AIE ENTABAI
Laban asal aku segi ari Entabai, bisi ga aku nemu mimit sejarah enggau jerita pasal menua Entabai laban aku bisi betanya ba sida ketuai-tuai ba menua nya. Nyadi suba ai entabai tu keterubah ia segi bedau di wan batang tubuh kitai iban ba menuanya ke diatu ko orang. Orang ke terubah nguan menuanya suba ianya bala Beketan enggau bansa Ukit ke datai ari sepiak pala menua ba entara Kalimantan Indonesia semak ka beratus tahun ke dulu suba. Laban menya kitai iban enti nitih ke sejarah asal kitai segi melunggang ari menua Batang Kapuas lalu meraka sebelah Batang Kanyau nyentuk ngagai sempadan Indonesia ke diatu, sebelah ulu Lubuk Antu. Nya meh ke ngasuh kitai iban balat ngachir sebelah pala menuanya ke diatu. Enti kitai berati ke jaku iban kitai ke ba tunga ke Ulu Entabai segi bisi bida ari ritma jaku iban ba tunga ke Ulu Batang Rajang enggau Sebelah menua Saratok enggau Sri Aman.
Pemindah bansa Iban ke Sarwak kitu tau di bagi ngagai empat renggat enti nitih ka pansik aku. Renggat keterubah iya iyanya ba tahun 1800 menya. Ba renggat keterubah tu, bansa kitai Iban pindah ari Kalimantan tauka ari sumatera nepat menua bagi kedua ngelawa Batang Lupar ( nyengkaum Sebuyau, Lingga, Banting, Undup,Skrang, Lemanak enggau Batang Ai empu sereta pati-pati menua Kumpang, Seremat, San, Sukong, Kaong,Pan, Mepi, Jela, Engkari, Telaus, Menyang, Delok, Lalang, Jengin, Lubang Baya enggau Mujan).
Pemindah tu mega nyengkaum Batang Saribas ( Rimbas, Paku, Layar enggau Padih) sereta sekeda menua pegai bagi kesatu diatu baka Lundu enggau Sungai Sarawak. Nambahka nya mega, menua Simunjan enggau Batang Sadong, pegai Samarahan ke diatu pan sigi udah diwan bansa kitai Iban sebedau tahun 1800.
Ba renggat kedua, entara taun 1800 ngagai 1850. pemindah Iban ba renggat ti kedua tu nepat ka menua Awik di Batang Krian tauka Kalaka enggau Batang Rajang ( Nyengkaum Sarikei, Binatang tauka Bintangor, Sibu, Kanowit, Julau, Entabai, Poi, Dap,Ngemah,Katibas enggau Melipis). Iban Sarikei enggau Sibu mayuh datai ari Batang Layar enggau Batang Krian. Iban tunga Kanowit, Julau enggau Entabai ketebal agi datai ari Batang Lemanak. Pia mega Iban Katibas suba mayuh ari Batang Ai( Skrang,Lemanak enggau Engkari), Kanyau Lebuyan enggau Emperan kena pegai Kalimantan, Indonesia Borneo ke diatu
Ukai ga aku ngelebas pia laban kitai ke agi sama bansa iban. Enti nitih ke jerita siti munyi tu ko jerita ia :
Menya, bisi dua iku indu ke di turun ke petara kelia. Nyadi indu dua iku tu ko orang ke tuai nyebut, diri madi. Nyadi siku ke tuai tu tadi bajik agi ari ke biak. Nya meh ke ngasuh ke biak tu tadi nyadi ke pelasar ia ke nyindir lebuh bejaku. "aku bajik ari nuan sanu, peda dek aku, mua aku, tubuh aku, tusu aku, ga burak ga manah magang" pia deh ko ketuai nya bejaku.
Nya meh ke ngasuh madi kebiak tu tadi enda puas hati...belaya meh seduai ia ko jerita, nya meh ke ngasuh ia tu tadi lari ngagai menua siti. Ambi ke kitai nemu, indu nya lalu di gela ke madi ia indai Lipai lanjut tusu besai....nya meh bisi orang ke tuai madah indu kitai di Batang Entabai menya ari peturun Indai Lipai. Nyadi indu di menua Batang Rajang ko sida ia nyebut peturun madi tuai Indai Lipai ke bajik, nya alai bala indu Iban di sebelah Batang Rajang mayuh beburak bajik. Keno ko jerita meh!!! kitai enda meh nemu....minta ampun au!!!!Nyau ngenang baru meh kitai ngagai menua Aie Entabai ke diatu, Aie Entabai bepati ba Aie Kanowit lalu Aie Kanowit rembus bepati ba Sungai Rajang ke diatu. Nyadi aie Batang Entabai pemanjai ia enti mudik ari Nanga Entabai nyentuk Ngagai entigis ia ba Ulu din ko sida ia nyebut kira ke bisi sehari lebih pejalai enti ngena moto aie enjin 15 kuda. Mayuh meh menua ke di pansa kitai enti merau ari Nanga Entabai, Suba aku mega kala enggau orang ngambi indu tama ngagai Aie Mujuk Julau, nya meh ke ngasuh aku empu nemu menua ngili Entabai ari Nanga Engkamop kili kin. Nyangka meh bisi bala kitai ke ari entabai empu enda nemu menua kili enggau kulu ba batang aie tu. Nya alai aku naka ulih madah ke kitai menua tu kengka ke ditemu aku.
Ari Nanga Entabai kitai mudik ari jelatung Niang YB Giman menya kitai ulih tepeda ke rumah panjai orang Sayong, kulu agi kitai mansa menua orang di Jemak, udahnya kulu agi menua orang Sepisang, kulu agi kitai mansa ga menua Wong Kerdat..nyangka meh menua bukai bisi kena seliah ke aku minta ampun au!!!..kulu agi ga kitai diak kitai ulih mansa menua orang Sengaih...udah nya kulu agi mansa orang Langu udahnya Rumah panjai orang Bekakap sampai kitai kulu agi baru rembus ba Nanga Engkamop pendaie YB Wong Judat ke diatu.
Mudik ga kitai kulu agi, kitai ulih mansa Aie munus, udahnya lalu kulu agi kitai mansa menua orang ba Nanga Keluton. Diatu nyamai amat enti ari engkamop ke Keluton laban bisi jalai udah digaga perintah nyentuk ngagai Ng Entaih, suba Nanga Engkamop ujung jalai. Ari Nanga Engkamop suba nengah aie entabai merau nyentuk ke Ng Entaih lalu ke ulu entabai kulu kin. Nyau ngenang menua baru ga kitai, Ari Ng Keluton kitai kulu ke agi, kitai ulih mansa Ng Entaih. Aie Entaih tu bepati ba aie entabai, enti mudik aie Entaih tu mayuh mega rumah panjai kitai iban bisi ba menua nya, baka orang Gerugu, Orang sungai labi/Tutung, Nanga Dong nyentuk kulu kin agi ba aie siti Sungai Bangkit...sepiak sungai agi orang Lubuk Besai, orang Tekalung, Sungai engkabang nyentuk ke datai ba Ulu Entaih din mansa sungai ridan lalu datai di SK ULU Entaih din.
Nyau mulai baru ga kitai ngenang ke Aie entabai, ari Nanga Entaih kitai mudik kulu agi kitai ulih meda rumah panjai orang Engkeranjie, dahnya rumah panjai orang Bawang ke baru ba Lepung Tapah, kulu ke mimit kitai mansa rumah panjai menua kami di Nanga Bangkit...NYA MENUA AKU!!!!,. Kulu agi kitai mudik mansa menua orang di Nanga kakup bepati ba Sungai Batang kakup. Udah nya mudik kulu agi mansa menua orang Melepong, ba Rantau Pantak, dahnya kulu mimit kitai mansa sungai Nanga Puak. Ba sungai Puak bisi ga Rumah panjai ianya orang Puak empu, orang Letung enggau orang Bait.
Kulu agi kitai mudik Aie Entabai kitai bisi tepeda ke Rumah orang di Genting Kopi, suba sida ia sama berumah di Nanga Bayu, kulu ke mimit kitai ngelawa Nanga Bayu, udah nya enda jauh agi baru kitai Tetemu ga ke rumah panjai orang Nanga Kemalih semak SK Ulu Entabai ke diatu. Dahnya kitai kulu agi agi ga bisi rumah panjai orang din meraka Jambatan gantung siti ba pendaie Penghulu. Kira ke nyau enda tentu ulih di kira aku memagang ga rumah ke sebelah menuanya. Nya meh menua ke ulih di rintai ke aku sepemanjai Batang Entabai. Minta ampun meh ngagai menua kitak ke enda kena tulis aku ditu au.....enda ulih di kingat ke magang. Chukup mayuh Rumah Panjai kitai Iban di menuanya.
Nya meh enti di kenang kitai chukup panjai, enda alah di tulis ke aku ditu magang, tang naka ulih meh aku bekunsi enggau bala kelebih agi kitai orang Entabai empu, ke jerita asal menua kitai.......AMBIS....
