KABAN KITAI DAYAK KALIMANTAN

KABAN KITAI DAYAK KALIMANTAN

Ditusun : Richard Ak Changgan

Enti kitai kala ninga leka jaku Dayak mesti kitai ingat ke semina ba menua kitai Sarawak aja bisi suku Dayak. Tang kitai anang enda nemu ba pulau Kalimantan pan bisi suku Dayak ke sama baka kitai. Enti nitih ke pansik Suku Dayak suba semina di sebut Dayak Darat (Jaku Melayu). Gaya pengidup Dayak Darat bepelasar ari pengidup sida ia ke diau jauh tepejuh di ulu sungai, sebelah kampong. Bangat jauh ari menua tasik (Maritim). Ke chunto ia kitai ulih meda pengidup raban Dayak ba Sarawak enggau Kalimantan beridup sehari-hari ngena pengawa ngasu, beburu, betanam, betupi enggau bumai tahun penuh munggu enggau bukit.

Nitih ke pansik ari  R. Sunardi enggau O. K. Rahmat, seduai ia madah ke suku Dayak siti ari pengidup raban bansa ke enda bepegai ba pengarap Islam enggau pengidup sida ia netap tepejuh jauh ba ulu Kalimantan. Leka jaku Dayak tu mega di beri ngena jaku Melayu ke ngambi reti ( Gunung) laban bansa Dayak ba Kalimantan idup ngachir sebelah tanah bukit. Tang ba ke diatu ukai reti ga jaku nya di kena manding ke Dayak ba Kalimantan enggau Sarawak nya idup tepejuh di ulu sungai, laban pengidup diatu jauh begiga ulih di nengeri.
Enti di sidi kitai ba mata bansa Dayak empu, Raban bansa Melayu asal sida ia ari daerah Melayu lalu sida ia datai ngembus ba Kalimantan, enda nyerangkum raban bansa Tionghoa, ke segi udah lama ngembuan idup ba Kalimantan empu. Raban bansa Melayu kelia madah ke Dayak tu ( orang gunun)g. Tang enti di sidi kitai ke amat-amat nadai ga dalam pejurai bup tauka ba fakta sains madah ke Dayak tu  orang gunung. Tang nyangka meh ketegal orang Dayak ketebal agi di Kalimantan ngentap ke diri ba ulu sungai lalu topografi tanah menuanya bebukit-bukit. Tang nya ukai meh reti  Dayak tu (orang gunung) nunda ke jaku sida ia. Ba nama dayak ke bukai mega bisi siti leka jaku Dyak. Leka jaku Dyak tu di sebut orang putih kelia ngagai suku-suku Dayak ba Kalimantan Utara tauka di sebut diatu (Malaysia).

Suku Dayak ke ngentap ke diri idup ba pulau Kalimantan mayuh amat nyepar begiga pengidup, bisi ba ulu sungai, lalu bisi mega muntang nganjak masuk ngagai Sarawak ke diatu. Raban bansa Dayak selalu belandik ke nama menua sida ia ngena alir batang aie sungai besai ke bisi ba menua sida ia baka chunto Dayak Kapuas laban sida ia diau ngentap ba Batang aie Kapuas ke diatu. Bisi mega raban Dayak ke diau ba pesisir sungai Kahayan, sida ia ngela diri uluh Kahayan (orang Kahayan). Bisi mega uluh Katingan, uluh Barito, enggau ke bukai.
Bisi mega Raban bansa Dayak enda nyanggup ngena leka jaku Dayak ba raban bansa sida ia, ianya yairu Daya. Leka jaku Daya tu jelai amat ba daerah Kalimantan Timur enggau Kalimantan Barat. Leka jaku Dayak enggau Daya ke bendar ia nunjuk ngagai siti-siti  suku aja ianya suku Dayak. Ba leka jaku Dayak Ngaju , leka jaku tu madah ke cara idup ke nunjuk ngagai pengering. Ba leka jaku Sangen , Dayak enggau Daya tu meri reti bakena tauka kering lalu jaku melayu (gagah).
Terima kasih ngagai bala pemacha…minta ampun enti bisi salah rintai ke aku….betemu meh ba penemu ke bukai…..

Pemali ( Tebak sengkilu' lama) : Ditusun : Richard Ak Changgan

Nama reti leka jaku "Tebak Sengkilu' Lama"....mayuh kitai enda nemu reti rambai jakunya. Tang nya ukai nyeremin ke kitai nembiak rebak baru diatu kurang penemu, tang nyagka kitai jarang ninga sida ke tuai besebut ke leka jaku tu.
     Nyadi ba ke sekali tu aku nguji mai kitai berati ke rambai jaku silup tu. Nyangka meh penemu aku agi pabu tang aku nguji madah ke bala kitai ke enda kala nemu sereta ninga jaku tu. Nyadi leka jaku " Tebak Sengkilu Lama" tu manding ngagai penusah penti pemali kitai lebuh maya ke bulih penusah beduduk ari ke ngereja pengawa baru tang agi kena empa penusah ke udah dulu suba. Beduduk ari pengawa kitainya diak deh kitai deka kena kelapung enggau pengerugi, sial sereta ulih layu (enda gayu) enti enda di sempekat kitai enggau piring beampun ke petara.
     Sempama rambai jaku tu suah agi didinga kitai nuju bala kitai iban ke ngentak berumah baru ba litan tembawai lama kelia. Nya alai, enti orang ke tuai deka berumah baru, jarang amat sida ia ka napat ke tembawai lama ke kala endur berumah kelia laban sida ia enggai silap berati ke entak bekau lubang tiang tuai.
Nya alai, lebuh ke ngentak sida ia nguji deka nyeliah ke lubang lama enggai ke penusah, penyuntuk enggau penti agi kelia deka nungkat baru ba rumah ke di gaga baru.
     Nya meh ke sempama jaku tuai, " OOO...ni ka gayu sida ia serumah..peda nuan bala sida ke tuai, nyau majak parai..ga beturut-turut ke parai..udah Tebak Sengkilu lama kini" pia deh ko jaku kitai nyebut. Tang aku enggai enda madah ke kitak, ba tubuh orang ke tuai kekala berumah diak suba aja kena pemali tu. Ba senentang nembiak baru ia segi enda kena. Pia mega ba pengidup sida ke tuai ba rumah nya, sida ia segi pedis ngidup kediri enti udah salah atur enggau silap adu lebuh maya ke ngentak.
    Tang nyangka meh orang ke tuai diatu mayuh udah megai pengarap kristian, nya meh sida ia enda tentu nangi ke utai bakanya. Tang kingat ke kitai ke rebak baru diatu, enti kitai ngumbai diri kristian, tang kristian kitai semina (angat-angat taik manuk) munyi ko orang nya nadai pulai ke pemanah. Tajapan dunya diatu udah baru, tang mayuh ga kitai bansa ke agi bebagi dua ati laban agi di balut penyaru diri ke agi ka ngemeran ke pengarap lama enggau pengarap baru. Ambi ke banding, bala anak asuh Sembiang, tang aki, inie, apai enggau indai segi enda. Nya meh ke ngasuh utainya deka belanggar enda temu pugu, ti lebuh maya ke ka ngintu pengawa. Bisinya sembiang, bisinya miring...charut dunya!!!!! pia deh ko jaku orang...tang enda ga nyalah sapa-sapa laban pengarap tu ba ati diri.
     Nya meh..dalam ngereja pengawa kitai segi mesti beguna ke siti tungkat ke teguh ngambi ke pengidup kitai tau chelap embab, nadai apa nama. Nya alai aku ngarap ke kitai sama ulih berati ke penemu tu, kelebih agi kitai nembiak iban ke rebak baru anang endaa sama ngingat ke diri. Uji ambi penemu ke di sempulang ke aku ba baruh tu:

LEBUH KITAI KA BERUMAH BA LITAN LAMA BAKATU GAYA IA:

1. Uji perati ke bekau litan lubang tiang lama, anang sekali-kali ngentak ke tiang diak baru..kelaung ke....
2. Kitak tau ngentak nginsit ke belakang, kulu, kili tauka ke mua mimit ari abi tiang lama, enda milih ke kitak
    ka ngaga langkau tauka dunju.
3. Maya ngentak anang enda bepegai ba adat penti tuai ke pun pugu rumah panjai. Ukai reti ia kitai ngasuh
    tuai rumah dulu ngentak, tang barang sapa tuai bilik ke dulu agi ngembuan tiang tuai ba rumah panjainya ke
    patut dulu ngentak.
4. Ngayan ke rengka piring tauka begenselan ke lubang tiang ke dulu agi di entak ke kitai, laban nya meh
    tiang tuai ke deka nyadi peneguh rumah.Nyadi atur piring nitih ke atur sida ke tuai ke nemu dalam
    pengawa  berumah.
5. Enti kitai orang Kristian, diak deh kitai mesti ngibun jalai berumah baru ngena pengarap kristian.

Kira ke nya aja meh utai ke deka di kunsi ke aku ba sukut ke sekali tu...lalu aku minta ampun nyema ke utai tu enda tentu chukup manding ba penemu kitak ke tuai agi.....terima kasih

Nama runding kitak wai?!!!!!

Enti kitak bisi runding, penemu tauka utai bukai....ulih anjung ba facebook aku Richard Thias, ambi ke aku nemu ngadu ke buah runding kitak ba blog tu. Terima kasih ke sukong bala kitak wai !!!hoooo...ha......