iya ngereda duri baru bisi jalai iya mansa. Duri nya ukai duri ngapa, endang duri besi. Angkat iya ari duri nya tadi lalu datai ba dan nyiur kempat lalu nya mih penudok ular tedong siko ke dikumbai orang Tedong Kenyali.

Dinga iya nyawa tedong nya seruran rengong-rengong berari-ari, lalu bejako enggau iya. “Alau mih, mansang mih nuan, enti nuan amat berani,” ko iya.

“Au mih, sepi asai nuan lagi,” ko Enteran Temiang.

Ular nya lalu ringat ninga jako Enteran Temiang, iya lalu nyembor ka rachun ari nyawa. Maioh bendar rachun kena tuboh Enteran Temiang, tang iya enda pedis laban iya bisi mai ubat batu penawar ular bisa. Udah nya Tedong lalu nayok ka pala diri deka mantok Enteran Temiang. Iya lalu nyimpong pala tedong enggau pedang. Rekong ular lalu putus. Tujoh kali ga pala ular nya tumboh baru, tang putus berari-ari dipantap Enteran Temiang. Tedong pan lalu mati, bangkai iya lalu merurut merupoh laboh ka baroh.

Sereta ular Tedong nya udah alah, Enteran Temiang lalu niki katas agi. Iya lalu datai ba ringkat dan nyiur kelima. Ba pun dan nya iya puas bendar nengah kuta digaga ari besi, bekukut, beruit baka berayang. Kuta besi nya bisi jari, tau nyengkau lalu nangkap barang orang ke mansa nya. Dia Enteran Temiang lama bendar lekat, bamok ngelaban jari kuta besi. Enti iya enda bangat kebal, enda iya ulih ngelapas ka diri ari nya. Jari kuta besi nya tau ngeremok kulit kitai, ruit kukut iya tau lekat ba isi kitai, udah nya rintas kulit laban kitai mengkasak, lalu rumbak ga isi gulai enggau kulit. Lama bendar Enteran Temiang ngelaban jari nya baru jari nya alah, lalu putus dipungga iya ngena pedang salin.

Udah lepas nya mupok baru ga iya niki katas agi. Dia iya bak dan nyiur kenam, nya baru iya besatup enggau naga bepala tujoh igi, lalu bisi lengan empat belas iti, enggau kaki empat belas iti mega. Genap igi pala naga nya tadi bisi tandok ke tajam sereta beruit baka mata gansai. Nyawa naga nya seruran nyembor ka daun api enggau asap berari-ari. Api enggau asap nya bechampor enggau rachun tau munoh samoa munsoh ke ngelaban iya.

“Aku enda takut ka nuan,” pia ko Enteran Temiang.

“Aku pan enda ga takut,” pia ko Naga. “Berani bendar nuan. Kati nuan enda sayau ka nyawa diri ?” ko Naga.

“Ee, nuan Naga, nuan enda nemu aku,” ko Enteran Temiang. “Pedang aku tu mesti mandi darah nuan.”

Ninga jako Enteran Temiang munyi nya lalu pemadu pemedis mih ati Naga nya. Mata iya nyau mirah, liur iya ngenjing entali nitik, ngeli dikerising ka iya. Enteran Temiang mansang lalu nyintak pedang iya. Naga lalu ngering ka tuboh diri, tisik iya diasoh iya rapit ngempit tuboh awak ka enda masok pantap enggau pedang. Udah nya iya miau ka lengan lalu merangap ka nyawa deka nyuap lalu ngunyah Enteran Temiang. Enteran Temiang ngansak semak lalu mungga rekong Naga enggau pedang iya. Ensepi diri udah bakal bakanya, iya lalu balat agi ngeransi ringat. Tang Enteran Temiang majak mantap semantap. Nyau kelama udah nya baru Naga nya alah lalu mati. Bangkai iya laboh ka tanah. Orang ke di baroh begau enggau panjong-panjong meda Naga nya udah mati.

“Menang Enteran Temiang. Iya mih nyadi Raja kitai,” pia ko jako panjong orang maioh di baroh.

Nyadi bangkai Naga ke laboh nya tadi lalu mau manjut bebali nyadi api. Abis bangkai iya angus laban api, asap iya lalu bebali nyadi moahari ke chelum bendar, ngenjing baka kain kanggan.

Enteran Temiang lalu niki katas agi ngagai dan ketujoh, dia iya lalu meda indu dara siko dudok atas panggau mas. Nyadi ngelingi panggau gantong iya nya dilagu enggau mayang enggau bunga nyiur ngenjing bemas-mas magang-magang. Leboh Enteran Temiang datai dia, iya lalu meda gamal indu nya nadai utai ngemanah-manah nya, tak asai ke nadai kala iya meda indu ngemajik nya gamal dalam dunya tu. Dia mih iya endang tak tegepang asai ati meda iya. Lama Enteran Temiang ngetu enda menseput meda raras tuboh indu nadai alai mantah, sereta kulit iya pan ngenjing burak kuning. Diumba mega enggau ngepan baka ke disanggit ba tuboh iya.

Peda sanggul baka simpul
Sayap lang terebang.
Tisir pirak jembak-jembak
Baka engkerenjak tiang empang.
Rawai ngena rintai
Melit karigai rusok marang
Sumping pending manah kuning
Perenching tampak mandang.
Pampai lempai-lempai
Manggai di landai bau nuking.
Tumpa mua pengena chukop pasang.
Lampit ngena belit
Baka tambit pintu belulang.
Kain bebuah mua pemanah
Ke bebuah nadai lapang.
Kungkong rekong lepong-lepong
Besengkilong maioh bekumbang.
Ngepan chukop raban nadai timpang.

“Kada enda nya mih anak Mayang Nyiur Mas,” ko Enteran Temiang berunding dalam ati diri. Udah nya iya lalu ngansak semak agi ngagai indu nya, lalu meremi ka pala diri lalu bejako, “Sapa nama nuan ?” ko iya.

“Nama aku Bunsu Mayang Nyiur Mas,” ko indu nya nyaut. “Sapa nuan deh ?” pia ko indu nya nanya Enteran Temiang.

“Aku Enteran Temiang, uchu Raja Bintang Tujoh. Apai aku Mujong, uchu iru Raja Antu Raya. Nya alai samoa mensia ari dunya tu ngagai tisau langit lalu katas kin ngabis ka tujoh serak langit endang kaban peturun kami magang,” pia ko jako saut Enteran Temiang.

Puchok Nyiur nya tinggi bendar nyentok ba remang datas din. Puchok iya endang enda dipeda ari baroh tu. Semina perenching pansut ari puchok iya bisi dipeda. Lama bendar Enteran Temiang datas din laban indu nya lama enggai nurun. Iya lembau nurun ninggal ka pemanah penudok iya datai din. Iya dudok ba tikai peradani lapis sebelas, iya dudok ba tikai lampit disulam ngena benang mas, dikumbai orang mas puji di langit lati gentilang remang.

Orang di baroh irau bendar ati meda Enteran Temiang lalu lalu nadai nurun. Bisi sida ngumbai iya mati leboh belaban enggau Naga. Bisi sida sekeda ngumbai iya endang apin sempat nurun agi ngulih ka indu nya.

“Aku datai ditu endang deka ngambi nuan ka bini, endang deka jadi enggau nuan,” pia ko Enteran Temiang.

Indu nya lalu nyaut madah ka diri deka jadi enggau iya. Seduai pan lalu nurun. Datai seduai iya di baroh din, samoa orang maioh begau, datai kia ka magang deka meda ka gamal indu nya. Samoa orang maioh pan gaga meda Enteran Temiang udah pulai ari puchok nyiur lalu bulih bini indu ka bajik bendar.

Udah nya orang maioh lalu sama pulai ngagai menoa diri. Leboh orang udah pulai, Enteran Temiang lalu ngajih ka rumah sabuah ke manah bendar, lalu nyadi bediri di tengah-tengah padang dia. Sida tiga Enteran Temiang seduai bini iya enggau Enteran Temali lalu diau ba rumah nya. Dalam rumah nya lalu bisi sikap enggau samoa keresa, perengka kena idup. Samoa keresa dia endang chukop bendar pemanah sabaka enggau gaya perengka ke dikena raja.

Leboh sida nyau ka tindok malam nya datai ular sawa siko besai bendar baka ka bulih mesai kisar, lalu ngelanggar sida ke tindok. Enteran Temiang lalu mantap rekong sawa enggau pedang iya lalu putus. Leboh rekong ular udah putus lalu tumboh gap ala ari iko, lalu dipantap iya ga. Tujoh kali pala ular nya tumboh ari iko ari pala beganti-ganti, tang putus berari-ari dipantap Enteran Temiang.

Nyau kadua malam datai ga kendawang, katiga malam datai ga tedong, kempat malam datai ga naga. Sawa, kendawang, enggau tedong enda berapa lama iya ngelaban, tang naga nya lama iya ngelaban baru naga alah. Sawa, tedong enggau kendawang sabaka bendar gamal enggau sida ke dibunoh iya dipuchok nyiur leboh iya ngambi Mayang Mas. Leboh samoa sida nya tadi udah mati, tuboh sida bebali nyadi ambun, lalu tuboh naga bebali nyadi api ke mau lalu niki ka langit kin. Datai iya di langit lalu tama ngagai matahari. Tiga hari udah bisi utai nyelai nyadi. Ujan bangat bendar laboh ari langit. Leboh hari ke ujan nya panas bisa bendar. Ai ujan nya tadi ukai chiru baka selama tang iya tak darah magang, lalu iya mirah bendar ngenjing betekang-tekang laboh ari langit. Pengelama ujan nya tiga hari tiga malam. Sungai enggau batang ai lalu bah. Nyelai bendar gamal dunya leboh maia nya samoa babas enggau tanah nyau mirah dibalut darah. Samoa mensia merinsa bendar nadai ai irup.

Meda utai bakanya Enteran Temiang lalu pansut ari rumah, iya lalu nengkadah ka langit lalu ngangau ka aki iya Raja Bintang Tujoh di langit din ngasoh aki iya muka kunchi ujan ai chiru ngambi ka ujan laboh lalu nuchi dunya tu baru. Udah nya samoa mensia dalam dunya tu lantang ga, laban sida bisi ai irup.

Lantang bendar sida Enteran Temiang seduai bini iya enggau menyadi iya diau ba rumah nya. Samoa utai chukop magang. Sida nadai gawa, tang utai datai ari ajih magang-magang.


11. GENTERAN – KEMELANG SUMPAH

SABULAN NANDAN di langit, sataun nampun di bukit sida tiga uah diau dia, dia dih Enteran Temali madah ka diri deka terebai ngeliling dunya tu. Kabuah iya deka terebai deka ngiga anak Raja ke manah gamal tau ambi iya ka bini. Apin iya terebai sida dulu nanam kayu kemelang sumpah sakayu ba semak kaki tangga rumah sida. Kayu nya dikumbai sida iya Kayu Semaia. Nya alai nama macham penusah bisi nyadi ba sida siko-siko, kayu kemelang sumpah nya tau meri tanda. Tanda tau dipadah ka kayu nya, enti penusah mati bisi datai, daun kayu nya layu, ti telih, batang iya bedarah, ti nyamai diau daun iya lebat lalu bebunga.

Dalam tiga malam sakumbang apin iya terebai, iya ngintai ka pengelantang. Tiga malam tiga hari iya dulu mandi enggau ai pengaroh. Sereta tumboh matapanas pagi kempat iya pan lalu angkat terebai. Terebai mih iya katas kin mensara ka moahari enggau remang. Iya terebai ngagai empat sukut dunya, lalu meling dunya dua kali. Kedua kali iya meling dunya leboh iya terebai nengah adap punchak dunya muak ka atas dia iya tepeda ka padang siti besai bendar, lalu ba tengah-tengah padang nya bisi rumah sabuah panjai bendar.

“Manah aku ngetu dia,” pia ko runding ati iya din. Iya pan lalu ngemaroh ka penerebai diri, lalu inggap ba padang nya.

Datai iya ba padang nya dia iya lalu niki rumah panjai sabuah, kira saratus pintu. Enteran Temali lalu niki ka rumah, datai dalam rumah lama bendar iya ngenong meda pemaioh tulang mensia sebelah ruai enggau sebelah panggau nya dia. Iya lalu bejalai niti rumah ka setak kin tang nadai nemu mensia agi idup. Udah nya iya lalu bejalai baru ngagai tengah rumah, dia iya bisi ninga orang bemunyi di bilik. Ba moa pintu penama ngagai bilik dia iya bisi meda ketapu siti baka ketapu raja. Ketapu nya ujok benang mas.

“Kada enda tu rumah raja, lalu tu mega bilik raja,” pia ko runding ati iya din.

Udah nya iya deka tama ka bilik, pintu amat ditambit, tang leboh iya megai pintu, pintu nya lalu ngebak ka diri empu. Iya lalu tama, datai iya di bilik iya meda indu siko pansut ari benda guchi sigi ke besai bendar. Terubah indu nya baru meda iya takut lalu deka rari.

“Anang takut,” ko iya. “Aku enda munoh nuan, aku datai deka ngidup ka nuan, deka ngelepas ka menoa kita ari jari munsoh.”

Ninga munyi nya indu lalu nitih ka jako Enteran Temali. Udah nya seduai lalu jadi diri melaki bini.

Nyadi leboh Enteran Temali baru meda pemaioh rangkah tulang mensia udah matidalam rumah nya, iya ngumbai menoa nya udah kena serang munsoh ari dunya tu. Iya mega enda nemu orang di menoa nya mati laban burong Geruna datai ari langit nyin.

Nyau kelama udah nya baru iya nanya ngagai bini iya. Udah ninga cherita ditusoi bini iya nya baru iya empu nemu. Tujoh hari udah nya Enteran Temali lalu berengkah nanam pisang. Iya nanam pisang nya leboh malam hari. Leboh samoa pisang udah besai magang nya baru iya ngambi batang pisang digaga ka kuta. Leboh kuta nya udah tembu, iya lalu pansut ka tanju. Burong Geruna nilik ari langit lalu tepeda ka mensia bisi bediri di tanju. Burong Geruna lalu terebai ari langit mansang ngagai Enteran Temali. Sida burong Geruna nya bisi tujoh iko diri menyadi, tang iya ke tuai dulu nurun.

Terebai mih burong Geruna nya ari langit tak ngenjing gu-gu munyi tiup sayap empa penginggar. Sereta datai iya dia tak enda kakang lalu dibintih iya kuta. Tada iya lalu lekat ba kuta, Enteran Temali lalu ngerejang iya ngena sangkoh. Burong Geruna nya lalu parai dia. Nya mih sida apai indai iya nganti iya pulai, tang lalu nadai ga pulai. “Nama kabuah iya tu tak lalu enda pulai ?” pia ko jako apai iya. Meda iya nadai pulai, apai iya lalu ngasoh anak iya ke lumor dua ga nurun.

Iya lalu terebai, dinga ngenjing berauh langit sapiak laban kebab sayap iya. Leboh iya datai dia, iya lalu enda kakang lalu mintih kuta nya. Tada iya lalu lekat, leboh nya Enteran Temali lalu ngerejang iya ngena sangkoh; burong nya pan lalu mati dia. Nurun ga menyadi iya ke lumor tiga, lumor empat, lumor lima enggau iya ke lumor enam lalu sama nadai terumpang ka kuta pisang, tada sida iya sama lekat, sida pan mati magang direjang Enteran Temali ngena sangkoh. Nya-a, udah nya semina siko aia iya ti bunsu ka sida nya agi tinggal di langit din. Meda sida enam nya tak sama nadai pulai, alai apai iya lalu ngadang sida nya mati magang.

Meda bakanya iya ti bunsu sida menyadi madah ka diri deka nurun, iya ke pemadu kering. Kejang iya deka terebai dia apai iya bejako enggau anak iya. “Atau anak mensia bai nuan pulai kai aku ila anak,” ko apai iya bejako enggau iya.

“Anang tusah nuan apai, bisi atau anak mensia bai aku ka nuan ila,” pia ko saut anak iya nya tadi. Abis jako nya, iya lalu terebai. Dinga tempap sayap iya ngenjing bedimbap munyi gu-u bakat. Peda kebu bulu iya ngenjing sabubu baka ujan laboh berembat.

Enteran Temali ninga utai bangat nginggar nya lalu ngadang. Enda lama udah nya alai Geruna pan lalu mintih kuta pisang, kuta nya lalu terumpang, iya lalu mintih Enteran Temali. Tada Geruna terengkah ba tuboh Enteran Temali, sangkoh iya pan terengkah ba rekong burong Geruna. Tada Geruna lekat ba Enteran temali, sangkoh iya mengkang ba rekong geruna. Seduai iya lalu sama sereta bebital lalu rebah belah rutan, lalu sama sereta mati dia.

Apai burong Geruna di langit din seruran nganti anak iya pulai mai atau anak mensia, tang lalu nadai pulai. Ati apai iya pan irau bendar, lalu ngadang anak bunsu nya udah parai baka sida bukai ti tuai agi.

Nyadi pagi hari siti bini Enteran temiang lalu pansut ari rumah sida iya, lalu malik ngagai kayu semaia ke ditanam sida ba semak kaki tangga. Iya lalu tepeda ka kayu nya selambar pan nadai ga agi daun tak abis gugor. Meda kayu nya bakanya, iya lalu beguai-guai belanda madah ka laki iya.

“Bisi penusah Enteran Temali di menoa orang, tentu iya udah parai. Peda nuan kayu semaia kitai nyin tak nadai daun agi.”

Enteran temiang malik lalu meda kayu nya amat nadai daun agi. Kamaia nya seduai lalu besikap terebai. Seduai terebai mensara ka remang enggau moahari di langit din. Seduai terebai deras ari upas kesulai tandang, terebai lasit meh seduai ari sumpit betibong tulang. Nyau nginda meh seduai baka burong bekia, nyau ngindang baka burong lang.

Seduai ke terebai nya tadi sama-sama ngena baju kilat. Baju nya ulih Enteran Temiang ba aki iya Raja Bintang Tujoh di langit din suba. Enda bulih sakejap mata udah Enteran Temiang seduai bini iya terebai, alai seduai lalu datai ba rumah ke alai Enteran Temali mati belaban enggau burong Geruna. Leboh seduai datai dia, seduai lalu niki, dia seduai meda bangkai Enteran Temali seduai burong Geruna sama berimbai-rimbai ba sendi kuta batang pisang. Seduai pan sama nyabak. Ninga orang bisi nyabak alai bini Enteran Temali lalu pansut ari bilik.

“Ari ni penatai seduai ?” ko iya nanya seduai.

“Aku tu Enteran Temiang menyadi Enteran Temali, lalu indu ke enggau aku nya bini aku,” pia ko saut iya.

Ninga saut iya munyi nya, nya baru ati bini Enteran Temali bisi lantang mimit. Udah nya bini Enteran temiang lalu ngunsut Enteran Temali enggau ubat penampong seput, ke ulih sida ari langit dulu suba ba rumah Aki Pengaroh menyadi Ini Andan. Udah bekau unsut iya enggau ubat nya tadi, dia deh Enteran Temali lalu bisi seput pulai idup baru.

“Akai-rai,” ko iya, “tak jenak bendar aku tindok. Aku ga lalu bemimpi.”

“Nama mimpi nuan ?” ko Enteran Temiang.

“Mimpi asai ke bejalai lalu rembus ba nengeri siti manah bendar, tang aku apin datai ba isi nengeri semina udah datai ba puting jamban siti ke panjai bendar, dia aku lalu tedani,” ko Enteran Temali.

“Eh,” ko bini iya. “Dini nuan bisi tindok, nuan ga mati, nama nuan enda ingat ka diri belaban enggau burong Geruna ?”

“Enda aku ingat ka nya. Nadai aku belaban enggau Geruna,” ko iya.

“Nama tu Enteran Temiang seduai bini iya datai ditu ngabas penusah tua,” pia ko bini iya.

Nya baru Enteran Temali nemu diri amat udah mati. Iya pan nyau pulai gerai baru, suman baka selama.


12. GENTERAN – TUNGKAT PENGINGAT

TUJOH HARI udah nya baru sida empat sama terebai. Terebai mih sida empat bapit-apit baka sit tandan pinang. Terebai berimbai-rimbai mih sida empat baka penerebai burong lang.

Sida lalu mulai ka diri ngagai rumah ke alai Enteran Temiang seduai bini iya diau. Tiga bulan sia diau dia, baru sida mulai ka diri ngagai rumah apai indai sida iya empu di Tebing Ngerising Gigi, Rantau Buau Berapi. Leboh sida datai di rumah, nama dih, pemadu pengaga mih ati apai seduai indai meda seduai sama-sama pulai lalu bulih bini. Apai seduai indai sida lalu nanya ka endor sida diau ngelamatu udah.

Seduai lalu nusoi tunga pejalai diri, endor ke bulih bini enggau samoa jerita bukai. Udah nya baru apai bejako enggau seduai ;

“Manah mih nya anak, seduai udah pegi, udah bejalai meda menoa orang; seduai maioh utai udah dikereja, maioh utai udah disepi. Mati, seduai bisi ensepi, munsoh pan maioh ga udah alah. Nya alai diatu seduai udah pulai datai ba menoa kitai empu baru. Kala aku agi idup, agi begulai sajalai enggau kita, aku enggai enda mekal kita enggau adat, ngembar kita enggau pengingat. Aku enggai enda nudong kita enggau seraung, maju kita enggau bulu. Aku enggai enda ngiring kita enggau pengering lalu nyangkai ka seduai ngena penemu tuai. Aku enggai enda nenggau kita enggau senulau api kelita, aku enggai enda manchar kita ngena pijar api lampu piga. Nya alai enti kita udah ditenggau, dilalau, udah ditungkat aku, tampak mih kita mandang dunya, kering mih kita nyaga menoa, lalu ngiring samoa bansa nyadi tuai megai orang.”

“Seduai mih endang disadang aku berumpang agang berumpang batang, matak bala ngadu ka penegap enggau pengukoh menoa. Nya alai seduai ti baka tali anang tendor, ti baka kayu anang lentur.”

“Aku enggai enda mekal seduai, ukai enggau asi enggau ai laban utai nya ulih giga seduai empu kadiri, nama tulang kering enggau ati deka ngulih, tentu ulih asi enggau ai. Tang aku enggai enda mekal kita enggau ajar jalai adat tuai enggau basa bansa diri empu. Aku enggai ka seduai bengat kelalu buta enda nemu adat enggau basa ke endang dipegai kitai ari jeman dulu kalia alah datai ka saharitu.”

“Nya alai, enti seduai tindok anang enda bepanggal ka batang kayu adat. Enti seduai bejalai anang enda betungkat ka lamba kayu pengingat. Enti seduai bejalai malam anang enda betenggau ka senulau api sempekat. Enti seduai bejalai siang, anang enda bediri ba tanah entap. Enti seduai niki anang enda niti tangga kayu pengeliat. Anang enda bepegai ba lalau perasau buloh penyimat. Enti seduai bejako anang neresu ka diri enggau ka tesebut ka indu penyengat. Seduai anang bepegai ba ratai buloh lembau enggai ka bebaring belat. Seduai anang murus kayu ubah lusu enggai ka seduai enda tisi ka engkabai tibang segala.”

“Lengka ka genteran jako nya, lalu pegai genteran jako bukai, diatu aku mai seduai belemati ka indu ti udah diambi seduai ka bini. Indu ka bini seduai sama bajik, sama nemu ngereja pengawa, nemu basa sereta baroh pendiau, endang amat nipak ka seduai iya amat orang bisi tansang bisi gelanggang, bisi balai bisi tatai. Nya alai seduai enda tau enda baka pengedang dachin timbang anang ngasoh berat puting setak enggai ka pelunggak. Enda tau enda baka kayu ulak-ulak enti bisi berat ari sapiak-sapiak takut ka perau ruyak belah dua enda tau dipeguna.”

Enteran Temiang seduai Enteran Temali enggau samoa sida sarumah dia endang enda memunyi mending ka Mujong ngara ka samoa adat basa enggau ngerintai adat tuai. Udah tembu Mujong nyintak seput lalu ngesoh ka asap ruku, dia iya lalu berengkah baru ga becherita.

“Amai seduai landik jari, tajam ati tau serang tau pandang, tau kayau tau pulau ; tang seduai agi pandak jari sapiak, agi lembut pala tut. Kabauh pia, laban seduai apin bisi ngembuan gempelu batu penemu kena ngempong indu anembiak dalam rumah seduai empu.”

“Nya alai adat ke enda tau enda ditemu seduai nya adat berumah enggau samoa adat burong enggau adat gawai. Aku ke nusoi ngagai seduai nampong ajar, nampong jerita orang tuai le lama udah nadai.”

“Bakatu ko ripih pengawa enti kita deka berumah ; terubah kitai ngiga tanah. Udah nya baru kitai beburong ka tanah nya. Udah pukas pengawa nya baru kitai ngerumbang tanah nya.

Udah pukas pengawa ngerumbang nya baru kitai ngelesi tanah. Udah nya kitai lalu nuntong ka tiang. Kitai lalu ngator lubang tiang, lalu ngentak ka tiang pemun. Enti kitai niri ka tiang pemun, lubang tiang nya simpan ka kitai piring, darah babi enggau batu kuai. Ba tiap-tiap lubang tiang orang ke dulu ngentak diujak ka kayu mumban. Kabuah alai nanam kayu mumban awak ka rumah chelap nyamai diwan ka dudi hari jemah ila.”

“Nya tadi ripih pengawa enti kitai deka berumah, lalu tu ripih adat berumah ke dikumbai kitai adat balang :

a. Enti sabulan kitai udah ngerembang angkat enda nyadi berumah dia, nya nama balang rembang. Adat, genselan manok siko, kering samengat duku sabilah.
b. Enti dua bulan enda ga nyadi berumah dia, nya genselan baru manok dua iko, duku sabilah, beliong sabilah.
c. Enti tiga bulan enda ga nyadi berumah dia, genselan babi siko, kering samengat nyabur nyengala.
d. Enti udah dirembang tang enda dientak ka tiang nya nama balang tiang. Nya genselan babi sepa, kering samengat nyabur, sangkar sigi panding.
e. Enti rumah udah chukop sabulan udah tembu gaga apin ga diwan alai kitai pindah, nya nama taju rumah, genselan babi sepa, sangkar sigi alas, kering samengat nyabur nyengala.
f. Adat niki ka santubong, babi nyengala, nyabur nyengala.
g. Enti orang ninggal ka perengka reta ba rumah kitai lama agi ari tiga malam iya meri genselan manok siko, duku sabilah.

Adat rumah agi maioh, tang iya enda ulih putik silik ba jako kitai sakali tu. Nya alai naka nya aku ulih ngelanjah adat rumah. Diatu aku mai seduai bekenang ka pasal burong dipeguna bansa kitai. Aku ngajar seduai nampong ajar orang tuai ke dulu parai, orang kalia ke lama udah lela. Nampong ajar aki kita Surong Gunting. Nyadi iya endang terus nerima ajar ari Aki Lang Sengalang Burong, Aki Jugu Menaul Tuntong. Nyadi Sengalang Burong nya mentua sida Ketupong, Bejampong, Beragai, Embuas, Pangkas, Papau enggau Burong malam. Sida nya endang pun burong. Sida nya mih dikena kitai beburong bumai.”

“Udah seduai nemu bagi nama sida, udah nya seduai enda tau enda nemu ripih ruai sida. Laban ripih ruai sida nya beguna bendar kena kitai ngengkah ka diri bumai. Enti kitai enda nemu ripih ruai sida, kitai enda nemu bagi burong ke mali enggau jadi, ke jai enggau manah kena kitai manggul.”

“Nyadi ruai Aki Lang Sengalang Burong ba tengah-tengah rumah, lalu ngapit enggi iya muak ari kanan nya ruai Embuas, ditangkan ka ruai Bejampong, ditangkan ka ruai Kelabu lalu iya mega dikumbai kitai Papau suah mega disebut kitai Senabong. Udah nya puting nyin bendar nungking ba ruai Papau nya ruai Nendak. Nendak nadai ruai semina melaboh aja nungking ba ruai Papau, lalu iya mega menantu Sengalang Burong.”

“Udah nya ngapit ruai Sengalang Burong muak ari kiba nya ruai Ketupong suah dikumbai kitai Jaloh. Nangkan ka enggi Ketupong nya ruai Beragai suah dikumbai kitai Burong Gaga. Nangkan ka ruai Beragai nya baru ruai Pangkas ke suah disebut kitai Kutok. Lalu puting nyin bendar nya ruai Burong Malam.”

“Nyadi Aki Lang Sengalang Burong, Aki Jugu Menaul Tuntong ke bejulok Lengkap Tanah, Runtoh Langit Naban ka Bulan Tanggar Peranama, bebini ngambi Indai Kechendai Bepantak Jerak, Dara Sentaba Balun Kupak. Tang deh Indai Kechendai nya tabin birin lembau makai, sakit lengit enda pengerai, iya lalu dipetawai ka Manang Gendai, dipesaut ka Manang Likup, dipelian ka Manang Jaban. Iya lalu mindah nama dikangau ka orang Endu Sudan Berinjan Bungkong, Endu Diu Tiong Menyelong. Nya alai Aki Lang Sengalang Burong seduai Endu Sudan Berinjan Bungkong lalu beranak delapan iko. Lalu tu nama anak enggau menantu seduai iya ;-

a. Endu Dara Tinchin Temaga, Endu Cherebok Mangkok China, nya bini Ketupong ke dikumbai Jaloh, bejulok sangkoh agong ngentong beradong arong dada. Nyadi Endu Dara Tinchin Temaga ke bini Ketupong nya ga udah ke bini Menggin lalu beranak ka Surong Gunting.
b. Entu Leletang Balang Bepulas, Endu Gempanang Tekang Mas, nya bini Embuas, bejulok bangkong libas mua peneras ngelimpas moa bala.
c. Endu Tekan Lambar Ubong, Endu Tekang Mau Raung, nya bini Bejampong bejulok bunga jarau sagempong ngeretong ka perabong rumah raya.
d. Endu Terutu Sabang Jurai, Endu Chapak Dulang Landai, nya bini Beragai bejulok pinggai besai penerima leka balang begumba. Lalu Beragai nya suah dikumbai kitai Burong Gaga.
e. Endu Achin Becheremin Burit Mangkok, Endu Kumang Subang Betandok, nya bini Pangkas ke digelar Kutok, bejulok santok lunju besambong pengerumpang tikong kaki kuta.
f. Endun Kumang Tekang Gempanang ulih Ngunyut, Tekang Intan ulih ngeraut, nya bini Kelabu ke digelar Papau Nyenabong, bejulok sintau kamarau hari rendang-rendang mandang ka dagang tanah China.
g. Endu Dara Chempaka Tempurong Alang, Endu Kumang Cherembang Bintang, nya bini Burong Malam, bejulok beliong lajong penebang batang junti temaga.
h. Anak Sengalang Burong ke lelaki benama Aji Berani Ati Ngilah Bulan, Meta Ansa Rengayan, bebini ngambi anak Simpulang Gana ke benama Endu Anggu Sintong Temiai bambai ka Tangkai Bunga Sesangga, Endu Benih Lilih Tengah Tegalan bambai ka Tetai Bintang Tiga.”

“Nyadi Nendak tu tadi taja iya betampong rumah enggau Sengalang Burong tang iya nadai ruai, iya melaboh nungking ka tebalayar kelabu, lalu iya mega ukai burong dikena mantap leboh bumai. Tang iya burong penganjong seruan ka Sengalang Burong. Naka iya tau diguna ka burong leboh iya mimpin enggau ngeraup.”

“Enti iya bemunyi ari kiba iya dikumbai Nendak Kiba, enti iya ari kanan, iya dikumbai Nendak Kanan, tang iya ukai dikumbai burong mali. Nendak semina tau ka panggal burong. Retinya, enti kitai ninga Nendak Kiba, udah nya bisi ninga burong bukai, nya nama bepanggal ka Nendak Kiba, lalu bakanya ga enti iya kanan. Enti enda bepanggal dulu nya benama Sungkal. Reti sungkal nya enti Ketupong memunyi ari kanan iya nya sungkal Ketupong kanan, lalu bakanya ga burong bukai baka Jaloh, Kijang enggau samoa sida bukai.”

“Nya alai enti seduai udah nemu ripih bala anak enggau menantu Sengalang Burong, seduai enda tau enda nemu sekeda nama gawai ke selalu dintu kitai Iban. Lalu nama sekeda gawai ke besaio agi ;-

1. Gawai Batu 6. Gawai Sakit
2. Gawai Ngalih Tanah 7. Renong Sakit
3. Gawai Ngemali Umai 8. Gawai Burong
4. Gawai Matah 9. Gawai Nama ka Tajau
5. Gawai Besimpan 10. Gawai Antu tauka Gawai Rugan

“Enti kitai Gawai Batu lalu kitai endang udah bisi batu lama, kitai semina begawai mela iya pia aja. Enti kitai apin bisi batu, nya kitai begawai ngiga batu. Pengap Lemambang ngiga batu lalu ningkoh.”

“Gawai Ngalih Tanah, nya kitai begawai ka tanah laban iya udah kusi, udah ransi.”

“Nyadi ba Gawai Ngemali Umai, Pulang Gana diambi ngabang. Lalu bakatu ko ripih pengawa mela gawai nya. Terubah orang ngambi anak padi ka umai. Samoa utai ke ditanam di umai diambi orang magang nitih ka genap iti macham sida. Nambah ka nya sida ulat, buntak, empangau, merak enggau samoa utai bukai ke nganu padi enda tau enda bisi dibai genap iko.Samoa anak padi ke ulih ngambi ari umai tadi lalu ditinggal ka ba langkau anak padi di kaki tangga.”

“Kira hari maia pukol empat lemai dia samoa utai nya tadi lalu diambi niki ka rumah, disandik orang ke indu enggau pua kumbu. Sida nya diulu ka Lemambang enggau pengap bejalai tiga kali besundang niti rumah panjai.”

“Tembu orang bejalai niti rumah, samoa utai nya tadi lalu dibai tama ngagai bilik tuai gawai. Bilik tuai gawai nya bilik orang ke empu ruai alai pandong anak padi.”

“Ba bilik tuai gawai dia anak padi lalu diunsut enggau minyak. Udah nya baru anak padi dibai pansut ka ruai, lalu disimpan dalam pandong besai ke dikumbai Meligai. Anak padi lalu diengkah orang dalam pandong nya begulai enggau pengaroh ubat padi ; taring babi, tandok rusa enggau samoa macham pengaroh bukai.”

“Samalam-malan nya Lemambang mengap ngelingi Meligai, lalu bejalai ga niti rumah nya setak ke setak mengap ngelingi pandong piring ba genap belah ruai di rumah panjai nya.”

“Nyau tawas hari siti, kejang deka nurun nanam anak padi nya ka umai, anak padi nya tadi dibai bejalai tiga kali besundang niti rumah, sereta enggau gendang. Udah nya baru orang nurun nanam anak padi ka umai.”

“Ba Gawai Batu enggau Gawai Matah enggau Gawai Besimpan sama Pulang Gana diambi orang ngabang.”

“Ba Gawai Ngalih Tanah, Pulang Gana seduai Semarugah diambi ngabang.”

“Ba Gawai Burong, Sengalang Burong ga diambi ngabang, lalu ba Beduru alai orang bulih antu pala. Sida Ketupong seduai Beragai nya orang ngambi antu pala ba Beduru lalu dibai sida ngabang.”

“Enti Renong Sakit enggau Gawai Sakit, Manang Menjaya diambi ngabang.”

“Nya alai enti seduai udah nemu ripih gawai, seduai enda tau enda nemu pun penatai adat enggau pun penatai gawai, lalu sapa orang ke dulu mungkal adat lalu numboh ka gawai sabengkah-sabengkah :

1. Gawai Burong datai ari Sengalang Burong
2. Penatai Nemu Gawai Antu ari Kedawa ke bebelang ngiga manok sabong biring gerunggang. Iya diajar bini iya empu ke benama Simba di Sabayan din jalai Gawai Antu.
3. Penatai nemu Gawai Ngemali Umai ari ajar Pulang Gana.
4. Penatai nemu miring ari Pulang Gana leboh iya enggau Bujang Inin diberi Semarugah makai. Iya lalu miring ke pemakai nya ngagai sida sarumah, tang enggi Bujang Inin ditengali iya kediri.
5. Penatai nemu bumai bechuan ka bintang ari Jelenggai, lalu bisi ga orang ngumbai datai ari Jubang.
6. Penatai adat tungkal ari Jelian, leboh dapor sida sarumah nya chelap, enda dipandok.
7. Penatai nemu rakop, kibong tekalong enggau keban mali meraka orang ke dulu ngentak nya datai ari Jelian.
8. Penatai adat ngiru ari Indai Jabua ke dikumbai kitai Bunsu Tikus, leboh iya ngiru Simpang-Impang kai anak.
9. Penatai Gawai Tajau ari ajar Anda Mara Raja Pengibai diajar iya ngagai Ketupong menantu Sengalang Burong.
10. Penatai nemu bechenaga ngena atau babi ari Samuda diajar bini iya Dayang Manis Muka.
11. Penatai nemu enda ngulit ari Menggin diajar Antu Gayu leboh antu nya alah laban iya besemekih nyumpit.
12. Kitai nemu bepana ari ajar Puntang Raga ke ngajar Serapoh jalai ngintu pemati.
13. Kitai nemu beguna ka laba ari ajar Bujang Inin Bunsu Remaung.
14. Penatai nemu ngayau ari Serapoh, leboh iya nyanda bunoh ngena benong tajau menaga ngagai menoa Kantu.
15. Penatai nemu Gawai Sandau Hari ari ajar Sampar.
16. Penatai nemu nunggu ari ajar Simpang-Impang ke nunggu Bunsu Ribut udah muput ka tangkai padi iya.
17. Penatai nemu ngusok ngulih ka api ari ajar Dayang Racha indai Simpang-Impang.
18. Penatai asal padi ari Indai Jabua Bunsu Tikus ke ngiru Simpang-Impang.
19. Penatai nemu Kelam Ai ari Seragindah, leboh ikan semah ke semetah ngelaban Ringin bepun ari laya sida ka ngumbai gerama enda ulih giga ba lubok ke dalam bendar.

“Nya alai diatu enti seduai udah nemu sekeda pun penatai gawai enggau sekeda pun penatai adat, seduai enda tau enda nemu nyawa Benda Tunggu :

Sigi Menukol
Dua igi menukol sigi jabir
Dua igi jabir sigi panding
Dua igi panding sigi alas muda
Dua igi alas muda sigi rusa
Sigi Alas Ngerang.”

Nyawa Benda pulai ngagai mata wang :

Sigi Menukol = $ 0.50
Sigi Jabir = $ 1.00
Sigi Panding = $ 2.00
Sigi Alas Muda = $ 4.00
Sigi Alas Ngerang = $ 5.00
Sigi Rusa = $ 8.00

“Naka nya aku ulih ngerintai tungkat pengingat ngagai seduai ; tungkat enggau batang pengingat ukai siti jalai lalu enda mega sida iya ulih digaga kitai salubang magang-magang. Nya alai kitai semina naka ulih milih sida iya ke menuku agi tau kena ngering ka tanah darah enggau ai kitai empu. Laban utai nya enda tau enda dikering ka kitai ngena jalai besukong betulong, berimbai sajalai.”

Udah nya Enteran temiang seduai Enteran Temali lalu nyadi Pengulu orang di menoa nya nganti apai seduai, laban iya nyau tuai enda dapat gawa agi. Pegai seduai iya alus, sereta chelap lalu orang balat bendar bebasa ka seduai.

Nyadi hari siti dia apai seduai ngangau ka seduai iya baru.

“Asai aku tu anak, udah jauh bendar belinsur lembut ari ke ngelamatu. Seput aku mansang sekut, nyawa aku nyau enda tentu masok utai agi. Nya alai kala aku agi bisi seput ngesoh ka leka jako, aku enggai enda mekal seduai enggau ajar saleka dua ga agi nambah kai udah diberi aku ngagai seduai ngelamatu.”

“Seduai megai menoa, ngiring bansa, ngadu ka chara, emparu laya indu anembiak maioh dalam menoa tu enda tau enda manah-manah. Seduai enda tau sakali-kali niri ka tali basah, seduai enda tau nudok ka mangkok belah.”

“Seduai ngemata ka mensia bakanya ga anang bisi diasoh niki nibong, lalu bisi diasoh niki pinang. Seduai bejako enggau anembiak seduai bakanya ga, enti utai nya chelap tentu padah ka chelap, enti utai nya angat tentu padah ka angat. Anang nguji madah ka utai angat, chelap, utai chelap, angat. Laban enti iya bakanya orang maioh perasa ka jako seduai, lalu nya pulai ka pengabau samoa pengaroh pemisa jako seduai.”

“Tu siti agi ajar aku beri ngagai seduai, baka seduai kadua-dua iko sama anak aku, laban aku arap ka seduai tau beranak ka samoa orang maioh. Retinya taja seduai biak, tang seduai endang niti, endang nali. Nya alai utai ke nama pesaka ba seduai ga alai aku ninggal, seduai ga diberi aku. Iya ga seduai anak aku. Tang enti seduai enda tepegai ka orang maioh lalu enda tiring ka menoa, seduai runding ka nadai pesaka dalam menoa tu. Nya alai jako aku ke ari pun nyin tadi ngasoh seduai betungkat ka adat, belalau ka pekat, awak ka seduai tau bulih pesaka, lalu pesaka nya pengerindu orang maioh tu ka seduai.”

“Sigi agi, munyi jako ari pun nyin tadi, aku ngasoh seduai bepegai ba lalau perasau buloh penyimat, laban ko sempama jako tuai, dan teras, dan tebelian amat enda mudah ngachok mata, tang daun lalang, daun kemelang ke tumboh sebelah tisau jalai raya nya ke bagas ngachok mata, lalu ngasoh orang enda lansik.”

“Sebengkah ga agi sempama jako tuai madah ka samoa utai ka pait, utai ke kelat nya meh utai ke bisa, lalu bakanya ga ajar enggau adat ke manah endang enda nyamai didinga. Tang ajar enggau adat, manah enggau jai endang dikena napis pendiau anak mensia. Nya alai laban seduai udah ditapis, udah disarap aku, lalu seduai meh nyadi ke seligi, ka matahari, ka tenggau, ka lalau, ka chuan, ka peduman samoa orang maioh.”

“Nyadi dalam pemerani kayau, seduai enda bula berani, tang dalam pia seduai berani, seduai anang enda masok ka baju kena ngelindong kulit, anang enda nangkup ka tanggui kena ngelindong langit.”

“Nya alai diatu anak, tu aku mekal seduai enggau pengaroh. Tu pengaroh gembar tuboh diberi aku ngagai seduai. Tu taring uting babi ngelampai, tu tandok rusa ke periga pampang tigai. Ko sida mengua karong mengandai, tu ubat ngasoh berani ati di kandang kerigai, tang ko aku ukai, tu ga ubat kunchi kemali kena nanggam bansa kitai awak ka tegoh enda alah tempoh bala Maloh tujoh puloh mansang nyerang.”

“Udah bekau tu ila baru seduai kukoh ngiring bansa, kering nan ka menoa. Laban pengaroh nya tadi, nya meh kena seduai nambit pintu langit awak ka enda tekinsit ngerandang remang. Kena seduai nan ka pintu bulan awak ka enda tetukang sawang jarang. Kena seduai ngerempong bala udong enggai ka sida kelalu beserekang. Kena seduai nanchang rampang bunga bekuang awak ka sida enda cherai becherayan takang.”

Udah bekau nya Enteran temiang seduai Enteran Temali lalu belinsor kukoh nan ka menoa suah seduai ngulu ka orang bebala, lalu genap kali sida nurun nadai kala sabau pulai ngapa. Serang seduai nadai kala balang enda munggor ka menoa. Seduai ingat berari-ari ka ajar apai seduai. Dua kali kayau seduai besai bendar, sakali nya leboh sida ngayau ka langit, lalu bamok ngelaban bala Apai Sabit Bekait seduai Achong Selong Bebelit. Dia sida betempoh ba kuta langit, lalu bepantap munyi ke nesap tubu payan, sida bamok munyi tutok ujan setelian.

Sakali agi dudi ari nya sida ngayau ngagai menoa Sabayan ngelaban Raja Abu datai ari Munggu Pambak Guntor, Antu Buau datai ari Rantau Sintak Nyabur. Sida nengah pintu tanah, betemu lalu bamok ba antara dunya tu enggau sabayan.

Apai Sabit Bekait ke diau di langit din pan udah ga nundok, lalu Raja Abu ke diau dalam tanah pan udah ga alah. Nya alai abis meh munsoh Enteran Temiang seduai Enteran Temali, seduai lalu ngadu ka diri mai orang bebanchak babi, kena ngalus ka menoa awak ka enda kudi enda bekasi, enda tusor enda anchor.

Udah nya indu anembiak pan enda ga agi siga nurun nubu, nurun maku, nurun mantun, nurun mumpun. Mensia maioh di menoa nya kulu kili pan lantang ga ngidup ka diri, lalu sama berunding ngadu ka pemansang bansa.


2 comments:

  1. rindu mat maca ensera....udah lama enda ngau urg macam bup ensera iban udah ke belengka sekula menya....ulih nuan ngadu ke rintai nama bala sida kumang & keling kitai iban ka?

    ReplyDelete
  2. au meh menyadi...nganti pansik aku udah tembu ila. Benung ngaga pansik meh aku diatu

    ReplyDelete