Novel tu dikirum Igat Anthony Sebastian ngagai aku kena 12/02/2012. Aku meri besai terima kasih.
Brem berasai enda nyamai meda perangai Neo. Bisi endar ati ia cemburu sereta irau ngagai
Lelaki nya enti tak bisi utai enda manah nyadi ba Milna. Ia nemu sapa Neo ke bendar, taja pan nya ukai anak buah ia. Ba, pendiau Brem tak berasai endar ia kena perangsang, laban Neo tu biak agi umor ari ia.
Brem nyau ngetup ke ngeli ia. Nama utai ke di gaga kelimpah ari ke nganti? Ia empu pan enda kala ngasai ke runding ia tak tusut baka jam ke diatu. Enggau singkang ke lembau ia pansut lalu nuju ngagai Opis ke semak enggau rumah ia. Senaya pancar bulan keleman enda tentu terang tang bisi ga di peda ujung bilik ke di lindung kayu ke besai-besai. Lebuh maya ia mansa pintu pagar, singkang kaki ia teketu laban bisi orang nanya. Kumbai ia penolong Manejar kilang.
“Bakani gaya kilang? Ko Brem”
“Manah, Boss. Ka kini nuan Boss?”
Ngagai Opis. Bisi barang aku tinggal di,saut Brem sereta nyingkang ninggal ke kuli kilang nya tadi ke agi tebelenga meda ia laban ari udah jauh malam. Datai ba Opis Sekuriti Guard meri tabek basa ngagai ia. Brem semina nganguk ke pala lalu muka pintu. Ba belakang meja endor ia nulis dia ia duduk sambil ngadu-ngadu ke pisen bok ia. Sunyi, semina munyi kesuh seput ia ke bisi dedinga baka ragak munyi enjin diesel ke bisi semak nya dia. Berupai endar ati ia kesal di peda maya tu. Ayas mua Neo ke benuong nundi Milna balat amat ngeruga runding ia.
Anang-anang Milna tu udah labuh pengerindu ngagai lelakinya. Ukai enda, engka Neo tu pura-pura ngubat Milna. Orang lelaki sigi mayuh akal kena ia ngenatai ke niat tuju ati ia. Nama agi baka Neo ke bujang sereta diau kediri ba bilik sewa. Maioh macam penguji sereta pengirau ke pansut ba runding ia ke lalu ngasuh ati ia balat agi tusah. Mimit da agi ia ka talipaun ngagai kilang elektrik laban ka nanya ke pengamat Milna tu ke sakit.
“Boss….Bosss…”
Brem nyau terbamba, sekuriti guard udah berdiri semak mua ia.
“Udah pukul dua pagi Boss, manah agi nuan pulai belelak di rumah.”
“O..ya, aku enda masuk tinduk”, ko Brem cegit-cegit dia.
Nemu nya anang ke deka tinduk, ngantuk deh ia enda. Ia ke bendar Brem tu balat amat irau ke Neo.
Sekuriti guard endang udah lama pansut. Brem ngunci pintu Opis ia lalu nyimpan ba kuchik tanchut ia. Nadai nyebut nama-nama Brem lalu nyau ninggal ke Opis ia. Datai di rumah Brem enda lalu tama ke dalam bilik ia empu tang lalu ngerebah kediri ba bilik besai.
Milna duduk nyandih ba tisi katil ba siti rumah ke bisi ba komplek endur orang ke kereja kilang elektronik. Pagi nya. Gamal ia di peda puchat sereta kurus. Milna ke bendar baru aja pansut ari bilik ai.
“Nuan udah ulih duduk? tanya Neo ke benung mai ai tusu ka ia.
“Baru aja pansut ari bilik ai” ko Milna.
Jimat-jimat, nama enda ngangau ke aku tauka aya Runggai.
“Aku enda ulih ngangau”.
Neo tuchum lalu nyua ke tusu panas ngagai Milna ke benung celap dedigak.
“Ne..nulong aku ngambi baju celap ba dalam nyemari nya”
Neo lalu muka nyemari gari Milna taja pan ati ia berasai enda nyamai.
“Ia ke bechurak coklat tu?”
“Au , saut Milna pandak aja”.
Milna bepua baru laban celap. Berupai endar tubuh ia dedigak celap. Neo terus ke bilik besai. Bisi dua iti pua tebal dia lalu di ambi ia sereta di sua ia ngagai Milna.
“Makai mimit au?” Ko Neo ke muka bungkus asi ke baru di beli ia tadi.
Ba dalam ati Milna ia ngasai ke Neo tu cukup mentas lalu bisi amat ngembuan penelap ati ngagai ia. Bisi ati ia ka nanya nama kebuah,tang mulut ia berat ka nyebut. Milna ngunyah asi ke di suap Neo taja pan ia lembau makai.
Enda mukai-mukai ai mata Milna labuh, Neo nyau irau nama kebuah Milna tak nyabak. Nyangka bisi jaku aku ke ngasuh ati ia enseriban, ko ati Neo dalam nyin.
“Milna…….”
Neo duduk semak Milna. Runding ia berasai tusut. Enda berasai ia tak ngasai kediri tak mit amat ba mua Milna. Selama tu ia enda bakanya. Ai mata Milna ke ngasuh ia bakanya. Ati ia nyau asai ke begetar.
“Nama nuan nyabak?”
Milna ka madah ke utai siti, tang mulut ia tak berat. Neo lalu terus ke dapur pengudah ia meri Milna
Ubat. Milna tegenung kediri ba bilik ia. Ia ngasai ke diri lantang enti Neo datai ngabas ia, taja pan semina sekejap aja.
Berjimat amat Neo nyaga ia pengelama seminggu sampai ke ia gerai. Seminggu Neo enda gawa laban ke nyaga sereta ngintu Milna. Saritu Neo pulai ngagai kilang elektronik baru.
“Nama kebuah kita enda ngabas Milna lebuh ia sakit?”
“Kami nadai pemeri ke di beri ngagai ia.” Ko saut sida iya.
“Nya enda ngawa. Iya ke beguna,kita datai ngabas ia.”
“Bakanya ke? Mmmm Sinu kami ninga, nama gaga nuan dia deh?”
“Manduk asi bubur ke dempa ia”
“Tang nyamai neh, ngubat indu bajik baka Milna, pia ko Agnes Munica.”
“Nama reti utai ko nuan nya Agnes Munica? Neo berasai enseriban kena seriri.
“Au. Baik Milna enda mayuh leman. Enti enda tentu nadai siku orang ka enggau ia.”
Neo lalu ketawa, pia mega sida bukai. Tang meh berasai enda nyamai laban aku enda ulih bemalam dia. Lagi nama ko jaku orang. Benung sida lelengah berandau, Manejar kilang pan datai.
“Bedau berengkah gawa kita?”
“Tu udah pan berengkah. Ninga berita dulu,” ko Priscilla.
“Berita nama?”
“Endai…ukai enda Milna sakit”, ko Priscilla baru.
“Nama kita enda ngabas ia deh?” Ko Manejar nya baru.
“Nadai ari….mayuh pengawa….!” Saut bala sida.
Maya nya tak ngenyit Milna pansut lalu bejalai semak ngagai sida ke benung betugong berandau ngenang ia. Bala sida nyau tegenung meda ia. Agi jauh ia udah tuchum ngagai sida.
“Udah gerai nuan Milna?” Sida sama seretai nanya. Semua Sida nyau ninggal ke pengawa laban ka nemu peragam ati Milna.
Terima kasih, berekat ari sampi bala kita, diatu aku udah gerai. Lalu mega berekat ari ubat ke diberi Neo.
Neo udah bebendar ngidup ke aku. Ko Milna ke lalu nyeling ngagai Neo. Neo nyau nensam ke mua laban ke malu di puji Milna.
“Neo, anang malu, ko Priscilla ga”.
“Ukai Bantu ari aku tang ubat ke diberi dutor nya ngasi, ko Neo.
“Tang diatu aku udah gerai.”
“Hai Susylia ! Manejar kitai udah rindu ka ningga nyawa nuan belagu.
“Enda nemu belagu aku,” pia ko saut Susylia.
“Jampat meh belagu,” pia ko Milna ngansak baru.
“Susylia tuchum-tuchum malu”
“Nganti dulu meh wai, ari tu agi tumu endar,” pia ko Susylia.
“Nadai ….nuan mesti belagu dulu,” nya baru Manejar Jimmy ngagai endor bukai. Ko Milna.
Susylia lalu duduk ba bangku siti. Manejar Jimmy lalu duduk semak enggau ia. Udah nya dinga nyawa Susylia belagu. Milna tuchum ninga nya. Endang nyawa Susylia baka nyawa Diana Nini.
“Manejar Jimmy, Susylia, udah berengkah narit nyawa ia ko Milna. Seninjik ga Neo bisi enda jauh ari ia”.
“Pegai rekong aku, Na”.
“Sesikin aja pinta aku ari nuan, enda ngawa neh?” Aku berasai sunyi malam tadi. Berasai sunyi
laban enda ngubat nuan agi.”
“lalu nuan rindu meda aku sakit?.”
“Ukai bakanya…..!”
“Milna tuchum.”
Enti nyema Neo ila begawai makai selamat, baka reti betunang tauka khawin.
“Enggau sapa?” Milna……
“Au.”
“Aku mupok dulu au.” Alai meh ko Milna lalu tuchum.
Neo ningal ke bala sida ke kereja kilang udah ia ke meri terima kasih ngagai Susylia.
“Senang endar Neo lebuh ulih berandau enggau Milna”. Ko Agnes Munica.
“Di sampi ke wai, bisi kaban kitai idup senang ila. Jemah ila nyangka ulih ia nulong kitai ko
Priscilla.”
“Enti seduai ia bejaku, tak semak….nama agi enti kitai nadai. Nyangka lebih agi ari nya ko
Najore.”
“Tang irau, Milna meda ia baka biasa aja. Ko Susylia.”
“Orang indu endang ulih nyimpan peragam ati, enda baka sida ke lelaki.” Ko Priscilla.
Semua orang ke gawa ba bahagian tu nadai enda bejaku ke pasal Neo. Lebuh maya ngetu merarau, Najore enda ulih ngetat ke ati diri agi lalu nanya.
“Neo, pengelama nuan din, bisi ke enda Milna sampai nyium nuan?”
“Ah..nuan tu Najore, enti nanya utai, utai ke enda menuku aja ke ditanya”. Anang ke ensium ,
bejaku utai ke enda tentu pan enda. Ko Milna.
“Amat, tang aku meda enti berandau enggau nuan baka tadi, baka ia sayau amat ke nuan.”
Neo selalu nanya ke pasal kami sebilik, bakani indai Milna, bala menyadi, nama utai ke nyadi ba rumah. Lalu utai bukai, reti nya tanya ke biasa aja.
“Amat nya Milna….?”
Ari lemai kemari Neo udah datai ba rumah baru. Indai ia lalu nusi semua cerita ngagai ia. Arap ke Neo ulih napi utai nya enggau mujur. Nyau sampai jauh malam ia nganti nyangka Neo bisi ngangau ka ia.
Tawas pagi siti ia lalu berangkat ngagai kilang elektronik. Pengelama diau ba gudang, nya ke ngasuh Neo ngasai ke ari nyau angat, pengudah ke beserara enggau Susylia ba tisi jalai, enda lama udah nya ia bisi ninga munyi jeep datai semak ia.
Neo bejalai lantang, ia enda berani malik enggai ka deriba nya tak lalu terus mupok. Tang enda, jeep nya tadi tak ngetu betul endar ba sepiak ia.
“Selamat tengahari Boss.” Pia ko Neo.
“Niki meh, ko Brem”
“Enda ibuh pan, kamah aku ko Neo.”
“Nadai ngawa niki meh.”
Neo nitih aja laban Brem udah muka pintu ka ia.
“kini ka aya Runggai deh, Boss?”
“Sakit ia.”
“Oh..mayuh amat orang sakit diatu neh..?
“Au…baka aku mega.”
“Boss pan sakit ga? Ko Neo nanya enggau ati ti irau”.
“Au, pedis ati di tinggal ke indu kereja kilang elektronik ke bajik amat ke enda temu endur.
“Oh, minta ampun Boss, Jimmy ke ngasuh aku nulong Milna laban ia sakit.”
“Sakit ? nama pemedis ia ke bendar?”
“Angat, mutah-mutah. Ko lutor ia semina celap angat aja”
.
” Nuan nyamai gawa ba rumah ia? “
“Nama aja utai ti di asuh orang ke tinggi, sigi aku gaga.”
“Bakanya?”
“Au. Seagi-agi perintah nya bedau, tentu meh ia di gaga. Enda patut ga aku nyelepak ke bukai.”
“Nama tuju ati nuan?”
“Aku tu gawa ba kilang, sama baka kuli bukai, tukang kebun tauka penulong ke di beri ulih gerempong ngagai bala kuli ia.”
“Nemu ga nuan pasal hal tu?”
“Nemu. Ukai ke enda siku pengereja ka bisi siku pemantu enggau tukang kebun.”
Brem nyau irau, laban ke sekali tu Neo berani bejaku lalu semua utai ke di sebut ia amat magang.
“Tang nyelipak ke bukai mimit?”
“Reti ko nuan?”
“Peluang ari runding enggau akal ke pandak, ba siku lelaki ngagai orang indu.”
“O..Nyadi Boss irau meh..? Neo tekenyit”.
“Nyangka enti hal tu ukai nuan, aku enda ngasai nama-nama.”
“Tang aku nadai ngaga ulah enda manah.”
“Nurun nuan, Kingat anang sampai nuan ngereja pengawa ti enda menuku.”
Oh, nya baru Neo nemu ia udah datai ba semak Opis ia. Ia pan lalu berumban tama ke dalam Opis ia.
Brem lalu nerus ke pejalai ia nuju rumah Milna. Brem ingin amat ka mai Milna tu bejalai kediri.
Milna nyau enggai nyadi utai digaga, ia nyau salat kin salat kia. Nyau gegesah tudah tuai.
“Nuan ka kini? Ko indai ia nanya”
“Enda nemu meh indai, Brem mai aku bejalai enggau ia.”
“Nyaga diri manah-manah au.”
“Au, indai, ukai enda Brem tu Boss aku.”
Tang Milna udah tama ke dalam bilik mandi meresi diri dulu. Enggai enda enggai, terpaksa ga tudah Brem nganti Milna ke tembu mandi, udah mandi indah ia lalu begari enggau ngiyas mua diri. Udah tembu ia pan lalu pansut.
“Lama amat nuan? Ko Brem.”
Aku mesti mandi dulu, laban peluh. Kereta seduai lalu bejalai nuju langkau.
“Udah makai?”
Bedau.
Anang tusah, ba din lagi, pemakai udah sedia ka aku magang. Milna enda memunyi. Brem pan lalu masang kereta ia laju agi. Datai ba langkau, Brem madah ke ia bedau makai. Nama agi deh, Milna nyau berumban nyendia ke pemakai.
“Sapa manduk tu Boss?”
“Eh..beli aku ba Restaurant”
“Nama kebuah meli deh?”
Nyau tetenguk ka makai utai panduk ba Restaurant. Ko Brem.
“Nuan meli tu kediri?
“Aya Runggai”
“Nama ia madah sakit”
Brem pan tuchum.
Nuan ngemula ka aku neh? Kini ke aya Runggai?
“Bisi ba rumah ia”.
Seduai ia lalu makai sereta. Tang Milna tu masuk endar makai. Ia nyau nyuap penyuap. Lapar endar gaya ia di peda. Brem nyirut ke asap insap ia dalam-dalam udah seduai ia ke badu makai. Nyadi Milna ngemas semua utai ba dapur. Sebedau betemu enggau Milna, Brem ka madah ke pengesal ati ia ngagai Milna.
“Mil.. udah tembu nuan?”
“Udah”
Milna lalu nuduk ke diri enggau beradat. Mua ia selalu nensam laban enda berani meda mua Brem. Semina lebuh maya ia nyaut Brem.
Uji nuan nusi ngagai aku lebuh maya nuan sakit lalu di ubat Neo.
“Nama nya enda tau enda di padah?
“Aku ka nemu. Ko ia”.
“Baka selama. Neo rajin lalu bisi ngembuan penelap enggau pementas ngagai aku”. Ko Milna madah utai ke bendar.
“Nya aja?”
“Ngadu ke pemakai lalu meri ubat. Nama nuan enda dapat ngambi ubat kediri empu?”.
“Aku sakit enda dapat amat”.
“Bakani enti makai deh?”
“Aku di sapi ia. Ko Milna madah manah ngagai Brem, Brem nyau terdadang ninga jaku Milna madah ke Neo nyapi ia maya makai.”
“Nuan di sapi? Ko tanya ia baka ke enda percaya.
“Au, nama nuan enda percaya?
“Au…Tang….!”
“Din nadai orang bukai semina aya Egiman enggau aku. Jimmy datai nyau ngalih ke lemai”
“Tang nuan, oh…” Brem nyau baka orang ke mamau pendiau. Aku tu ari baruh ia. Lalu aku mega beguna ke bantu nggau tulong ari ia ke ngubat aku.”
“ Au, Aku mereti. Tang enti nyau sampai ke nyapi nuan ah…nya nyau ngasuh ia senang agi”..
“Aku tu sakit. Sigi patut ia bakanya”.
“Nama kebuah ia ngubat nuan?” ko Brem. Ngesal ke tanggung pengawa ke di beri ngagai Neo.
Nyangka nuan takut ia tinggi agi ari nuan. Tambah mega ia benung nembu ke pelajar ia.”
Brem enda memunyi. Milna enda nemu nama utai ke difikir ke Brem. Ia mega nensam ke mua enda memunyi.
“Neo, aku enggai meda nuan gawa ba ba kilang tu agi” Nyau pengelama baru Brem bejaku.
“Ia ukai boss nuan ke bendar. Ia datai laban ka ngiga utai ke deka di tulis ia”.
“ Nama ia enda ulih deh Boss?” Ko Milna nanya manah.
“Nama aku patut ke enda nulak orang ke udah manah enggau aku?”
Brem enda memunyi. Betul ga jaku Milna nya.
“Milna aku nemu nuan indu ke mereti, tang anang meh nuan nyambut sebarang pemanah ke diberi Neo”. Brem ngadu-ngadu ke buk ia. Bepusin ga untak enggau runding ia belaban penemu enggau Milna. Ia nemu Milna tu ukai siku ari indu rumah panjai ke beli. Ia bejaku enggau runding ukai semina enggau peneka ati enda baka indu bukai.
“Boss, pedis pala? Enda mukai-mukai Milna nanya”..
“Au, udah berapa malam aku enda ulih tinduk jenak”.
“Manah nuan belelak ditu dulu Boss.”
Brem lalu bejalai nuju ngagai bilik tinduk lalu ngerebah ke diri. Seduai lalu nadai bejaku agi. Brem tu udah kelalu lelak amat. Enda lama aja alai Brem pan nyau udah bekuruh. Nyau begadai-gadai tudah Milna ningal ke ia duduk ba meja semak enggau peninduk Brem. Seninjik endar dia bisi bup majalah lalu di bacha ia. Nyangka Brem tu sengaja meli ngambi ka bisi di bacha ia ba langkau. Milna nyinuk amat macha nyadi bala kedua benung jenak tinduk.
Ari nyau majak lemai. Milna nyau bertunjik ka meda jam ba jari Brem. Pukul lima dah diatu.
Sayau enda di bai bup sembahyang tadi. Enti enda bisi kena belajar. Pemuas ia ke segau-segau dalam bilik meda utai sebelah langkau. Emmm pun sawit nyadi saksi semua iya. Milna berunding kediri. Ia pan nyau kasak-kasak, ka ia ngerak Brem tang enda kempang.
Tambah mega ari nyau majak petang ba langkau. Begadai-gadai ia duduk semak Brem, enda sengaja punggung ia teseging ke lengan Brem. Brem lalu tedani.
“Ohh…,Brem ngeliat.”
“Udah lemai ari Boss.”
“Hemmmmm?”
“Udah petang ari tu aku mesti pulai jampat ke rumah”. Brem nganguk ke pala sambil murus mua ia. Ia enda ulih ngaga nama-nama laban Milna duduk jauh ari ia. Milna datai di rumah nyau salah kelala. Apai enggau indai ia nganti penatai ia enggau mua ke masam. Apai enggau indai ia mimit enda meh nanya Milna.
Milna nyau tusah ati ia nyau enda nemu utai di gaga agi.
Tak tiap hari Neo bejalai kediri lebuh maya pulai gawa. Tak berasai enda nyamai ia nadai Susylia, sulu enggau ia berandau ba jalai. Bedau agi datai ba jalai, alai bisi dinga bunyi kereta nuju ngagai tunga ia.
Di peda Milna nitih ka ia ngena kereta kancil ia empu. Udah berapa ari Milna tu enda nyamai pendiau. Neo pan runggu. Lebuh di gagai , belubah-lubah ia ngenyauh kediri.
Ne.. ngetu dulu! Ko kangau Milna laban Neo tu majak bejalai taja pan ia ngetu ke kereta ia. Neo pan lalu ngetu seraya ngendas peluh ia ke nelusur ba mua ia. Milna lalu muka pintu kereta lalu terus nurun mansang ngagai Neo ke bediri cegit-cegit.
“Ne..tua ngiga endur kelindap dulu au.?”
“Nama utai deh..Na?”
Milna lalu megai jari ia. Bisi tanah ke di tugong ke orang semak tisi jalai ba madang bungai. Seduai ia lalu duduk dia.
“Ne…nama nuan tak runggu di peda aku. Nama nuan bisi penusah?” Ko Milna nanya Neo.
“Nadai,” saut Neo pandak aja.
“Aku merati ka nuan tak nadai tuchum, enti aku semak nuan nuan nyau ngenyauh kediri ari aku. Nama aku bisi ngaga penyalah ba nuan?
“Enda, pecaya meh”
“Aku sigi enda pecaya. Ngelamatu nuan nadai bakanya.” Neo nensam ke mua ia. Ia tusah ati. Nama utai ke patut di pansut. Utai tu utai ke enda tau di padah lalu enda tau temu orang. Nama agi Milna. Enda mudah ia madah ngagai Milna.
“Nama nuan bisi penusah ba pengawa tauka bisi penusah nuntung bala kita sebilik?” Ko tanya Milna baru.
Neo lalu merening mua Milna lalu ngilik ke pala.
“Ne..nama nuan enda pecaya ke aku?”
“ Pecaya. Nama utai ke deka di pansut ke aku ? berapa hari tu aku lain asai…..”
“Au, nama kebuah, mesti bisi utai ngasuh?”
“Entah meh aku pan enda nemu”
“Ohh..nuan belalai ke utai ngagai aku. Aku nemu enggi Boss, tentu berasai enti siku ari anakbiak ia bisi kena penusah. Nama agi enti utai nya nyadi ba nuan”
“Nuan enda ibuh ngiruh diri mikir ka aku”
“Enti aku enda meda nyangka ga ulih, padah meh ngagai aku enti nuan amat bisi penuah”
“Nadai, aku semina lembau aja”
Milna asa ati laban enda ulih ngerawang penusah ke di sepi Neo.
“Aku pulai dulu Na..”
Awak ke aku nganjung nuan, ko Milna terus berdiri.
“Anang”
“Nama deh?”
“Meri malu nuan aja. Lagi enti bala kaban Brem meda, nama ko jaku sida?”
“Nya pengawa aku”.
“Aku enda ngasuh nuan napi penusah aku tu laban aku…………..”
“Oh..nuan ngiga jalai ngambi nuan ulih kediri ari aku.”.
“Enti nuan nganjung aku….”
“Oh..nya baru sebut nuan”
Milna nensam ke mua lalu duduk baru ba tanah lalu jari ia dua iti nya ngeranjai-ngeranjai tanah. Neo lalu duduk manah sepiak ia.
“Nuan anang ngemedis diri laban aku. Nuan mesti nyaga pemanah nama nuan ba kilang tu”.
“ Aku ukai bisi ngereja pengawa enda manah. Nama aku bisi ngereja utai enda manah enggau nuan? Nadai enda?”
“O..nuan salah angap. Ukai nya ko aku. Nuan anang kelalu semak enggau aku. Aku tu semina orang ke makai gaji ba kilang tu”.
“Tang nuan diatu benung ngaga kertas kerja sereta aku mega tau enggau nuan. Nama agi laban aku ka madah ngagai Boss besai Mr.Brem ngambi ka ia niki ka nuan pangkat nyadi Supervisor”.
“Awak ke aku pulai kediri”, ko Neo merani kediri.
Milna tekenyit baru. Runding ia nyau tusut baru. Di peda ia Neo agi duduk manah ba atas tanah enggau mua ke tusah. Milna lalu bejalai nuju ngagai kereta ia. Asa meh ati ia.
Udah nya Milna lalu ningal ke Neo kediri aja. Enggau ati ti tusah ia pulai ke rumah. Serantau-rantau jalai ia nyabak. Datai di rumah ia lalu ngali kediri nyabak enggau naka pemuas ia.
Bakatu meh Milna. Orang ke ditapi ia ukai orang biasa. Ia nesal kediri empu. Nama kebuah enda ngelaban amat-amat baka bala anakbiak rumah panjai bukai ke nguji nundi ia? Nama, laban nyangka semua sida tu di guna ia magang? Engka. Neo nyesal nama kebuah ia diada ke nyadi anak orang kereja kontrek? Lalu nama kebuah ia gawa ba kilang nyadi pelatih sampai ke ia bertemu lalu bekelala enggau Milna ke gawa ba Opis ia ba kilang nya.
Nya meh kebuah Neo dipeda runggu endar. Kekadang tebantai ga runding ia ka nitih ke aya ia ngagai Kuala Lumpur. Tang, enti di kenang ngagai indai ia, ia enda sanggup ningal ke ia.
Kasih, sapa ke agi ke ulih mantu ia ba rumah, meda bala madi ia ke agi tinggal semuanya lelaki magang. Sida tu agi sekula. Nama agi Andy ke benung peresa ba pom lima. Enda patut ia di panggai ke ngagai pengawa ba rumah. Ia mesti belajar enggau nadai utai nangur.
Neo nyau kasak-kasak kediri empu ba bilik ia. Runding ia ingat ngagai Milna. Ia enda nemu nama kebuah ati ia bakanya. Tambah ka ia empu takut ke Brem ke besai kuasa ba kilang nya. Sebarang maya ia ulih di buai Brem.
Pagi siti Neo nurun gawa. Ingin amat ati ia ka datai jampat laban deka nemu berita Milna. Datai ba Opis, nemu nya nadai siku orang berandau ke hal seduai ia. Nyangka sida bedau nemu nama utai ke udah nyadi ba seduai. Indai Neo pan diau aja. Ia nadai madah ke utai ke udah nyadi ngagai sapa-sapa. Enda mega ngagai Mathias Suky. Lalu kemaya nya mega Mathias Suky datai mai berita pasal Milna. Ia madah ke anak Tokey ke bempu kilang ngurung diri dalam bilik sampai nyau jauh malam. Mimit da nyau ka dipecah ke Dandy pintu.
Tang anang irau, kita ulih gawa baka selama, ko Mathias ngenyelap ke ati bala anakbiak ia. Neo ngarap ke Milna ngagai Opis ia pagi nya. Ia ka minta ampun amat-amat. Tang utai ke dianti ia lalu enda datai-datai. Milna enda ngetu ngagai Opis Ia sampai ke orang ke kereja kilang nyau ambis pulai kerumah diri empu.
Neo nyau merampau. Agi bedau ari pagila deh, pia ko ati ia. Nyau sampai ke tiga ari Neo enda mandang ke mua diri ngagai Opis ia.
“Ni Neo?” ko Najore.
“Nyangka ia agi mayuh pengawa nembu ke skrip ia.”
“Nyangka Milna aja nemu,” ko Priscilla.
“Nama kebuah ia nadai ayan ditu?” Ko tanya Mathias Suky.
“Dorita…ingat nya kaban nuan”.
“Bekaban pia aja, semina bejalai meda wayang nya enda ga tau?”
Semua bala nyau capuh ketawa. Mathias Suky ke dipeda serious pan ketawa mega. Udah nya sida bisi ninga munyi nyawa motor datai, sida pan lalu ngetu ketawa lalu berumban nyambung pengawa sida ia .
“Ish…mandur Richard ke datai, ukai Milna”.
“Amat endar. Ia ke datai Richard, ukai Milna sida pan lalu asa ati”
“Hei, kami ka ke Milna datai ukai nya nuan,” ko Priscilla.
“Ah.!.deh..tak enda di sambut enggau manah penatai aku. Ngasuh nyau di buru” ko putap Richard ke nyau celum ngeretum.
“Nama nuan kitu deh? Ni Milna deh?”
“Aik! Mathias Suky? Bakani gaya bala anakbiak?” Ko Richard.
Mathias Suky tuchum aja.
“Endang sida bisi ringat mimit laban Milna berapa hari tu udah nadai datai kitu”. Pia ko ia.
“Nama nuan bisi medis ati ia?”
“Aku ka nemu, tengil Richard baru”
“Saut dulu, dini endor Milna?” Ko Priscilla balat agi.
“Nganti dulu, aku bisi mai berita.”
“Berita nama?” ko Priscilla.
“Milna bedau ulih kitu laban ia agi sakit”.
“Ba hospital ni ia diatu?”
“Ko Milna madah, ia ka diau ba rumah aja. Enggai ngambis ke duit diau ba hospital’.
“Alit ati, Milna tu orang ke landik. Nama kebuah ia enggai ngagai hospital?” Ko Mathias Suky.
“Enda nemu meh, ko Richard”.
Naka meh penusah ati Neo lebuh ia ninga berita Milna. Maya pulai gawa gamal ia runggu endar. Ia tak enda sangup beserara enggau Milna ke baru gerai.
Neo nyabak sepemanjai jalai alah ia nyau datai ba rumah. Enda nyangka utai tu bejurut-jurut. Suah amat kaki ia tersipak ke batu sampai tali selipar ia nyau putus. Nama deh nyau enda ngena selipar tudah tuai pulai ke rumah.
“Milna sakit baru, indai. Ko Neo madah ngagai indai ia”.
“Oh.. Tuhan. Bisi aja utai medis Milna tu. Arap ke ia jampat gerai meh”. Nuan enda ngabas ia kin?
“Entah”
“Baik aja Susylia enggau nuan.”
“Eh..malu ku indai”
“Tusah amat. Lagi enti tuai kampung meda nuan kin, tusah agi”. Neo nyau ikak. Enda nemu nama utai ke patut di kereja. Ujung, ia pan lalu tama ke dalam bilik. Ia berasai tusah ati. Maya aya Runggai ke datai ngambi ia, ia nitih enggau enda bejaku seleka. Udah semak seminggu ia enda betemu enggau Brem. Kala sekali ia bisi meda Brem benung ngetu tisi kebun, nya pan peda ari jauh.
Neo bedau nemu cerita ke bukai. Nyadi Brem nganti penatai ia laban ka minta ampun. Neo tuchum lelegup lebuh ia bertemu enggau Brem ba kilang.
“Nama kebuah nuan tu Neo? Tak puchat aja gamal nuan,” ko Brem nanya.
“Enda nyamai isi Boss,” ko Neo ngemula ke Brem.
“Udah ngagai Klinik?”
“Bedau”
“Aku bisi ubat. Pedis pala? Batuk? tauka celap angat.
“Entah meh”
“Uji nuan makai ubat tu”
“Au, lagi”
“Diatu”
Neo ngambi ubat nya lalu terus ke dapur ngambi ai. Udah ia nentu ke Brem udah duduk, ubat nya lalu di tikau ke ia ngagai babas ke semak dia. Ia semina ngirup ai teh nya aja lalu duduk keatas baru.
“Udah telan nuan ubat tadi?”
“Udah Boss”
Manah meh nya, enti nuan ka diau ba rumah alai meh, ko Brem. Terima kasih Boss. Pemeri nya di terima Neo enggau senang ati. Ia lalu pulai ke rumah lalu enda datai ngagai kilang agi.
Ati ia berasai nyamai udah datai ba rumah. Tang ati ia agi ketap-ketap lebuh Limai madah ke mandur Mathias bisi kitu.
“Nama utai ko ia , Imai?”
“Nadai nama-nama. Aku enda nemu kini ke penunga nuan. Nasit bisi indai madah ke nuan udah nurun ke kedai.
“Oh….bisi utai?”
“Ko ia Mathias Suky ka datai kitu baru”.
Bedau nyau pengirau ia, diatu datai baru ga utai ke ngasuh ati ia kesal. Anang-anang berita Milna. Berumban ia nanya ngagai indai ia.
“Milna semina nanya ke pengerai nuan”
“Enda nyadi ngagai hospital?”
Enggai ko ia. Tang dutor madah ia enda tau segau-segau. Ia semina ngenat ke diri ba bilik tinduk. Ubat ia di beri.
“Enda ngasi ke jaku Milna tu, ko putap Neo”
“Enda ngasi? ko tanya indai ia”
“Enda ngasi meh laban enggai ngagai hospital”
“Nyangka nuan ka diasuh ia ngagai kilang baru”.
“Nama Mathias Suky bisi madah bakanya?”
“Nadai…di engaka ke aku aja.”
“Bakani enti nuan di asuh ngubat ia deh Neo?”
“Apa boleh buat, enti ia beguna bantu ari aku”. Lagi bakani enggau Brem? Enda nemu meh, Neo ngesuh ke seput ia. Enti nuan ka ngubat Milna, ubat meh. Asal nuan ulih napi semua utai. Aku indai nuan bisi berasai enda lantang ati sereta pengirau. Pengelama indai nuan tu idup, bedau kala aku ninga apai nuan bisi gila enggau indu bukai. Aku takut engai ka bisi anak aku nyadi ke buah mulut orang bukai.
“Nama Milna tu amat nyadi ke pangan nuan?”
“Bakanya meh , saut Neo pandak”
Nuan mesti berfikir endar-endar ke hal tu. Amat meh ia bisi kuasa ba Opis. Angka Brem mai nuan bemunsoh ila. Neo enda memuyi ninga jaku indai ia. Semua utai ke disebut indai ia amat magang.
Ia tegenung mikir ke nya. Tang bakani cara ka nyeliah ke Brem? Semua utai tu udah nyadi lalu ia enda nemu bakani cara nyeliah ke Brem.
“Sapa orang tuai engai meda anak ia senang. Tang penyenang tu mesti ari ke betul. Anang nyau ngasuh orang pedis ati. Aku ka agi meda nuan jadi enggau orang sengapa. Ba pengaya, enti kitai nguji, tentu Petara ka meri kitai utai ke di niat ati kitai. Aku,ngakun suba aku ka meda nuan idup senang. Tang diatu, meda enggau nyata, kitai selalu takut, irau enggau utai ke bukai. Aku nyau takut lalu berfikir seribu kali, Neo.” Ko indai Neo ngabis ke jaku ia.
Indai Neo ngendas ai mata ia, pia mega Neo. Amat endar jaku indai ia nya. Diatu ia ngambi pemedis. Benung seduai agi tegenung, alai datai tudah Mathias Suky
“Bejalai ke pasar nuan tadi?” ko tanya Mathias Suky.
“Au, saut Neo”
Agi berupai endar Neo enggau indai ia baru badu nyabak.
“Laban nama tu?” tak tusah ati aja.
“Nadai nama-nama”, ko indai Neo.
“Nama utai Mathias?”
Mathias Suky nyintak seput lalu nyapu peluh ia.
“Milna, Ne..”
“Au, nama deh?”
Enggai ngagai hospital. Ulih ko dutor asal ia diau ba rumah manah-manah. Sapa agi ke ulih nyaga ia enti enda nuan, Ne…
“Nyadi aku minta nuan datai ngagai kilang lalu ngubat Milna”.
“Nama nadai orang bukai, Mathias?”
“Orang bukai endang sigi bisi tang Milna enggai orang bukai ngubat ia”. Indai Neo lalu tama ke dapur ngaga ai kopi ke temuai.
“Kasih ia enti nuan enda kin. Merinsa amat ia celap angat datai baru. Kekadang nyau gegetak. Enti ulih jampat meh nuan kin.”
Neo baka ke benung berfikir. Mandur Mathias Suky nganti enggau ati ti kesal enggai ke Neo lagi tak enggai. Baka Milna udah nusi ke nama kebuah ia labuh.
“Bakani indai, aku di asuh Milna ngubuat ia baru”.
“Tepangai ngagai nuan. Manah agi nuan kin aja.”
“Kasih meh ia. Aku ka ngagai Kuala Lumpur, tang Milna madah enda ibuh, aku kin diatu.” Ko Neo.
Neo datai ba rumah Milna kira nyau ka salah kelala. Aya Runggai ke nyambut penatai ia enggau ati gaga.
“Manah meh nuan datai anak”. Enti enda, enda nemu meh.
“Iya lapa deh aya?”
Aya pan enda nemu bakani? Ari tadi mayuh orang datai ngabas ia. Brem ke ngasuh ngagau ke nuan.
“Amat nya?”
“Sumpah. Brem ke madah bakanya.”
Neo nyimpan utai ke deka di sebut ba bilik besai. Pintu bilik Milna agi di tambit endar. Ia nekung pintu tang nadai ga saut.
“Buka aja, telai aya ia Runggai.”
Begadai-gadai Neo nukang ke pintu bilik Milna lalu terus tama. Neo lalu merening ngagai tungga mua Milna. Sinu, sinu amat. Nama Milna tak enda memunyi diau aja? Agi ringat ia ke? Ampun meh aku , ko telai ia nyau getar-getar.
Labuh neritik kuyu ai mata Milna. “Nama amat ke enda aku di asuh kitu? Nama nuan enda memunyi deh?” Neo nyau majak sinu meda Milna nyau enda memunyi.
“Ne..,aku amat berguna ke nuan…anang nyabak….nuan enda salah…aku tu ke salah….aku tu ke bam….” Milna bejaku seraya murus-murus buk Neo.
“Anang nyabak aku enda kala nganu nuan”, ko Neo lalu ngangkat ke mua Milna. Mulut ke manis nya nyau merah. Mata ia nyau perencing baru pengudah ia ninga jaku Neo ke ngasuh ati ia celap.
“Tuchum meh, aku ka meda tuchum manis nuan” Ko Neo nundi Milna, nya ke ngasuh Milna ketawa geli ati.
“Aku enda kala nganu nuan amat-amat”.
Oh..Milna tuchum baru sambil ngendas ai mata ia. Milna lalu merap ia, nama deh besium meh seduai ia ti keterubah iya.
“Nuan mesti ngasai ke ati aku ditu. Ne..nuan mesti ngasai ka”. Ko Milna nyau getar-getar.”
“Na., Bisi nyawa orang nelai dedinga pending ia, bakani gaya pendiau seduai Brem deh? Sekali ka nuan nerima lelaki dua iku seretai? Nemu nuan utai tu enda mudah nyadi. Nuan mesti Milih…….Milih…….”
“Ne…Neo..peda meh mua aku sayau…, nyawa Milna nyau ngirau ke ati ia”. Tekala nya ia ngangkat ke pala Milna.
“Nama nuan tunduk aja?” uji nuan malik kitu.
“Neo lalu tuchum”
“Nama utai di fikir nuan agi?”
“Nadai, nadai nama-nama. Aku beterima kasih laban nuan udah ngampun penyalah aku”.
“Aram duduk ditu. Laban tu kedua kali nuan udah ngubat aku. Aku minta nuan ka aja au?”
“Aku ka laban pengerai nuan”. Lama seduai enda memunyi udah nya.
“Nama nuan udah makai?” ko tanya Neo udah nya.
“Bedau”
“Bubur tauka asi kering?”
“Ni aja.”
Milna berasai nyamai laban Neo bisi semak ia. Tambah mega Neo nyapi ia makai.
“Ke bendar , aku ulih makai kediri. Ko Milna.”
“Anang, awak ke aku nyapi nuan.”
“Ke bendar aku ka semak nuan.”
“Ari kemaya?”
“Ari aku ngelala nuan.”
Udah ambis makai ubat, Milna ngasai ka tulang ia lemi endar. Neo ngebab ka pua ngagai tubuh Milna.
“Tindok au?’
“Agi tumu tu. Nuan ka ninga lagu?”
“Enggai.”
“Tang aku ka meda TV”. Udahnya Neo pan lalu masang TV.
Milna meri tanda awak ke Neo duduk sepiak ia. Neo nyau nyinuk meda TV. Tang meh tudah Milna nyau nyinuk merening mua Neo.
“Nyinuk amat nuan meda TV. Ne, ko Milna.”
“Jerita nya manah amat.”
Kekadang nyeling ga Neo ngagai Milna. Dia ia meda Milna tinduk manuk. Neo madam ke TV enggai ke ngacau.
“Nama deh?”
“Nuan mesti tinduk.”
“Enda ngantuk aku. Semina pedis pala”
Nyau begadai-gadai Neo micit-micit pala Milna. Umur Brem enda jauh takah enggau Neo. Dua iku lelaki nya sama-sama pengering. Brem tu gangam sereta besumit tebal, nyadi Neo tu sigat sereta ngembuan penelap enggau penyiru. Tambah mega ia ngembuan pengelandik.
Neo mupuk ningal ke Milna udah ia nentu ke Milna tu udah jenak tinduk. Ia nemu nama utai ke patut di adu. Pukul nam setengah Neo nyenguk Milna baru. Peda ia Milna udah dani.
“Selamat pagi,” Ko Neo.
“Pagi. Milna asai ke deka mandi ai angat.”
Enggau naka penyimat Neo ngiring Milna ke bilik mandi. Udahnya semua utai pan tembu magang. Milna nyau berengkah ngasai ke isi ia nyamai agi.
“Terima kasih , Ne.”
Neo malas enggau tuchum. Milna rindu amat ke tuchum Neo. Cukup lemi ti ngenyelap ke ati ia, taja pan Neo siku ari anak rumah panjai, tang ia nguj deka ngaga maya nggau jam ia di titih belama.
Milna endang udah nemu, maya jam pukul lapan pagi lagi Neo endang sigi datai mai utai di empa. Seraya ke nganti, Milna mejam ke mata ia memua ke Neo. Amat nyau nyinuk sampai ke Neo tama ke bilik mai utai di empa pan ia enda sedar.
“Angkat, makai dulu..”
Rindu amat Neo nyapi Milna sampai ke seduai enda ninga orang masuk ke dalam bilik.
“Selamat pagi!”
Milna malik ngagai pintu. Baka nya ga Neo. Seduai ia nyau tegenung baka empelekong mabuk ambuh, ngetu baka puyu mabuk keruh meda siku temuai ke datai enda di padah.
“Aku ninga Milna sakit, nyadi aku datai ditu laban ka ngabas ia.”
“Lalu meh duduk, Brem.” Ari ni nuan nemu berita tu? Ko tanya Milna.
Berita nya datai din. Pagila aku ka ngagai Brunei. Nyadi aku ngetu enda lama laban ka meda nuan.
“Terima kasih.”
Neo ke benung duduk ba tisi katil Milna nyau enda sempat mindah ngagai endur bukai. Asai ati ia nyau enda nyamai. Nadai sekali-kali ia nyangka Brem datai kia. Brem duduk atas kerusi ke di bai aya Rungai ari bilik besai.
“Neo, pajak ke, Milna nya benung nganti.” Pia ko Brem madah enggau lantang.
Neo nyapi Milna baru. Tang meh jari ia nyau gegetar. Bisi kedua nya nyau ambis naya ningang dagu Milna. Enggau naka penyimat neo ngelap dagu Milna ke basah. Milna tuchum meda Brem ngetat ke seput ia ke nyau terbatuk-batuk.
“Brem pan batuk ga?” ko Milna.
“Au, saut ia seleka aja.
Nyau enda engkesap Brem ngemata ke ulah seduai dua iku nya ba mua ia. Ia mesti ulih ngenat ke ati diri meda utai tu lalu ngaga diri nadai nama-nama sereta baka ke rindu ke pangan. Taja pan ia enda rindu meda ulah ke di gaga Neo.
Cukup pengelemi, penyabar enggau naka pementas. Neo meri Milna makai ubat. Brem nyau mejam ke mata lebuh maya Neo meri Milna makai ubat. Nyau setengah merap ia laban Milna udah bertumpu ba siku ia. Neo lalu ngendas dagu Milna enggau mulut Milna enggau naka penyimat.
“Ne..terima kasih.
Brem nyau nyintak seput begadai-gadai enggai ke di dinga orang.
“Neo..naka penguntung bisi anakbuah ke ngemajik Milna”. Ko Brem enda mukai-mukai.
Milna tuchum aja, lalu ko ia. “Semua orang rindu ke ia, ukai semina lelaki tang indu bukai enggau indai orang rindu ke ia. Ukai semina bajik tang nelap sereta enda sumbong. Aku ulih ngasai ke semua lelaki nguji deka semak ia. Nyangka nyengkaum aku sereta enggau Brem mega”
Sendat baru ga dada Brem.
“Nyangka semua lelaki bepekit.” Ko Brem.
“Udah tetap nya. Mina bisi ya ke dipeda enggau enda nyengala.”.
Brem enda memunyi. Jaku ke di pansut ke Milna cukup tajam sereta berani. “Aku rindu meda ulah Neo. Ia enda kala surut enggau jaku pujuk. Entah nama enda utai ke di niat ati ia ke jemah ila. Lelaki ditu enda berani ngacau ia”.
“Reti ko nuan?”
“Nyangka ia bisi niat kediri.”
“Brem semina tuchum lelesey.”
“Aku datai kitu ukai deka belaban penemu enggau nuan tang deka ngabas nuan”
“Nyadi Neo. Ko Milna”
Brem enda sangka Milna cukup berani nyebut utai nya ke lalu nuduh ia. Randau seduai nyau ka nyadi laya taja pan bisi lebas.
“Enti aku madah ya, bakani deh?”
“Baka aku ke empu bilik, aku madah aku sigi beguna ka ia ditu. Tambah mega ia anak buah aku. Aku bisi hak ngasuh sapa-sapa aja nulong aku”.
“Lalu nama utai ke di kingin Milna diatu?”
Bala ke kereja kilang enggai meda bala orang ke ari atas dia ngereja utai peneka ati.
Brem nyau berasai takut napi jaku Milna. Neo ke tama ke dalam bilik ukai deka ngacau randau seduai. Jampat singkang Brem pansut ningal ke Milna lalu enda malik ngagai ia ke benung nyandih gegetar ba dinding bilik.
Milna merening enggau tajam ayas belakang Brem. Pengeringat ia nyau udah niki, atau ia nyau kelau-kelau ke ngujung ke ia nyau luput. Milna tegali ba geladak.
Neo nyau temati kutu.
“Milna, Milna, ngeleda meh, ko Neo ke benung mangku Milna ba pah ia”.
Milna lalu encelak ke mata ia lalu nyabak.
“Ampun meh aku Na..ampun meh aku….”
“Nadai nama-nama, angkat meh, Milna bejaku sambil ngetat ke pemedis ia.
Neo nulong Milna ngagai peninduk ia. Milna nyabak garing-garing ba katil ia empu. Kesal ketegal ke ringat ngagai Brem, diatu nyau labuh nengah ai mata. Neo lalu merap ia enggau balat agi.
“Anang nyabak ila orang nemu.”
“Nuan mesti bebendar, Na mesti kering. Ukai baka aku ke beli tu”. Ko telai Neo.
Jako perangsang Neo nya ke ngasuh ati ia liat agi enggau pengering ngagai Milna. Neo ngendas ai mata Milna. “Aku takut nyau nuan, aku enggai meda nuan merinsa”.
Mensia ulih ngerancang, tang Tuhan ke nentu ke semua utai tu.
“Na….anang mikir ke utai tu. Awak ke aku mutar ke nya ke diri taja pan kami tu datai ari anak orang
rumah panjai”. Ko Neo baru.
“Enda, aku udah bisi sangkut paut ba tu.”
“Aku enggai meda bisi laya antara nuan enggau Brem. Semua utai tu salah aku”
“Ulih kah nuan enda bejaku ke utai nya agi?”
“Ya ke beguna endar, nuan mesti gerai dulu”. Ko Neo.
Dinga bisi orang ngetuk pintu, Aya Runggai lalu tama ke dalam. Neo pansut enda memunyi meda ia pansut aya Egiman ngelawa ia lalu nanya.
“Bisi utai nama-nama, Neo?”
“Nadai nama-nama Aya.”
Neo lalu nerus ke ke pengawa ia. Aya Runggai udah tembu enggau pengawa ia ba dalam. Ia lalu nulong Neo ba dapur ngica ke pengawa ia jampat tembu.
Neo tama ke dalam bilik mai segelas ai. Milna di peda ia enda terenah, tang ia enda nulak lebuh di beri ngirup ai limau. Jaku terima kasih aja nadai di dinga baka ngelamatu. Pia mega maya makai tengahari, sida agi enda memunyi tak diau diri aja. Udah makai ubat, pan nadai meh jaku terima kasih pansut ari mulut Milna.
Udah masu jari, ia pan lalu nuduk ke diri tisi Milna. Nama utai ke ka di adu ke ia lagi, pia ko fikir Milna. Nama deh jari ia ke lemi nya lalu begadai-gadai murus sereta micit-micit kening Milna. Neo nutup kulit mata Milna enggau jari ia.
Milna pan lalu nemu nama tuku nya. Neo ngasuh ia awak ke ia jampat tinduk lalu belelak. Tang bakani ko ia ka tinduk enti ati ia agi tusah?
Aya Egiman madah ke Neo bisi bala kereja kilang deka ngabas Milna.
Neo ngasuh sida tama. “Begadai-gadai au. Milna baru lelap amat”. Ko pesan Neo.
Neo ngadu ke kimono Milna ke nyau ka tebuka. Bala kaban ia tuchum meda Neo ngadu ke kimono Milna enggau naka penyimat.
“Tubuh ia enda angat agi, Ne..Telai Agnes Munica”
“Enda, tang demalam pengangat ia ukai memain.”
Milna tedani, ia alit ati meda bala kereja kilang datai ngena ngepan ke manah.
“Miss Milna..kami semua besampi ngajih ke nuan jampat gerai”.
Terima kasih, ko Milna ke merening ngagai Neo ke bediri semak ia. Ia narit jari Neo awak ke duduk sepiak ia. Tang Neo semina nyerungkong. Milna narit jari Neo baru lalu di tekan ke ia atas dada ia, lalu di sium ia. Mua Neo nyau merah laban ngetat ke malu.
Semua bala sida ke kereja kilang ke meda berasai temegah ati. Sida iya nemu Milna tu sayau amat ke Neo. Milna ka mandang ke pengerindu ati ia ngagai bala sida ke kereja kilang.
Milna baru udah tembu makai, munyi lagu didinga manah endar ba bilik ia. Ia nyandih ba tisi katil. Siku-siku bala amah ia di kangau ngambi ke ngagih ke pengawa ke enda tau enda di tembu enggau jampat.
Nyau sampai pukul semilan malam, Milna agi ga berandau enggau bala orang gaji ia, maya ia tama ke dalam bilik besenentang enggau Neo.
“Udah gerai?” tanya Neo.
Endang ari tadi Milna endang di peda gerai. Aku udah ulih bediri, ko ia sambil gali garing-garing.
“Nuan tu ingkar,” bakani ka jampat gerai enti bakatu?
“Ne..aku ingin amat ka meda nuan enda gawa agi”.
“Tuju nuan? Aku gawa awak ke pengidup apai indai aku enda berat”
“Aku mereti, berengkah ari saritu aku ka mantu nuan”. Neo nunging ke mua lalu enda memunyi. Bedau kala Milna nyebut pasal tu ba mua ia.
“Aku meri besai terima kasih ngagai tuju ati nuan. Tang nama utai tu udah di fikir nuan mansau-mansau?”
Anang sampai ila nuan nesal. Kami sebilik enggau kitak sebilik jauh amat takah. Baka langit enggau tanah. Utai ke di kenangi ka aku ianya ati mensia ke nemu berubah”.
“Ne.., nyangka nuan enda percaya. Ia nya aku udah mikir ka utai tu dalam-dalam. Aku rindu ka nuan lalu aku enggai labuh ngagai jari Brem”.
“Aku enda peduli”
“Runding tu, apai enggau indai nuan bedau nemu hal tu enda? Bakani enti sema bala sida nemu nuan bepangan enggau aku anak rumah panjai baka aku”.
“Apai enggau indai aku sigi ulih nerima nuan”.
Milna merening mua Neo enggau penuh pengarap. Neo nunging ke mua ia. Milna narit Neo lalu di berap ia.
“Padah ngagai aku Ne..padah meh nuan sanggup nyadi ke laki aku”. Nyawa Milna bisi gegetar mimit.
“Sigi aku sebut meh nya ila tang nganti aku udah tembu enggau Brem, telai Neo ke lalu ngelengka ke berap Milna”.
“Nama nuan ulih ngadu ke nya?”
“Sampi ke meh aku ulih ngadu ke nya ngena cara kami pungka lelaki.”
“Alah tauka menang aku sigi enda nerima Brem”.
“Na. anang bakanya, aku enda arap nuan ulih napi utai tu”.
“Jalai ke pengambis manah ia nya tua jampat kahwin”. Ko Milna.
“Nuan anang takut, awak ke aku kediri ngadu ke utai tu enggau Brem”.
“Anang, sua ke hal tu ngagai aku”. Ko Milna baru. Enda! Brem tu pandai enda ulih tapi nuan. Semina pengasar ke bisi ba aku kena aku napi ia.
“Lelaki dua iko ke berebut ke nuan”
Milna nyadi kesal sereta takut. Pala ia nyau tengut-tengut pedis. Dada ia berasai angat lebuh ngenang Brem. Orang ti tegap ba kilang nya, hal tu nyau majak nanggur. Ia nyau berasai kasak-kasak, mutap lalu gut-gut kediri.
Neo nemu utai ke di asai ke Milna. Ia nyaga Milna enggau naka pemanah sereta enggau cukup pementas. Ia sangu nyaga Milna laban indu nya enggai jauh ia.
Milna udah tau ngagai Opis ke enda jauh ari rumah ia. Ia mega meresa pejalai syarikat. Sida ia nyambut Milna enggau tuchum lebih agi lebuh sida nemu ia bepangan enggau Neo.
Neo minta pemendar laban ka pulai ke ke menoa ngabas bala menyadi enggau apai –indai ia. Milna udah nadai asai agi di tinggal ke iya. Taja pan baka nya.ia agi berasai irau.
“Bakani gaya Milna diatu? Ko indai ia”
“Nyau manah ga ia diatu indai”
Ko mandur Richard, Milna enggai tinggal nuan. Bakani nya?.Indai ia nyau tusut runding.
“Anang irau indai”
“Amat Milna rindu ka nuan?”
“Amat”.
“Bakani engi Brem deh? Nuan sanggup napi ia?”
“Sampi ke aja awak ke aku ulih nyelesai ke utai tu enggau Brem ngena jalai ke manah”.
Mandur Sily datai di rumah enggau ati gaga laban Neo bisi di rumah.
“Bisi berita madah ke Milna udah gerai? Ko tanya mandur Sily.”
“Au bisi, tang bedau tentu ulih gawa”.
“Ne..tadi bisi Brem ngagai kilang. Ia nanya ke nuan . Aku enda nemu nuan udah pulai ke rumah”.
“Nuan pulai enggau sapa?
“Dia anjung ulih Aya Libai, Milna ke ngasuh”.
“Ne..aku ninga Brem datai ngagai rumah Milna tang pengujung, seduai ia belaya”.
“Amat”.
“Nama utai ke ngasuh seduai ia belaya?”
“Nyangka laban kebuah Neo kini”.
“Laban nuan ngubat Milna?”
“Engka”.
Enda mukai-mukai datai aya Runggai ngena jeep ia. Mandur Sily enggau indai Neo nyau kesal. Tang meh Neo agi lantang baka ke enda irau.
Diatu Brem benung nganti nuan. Ko aya Runggai.
“Dini”.
“Ba endur selama”.
Neo minta diri mupuk dulu ngagai indai ia laban ka bertemu enggau Brem.
“Jimat ke Neo”, ko indai ia.
Neo empu nadai berasai takut betemu enggau Brem. Maya nya suah amat ayas mua Milna ayan ba mata ia. Neo ngusap ka mata ia awak ke ayas Milna lenyau. Enggau singkang ke lubah, ia bejalai nuju ngagai Brem ke nyau kasak-kasak nganti penatai ia.
“Selamat tengahari Boss, sapa Neo”.
“Selamat tengahari”
Lama seduai enda memunyi.
“Kemaya nuan datai?”
“Baru aja”.
“Milna udah gerai?”
“Bedau”.
“Nama di ningal ke ia?”
“Laban udah kala di tinggal ka”.
Seduai enda memunyi baru. Brem mikir ke jaku ke patut. Nyadi enggi Neo nganti baka sungai enda be ulu.
“Pagi nya aku enda patut ngabas ia. Tang aku meda nuan. Nama pengawa nuan din? Aku berasai cemburu meda nuan nyapi Milna. Lalu nambah ke nya naka pemanah mua Milna merening nuan. Amat endar meh nuan tu landik ngintu orang sakit. Berapa kali aku nguji enda enseput”. Brem nyintak seput lalu nyandih ba dinding. Neo nadai memunyi nadai bejaku seleka. Ia enggai merening mua lelakinya.
Penegelama aku bejalai, aku selalu nanya, nama enda utai ke di kereja nuan ba Milna.
“Milna?”
Brem merening mua Neo enda tilap-tilap.”Bisi nuan madah ke diri rindu ke ia?”
“Nadai, saut Neo pandak aja”
“Tang ia rindu ke nuan”
“Engka”
Brem murus-murus mua ia. “Aku sigi udah nemu ianya sigi rindu ke nuan. Utai tu nyangka enda nyadi enti nuan nadai meri ati ngagai ia”.
“Aku baka ke ngelamatu”
“Ngintu orang ke sakit ngena cara ke manah. Laban adat basa aku manah enggau ia. Bakani aku ka beterus-terang laban utai tu agi di pelalai”.
“Nuan tau beterus terang dalam hal tu”. Neo enda memunyi.
“Nama salah nuan madah Milna rindu ke nuan”.
“Bisi, saut Neo”
“Nama nuan nemu, laban nuan keras?” tanya Brem udah seduai enda memunyi.
“Sekali agi aku enggai muai peluang tu. Aku nemu sapa aku tu”.
“Nyadi nuan nerima pengerindu Milna?”
“Sebedau tu, Milna sigi udah rindu ke ia. Tang aku ngelala sapa aku tu. Aku nemu aku empu”.
“Diatu, bakani asai ati nuan?”
“Aku sedar, ia nya pengawa tu enda salah”. Lalu aku minta nuan nyurut kediri.
“Neo!!” ko Brem lalu semak ngagai Neo lalu megai kedua lengan ia.
“Nuan tu gerai ke enda. Nuan tau aku buai, nemu?”
“Nya pan udah aku fikir”.
“Nyadi nama utai kedeka nuan?” ko Brem nyau lemi tulang.
Neo nyintak seput lalu nensam ke mua.
“Anang ingat ke Milna, Boss, tinggal ke ia, awak ke ia nentu ke pejalai idup ia empu.”
“Neo…Neo.. nuan tu nemu endar” ko Brem ngetat ke penusah ati ia.
Brem merap Neo enggau sabak-sabak. Neo mega nyau sinu meda Brem ke nyabak.
“Minta ampun aku tu Ne..nuan tu kelalu manah enggau pintar. Aku nadai nyadang nuan ngemintar tu. Pia ko Brem nyau sesingut. Terputus-putus jako Brem. Neo ke biak agi ulih meri jaku ajar ngagai orang ke tuai agi ari ia.
“Nuan tu amat endar, baka kitai lelaki mesti nemu diri empu. Nyangka nuan menang ba hal tu lalu aku ngalah kediri,” pia ko Brem.
Brem tu mega baka mensia ke bukai ti enda lari ari pengasa ati ti benci lalu ka malas ngagai orang ke udah ngasa ke ati ia. Baka kitai ke lelaki ke ngasai ke diri kering, ia tak enda semina sanggu nerima pemutus jako Neo bakanya aja.
Utai ti di kenang ia diatu ianya antara ia enggau Milna, sema Neo enda ulih di alah, Milna meh endur ia mantup ke pengeringat. Ba Milna meh endur ia bebalas.
“Milna nuan tu enda nemu meri utai ke dikingin ati aku”.
“Nama utai ke dikingin ati nuan Brem? aku bebasa ke nuan siku aja laban nuan ketuai kitai”. pia ko Milna.
“Ukai enda aku minta nuan meri aku pengingat ke cukup ngerindu ke ati. Enda ke nuan ninga jaku aku” pia ko Brem.
“Endang, aku mereti ke nama utai ko nuan. Tang ingat ke enda nuan sebedau berangkat ke Sabah? Nuan meri pil ngasuh enda nemu utai ngagai aku.”
Brem nyau tekenyit. Ia enda nemu bakani Milna tau nemu hal tu.
“Ari ni nuan nemu?”
“Ai, nya enda aku irup, laban aku enda lantang ati. Nama agi, lebuh nuan nanya aku ngantuk ke enda.” Serunyut jaku Milna enda tinggi. Perening mata ia pulai baka selama. Pandang mata ia ti nelap enggau ti lurus ati.
“Bisi nuan madah ke hal tu ngagai orang bukai?”
“Nadai laban aku ka nyaga pemanah nama nuan”.
Nya baru seput Brem lantang.
“Terima kasih Milna laban nuan siku aja orang ti pandai. Udu penau meh nuan tu bejaku nitih ke runding ukai ntih ke peneka ati.”
“Aku ka pulai”.
“kati aku agi bisi peluang ngabas nuan baru?”
“Nadai salah, pintu kami agi tebuka.
Seduai lalu beperening pangan diri. “Aku ka mulai ke barang ke berega tu, laban enda manah asai ba aku nerima utai tu.”
“Anang, pantang ba aku ngambi pulai barang ti udah aku beri. Enti nuan enda nguna ia beri ngagai bala apai indai nuan. Milna di peda ia kakang-kakang.
“Terima kasih, aku simpan meh barang tu ngambi ke nyadi ke pengingat tua”
Brem meremi ke pala ia lalu nyium kening Milna. Nama agi deh berengkah meh pengerindu ati seduai ke ngasuh sinu.
“Sekali agi, aku minta ampun ngagai nuan, Brem”.
“Aku pan pia mega ka minta ampun ngagai nuan, nuan meh indu ke cukup bajik ke udah kala ngasuh ati aku runtuh laban pengerindu. Datai ke jemah ila aku sigi agi rindu ke nuan”
Nya meh sada nyawa ke cukup ngeruntun ati Milna ke cukup berat di asai ke ia. Datai ke jemah ila ia sigi agi rindu ke Milna. Di perening ia baru mua Brem enggau ai mata ti naya. Baka gaya ia ka meda sereta merati ke garis mua Brem ke jempuk laban ai mata.
“Aku rindu ke nuan…aku sayau ke nuan…..enda mudah aku labuh pengerindu ngagai orang bukai. Aku, aku ka belajar nerima utai ti udah nyadi, nyangka ari nya siti penguji ari Petara. Brem madah ke jaku ia sambil murus-murus mua Mina ke nyau jempuk laban ai mata.”
“Nuan nemu Milna, langkau enggau babas tu udah nyadi saksi ari pengerindu tua ke pangan diri ke puntan baka menasan jalai jelu. Rumbau baka buah melanjau ulu. Laban penyayau aku ke nuan, aku tetap datai kitu taja pan nuan nadai begulai enggau aku agi. Ba setiap dinding enggau tulang perabung langkau tu ke selalu memua ke gamal nuan ke benung tuchum . Angin ba luar bepuput enggau cukup begadai muput ke jari nuan. Pengingat ke cukup manah ke enda nemu padam ngapa. Ampun ka aku Milna enti sema aku enda ulih madam ke pengerindu aku ke nuan. Aku asai ke enda ulih…amat enda ulih……..”
Bakanya meh penalam pengerindu Brem ke Milna. Lalu baka nya ga Milna, pengetan ati ia enda mudah ngeruntuh ke rumah tangga orang bukai, jauh ke ngasuh ati orang pedis lebih agi ke sebaka enggau ia.
“Tetat ke meh ati nuan. Anang anyut laban pengandal ati ke nadai penguntung” pia ko Milna.
“Aku pulai au”.
“Au, alai meh nuan pulai” ko Brem ke merening mua Milna.
Milna lalu nyingkang ke kaki ia pansut ari langkau. Brem agi majak merati ke Milna alah nyau datai ke Milna enda di peda agi. Aya Runggai lalu terus mai Milna pulai. Brem lalu ngerebah ke tubuh ia ba peninduk ke digaga ari bila buluh. Ati Brem amat-amat ancul luluh.
Pengelelak enggau pengelembut tulang ia diatu baru bisi berasai. Laban tadi ia mansut ke semua runding, pengeliat ati kena ia nyatup Brem. Enti tadi Brem enda sangu lalu ringat amat. Nama enda penyadi ia tadi. Nyangka Brem ka bekasar enggau ia lalu mutus ati ka masung ia. Nasit Tuhan agi ngelindung ia.
Milna empu pan alit ati, bakani Brem tau lembut lebuh napi ia lalu mudah nerima semua utai ke di pansut sereta nama ke buah ia enggai.
Lebuh maya Mathias Suky mansa, Neo pan lalu madah kediri ka diau din ngambi meniga malam.
“Padah ngagai Milna, pengawa aku ditu bedau tembu. Tambah mega pala aku tu nyau bepusin. Dua ari agi baru aku kin.”
Milna lalu asa ati taja pan Neo ka nembu ke hal ia enggau Brem dulu.
Neo sigi endang ngadang Milna sigi asa ati lalu nganu ia enti sema ia nadai pulai.
“Lemai lagi aku ngambi nuan baru, tembu tauka ke enda pengawa nuan enggau Brem nya, nuan mesti pulai kitu.” Pia ko Milna sebedau Neo berangkat.
Tang diatu Neo tepaksa ngelaban jaku ia empu laban ati ia agi enda nyamai. Enda manah ga mantai ke mua tusah, mua masam lalu enda bagak ba mua Milna. Ia ka belelak ba rumah ngambi ke mendua ari. Ka ke kebun dulu ngambi ubi, subung lalu ngiga pisang ke nyau tuai enggau buah rungan.
Pagi tu ari agi embap-embap. Tang bala ke gawa kilang nyau bepas-was. Milna tumu-tumu pagi udah bejalai ngambi angin ke beresi seraya ke meda rampa menua ke cukup besai. Jalai alun di peda tinjau ari atas.
Nyadi, ba seberai din ba endur kilang tu ayan tubuh Brem ke bejalai sindau-sindau. Bala ke gawa ba kilang alit ati meda ulah ia baka nya. Ukai tak berapa buah kereta mansa endur nya tang ia enda peduli. Enggau ati ti lantang ia bejalai ba kebun bungai. Lama agi ketengah agi ga ia. Tak tekenyit ia meda Milna tu bejalai kediri melakang ke ia. Brem lalu berunding ka nith ke Milna. Ia mutus ati ka ngagai Milna.
“Nuan tu meh indu ke cukup berani. Enda berasai nuan kah ngemedis ke ati aku”. Ko Brem lebuh ia betapi enggau Milna.
“Ngemedis?” ukai enda aku udah madah manah-manah ngagai nuan. Lebuh maya nya, enda mukai-mukai Neo pansut. Nyau nambah agi ga pengeringat Brem.
“Ia enggai ke aku laban setegal nuan”. Ko putap Brem.
“Ukai, laban ia nemu singkang pejalai ia salah”.
“Tambah mega nuan Brem mesti ingat, pengerindu tu enda ulih di ansak.”.ko terang Milna.
Brem nuduh enggau ati ti ringat. Brem di peda nyau enda ngelala diri?
“Ngeleda meh Brem”, ko Neo madah ke ia.
“Bangkai nuan anak kampar, anak amak nengeri setegal nuan Milna tu lari ari aku”
Asai ke deka pecah dada Brem maya nya. Runding ia udah tusut. Sitan udah masuk dalam runding ia. Diatu ia ka bebalas. Nyau enda befikir panjai agi, ia lalu ngayun ke jari ia ngagai Neo. Tang Neo sigi udah sedia. Enggau naka pengelancat ia nyilat tumbuk Brem lalu ngengkah ke sabi ngagai rusok Brem.
Nama agi nyau, nyau betambah meh pengeringat Brem. Bakani kati Neo nguji enggau naka ulih betan napi balas serang ari Brem. Ke sekali tu ia tumbang laban enda tetan kediri. Brem lalu terus nerekam lalu naka ulih ia nginsah Neo. Enggau naka pengering tulang Neo ngusai ke Brem. Milna lalu manjung minta sah.
“Angkat nuan “ ko kangau Neo lalu terus narit lengan Brem tak lalu di tarit ia Brem enggau naka penegal tulang lalu tepangka betul endar ba jeep ia.
“Aku ukai anak mit, takut ke jako emba nuan!!”
Ukai main-main pemedis ati Brem ninga jaku Neo taja pan ia alah tang agi bisi maya ia malas uti ngagai Neo enggau Milna.
Milna nyabak laban ke balat tekenyit sereta tusah ati lalu Neo nyau enda memunyi ngetat ke abi ke agi pedis bekau ke di jamah Brem. Nya meh gaya penusah ke udah nyadi ba dua iko lelaki ke berebut ke pengerindu siku indu ke diau ba nengeri.
“Mil..nama utai nyadi kebendar? Nadai siku madah ke aku” ko Neo nanya.
“Brem…Brem…ko ia nyau sedan-sedan nyabak.”
“Lapa enggau ia?”
“Ia agi dendam enggau aku. Ia nguji ka masung aku, tang seninjik ga nuan datai ditu. Enti enda…..
Ba mua Neo, Brem sigi nerima nya. Tang sigi ke baka orang ke lelaki, ia sigi enda ulih nerima perangai Milna bakanya aja ke udah ngerusak ke semua utai ke udah di aum ia. Ari ati ti pedis nya ke lalu mansut ke pengeringat dalam dada.
Ia teperasa ulih pengandal ati Milna. Maya ia bejalai ba madang bungai, dia ia meda Milna, nama agi pansut meh pemedis ati enggau dendam ia ngagai Milna. Nya ke lalu ngujung ke utai tu nyadi baka ke di peda kitai tu.
Brem ngereja pengawa enda enggau fikir agi. Ia nyau enda ingat ke sapa ia empu. Siku ari orang ke pemesai ke gawa ba kilang ke cukup di pebasa ke orang udah ngereja pengawa enda ngena fikir lalu amat-amat ngemalu.
Pengudah ia ningal ke Milna, Brem lalu terus pulai. Ba rantau jalai ia bepansa enggau mandur Sily ke nyau tebelenga alit ati meda ulah Brem. Datai aja ia ba Opis lalu lesap enda temu tunga. Semua orang ke gawa nyau irau ati. Nadai siku sida nemu nama utai ke bendar nyadi.
“Mil..aku enggai meda nuan nyabak”. Pia ko Neo ke murus-murus buk Milna.
“Aku nadai ingin ke utai tu nyadi. Utai tu ngasuh malu amat. Uji enti bala raban Syarikat nemu hal tu belaya setegal berebut ke indu ke nadai rega.” Ko Milna enggau ati ti nesal.
“Anang meh nuan ningal ke aku Ne…” ko jako ia baru.
Milna amat-amat ngarap lalu ngenang pengerindu ti tuchi . Milna pulai suman baka selama lalu ngesuh ke seput ia. Neo pan nyau berasai sinu sereta tusah ati meda Milna.
Udah nya Milna lalu mai Neo pulai ke rumah ia. Milna mujuk ia ngambi ke ati ia enda baban lalu ulih napi semua penusah ke nuntong. Neo agi sepiak Milna ke benung ngelap peluh ia ngena tuala mit.
Neo lalu mai Milna makai. Tang Milna lalu enda masuk makai, semina ai irup aja di pinta ia. Milna narit jari Neo lalu di sium ia.
Malam ari Milna lalu kena celap angat. Tubuh ia nyau berasai pedis lebih agi ba kaki ia. Tak naka pemedis asai sepi ia. Nya ke ngasuh Milna nyau kakai-kakai sampai ke Neo nyau enda terenah duduk laban ia.
Talipaun ngagai hospital ngangau ke ambulance. Milna enda ulih mantah agi sekali tu. Ia lalu di taban ngagai hospital ngambi ke di perubat. Peda gaya ia nyangka di buntas. Neo sigi tetap ngibun ia sepemanjai malam.
Bakani gaya Brem ke bejalai ari tadi ngena jeep ia? Sampai ke diatu lalu nadai meda batang idung ia.
“Tadi Brem mai kereta ia kediri empu enda mai deriba” ko sekuriti guard.
“uji nuan nanya ngagai bala bukai nyangka sida bisi nemu kini ke penunga ia”.
“Au ,” ko sapit pengurus.
Lalu maya nya mega talipaun lalu memunyi, Duing sapit pengurus madah ke nadai siku sida nemu kini ke penunga Brem. Nambah ke nya aya Runggai empu pan enda di padah.
“Aya Runggai enti bisi hari datai meh ke rumah “ ko Miai
“Au, meh”.
“Aku ka berandau enggau nuan aya Runggai. Kati kita ngelama tu bisi penangor ba semua pengawa?”.
“ketemu aku, nadai, enti bisi nya pan ka di perunding ke enggau bala mayuh”.
“Nyangka nuan nemu Brem tu bisi masalah diri empu?”
“Nya enda aku nemu”
“Nyangka ia ngagai langkau arau ia?”
“Ngagai rumah Remeyu? Tang enda patut ga sampai malam pan bedau ga pulai?”.
“Sapa nemu uji nuan talipaun kin?”
Miai lalu talipaun ngagai rumah Remeyu. Ngena endar ga Remeyu tu baru pulai ari Bintulu.
“Remeyu, bisi Brem datai ngagai rumah nuan kah?” ko Miai.
“Nadai, Remeyu nadai di rumah”.
“Nadai ngawa Remey, terima kasih”
“Sabar meh akak, nyangka Brem ngagai Brunei.” Ko padah aya Runggai.
“Enda patut, ia mesti madah ngagai aku enti ia kin”
Hari siti bedau ga Brem pulai, Miai nyau majak irau-seirau. Ia udah ngasuh orang ngiga ba sebarang endur. Nyau kira ke pukul tujuh lemai, Remeyu datai ke rumah Miai.
“Nama utai ke udah nyadi ba Brem?”
“Aku pan enda nemu”
“Nyelai amat.” Ko Remeyu murus-murus dagu ia.
“Kediatu aku selalu meda ia enda tentu memunyi. Enti sema aku nanya ia, ia lalu nganu. Aku ka nulong ia enti ulih.”
“Ia bisi madah ke penusah ia empu?”
“Bisi”.
Remeyu, baka ke berunding. Peda gaya ia rapat endar enggau Brem.
“Bisi nama-nama berita enggau Milna?”
“Milna? bisi carut enggau Brem”
“ari ni nuan nemu?”
“Ari aya Runggai,.nama deh”
“Tang aku minta nuan anang tekenyit, bai jenuh au. Ke bendar Brem tu bisi bepangan enggau Milna”.
“Tang nama?”
“Tang ia ke bendar Brem kemari bisi betemu enggau Milna ba kebun bungai nyangka seduai bisi belaya lalu Neo pan nyangka enggau mega maya nya.
“Oh..Miai asai ke enda pecaya”.
“Mayuh mata meda. Ke bendar Brem tu orang ke manah. Begulai enggau orang pan ia beati-ati. Pengawa ia pan manah. Tang agi mayuh utai bukai ke nyadi. Ia sigi ngembuan kunci rumah tangga, enti ia ulih meri utai ke di pinta bini ia enggau sida sebilik, nama kebuah kita enda ulih meri siti pengidup ngagai ia”.
“Remeyu nucur api insap ia lalu nyirut dalam-dalam. Nyadi tudah Miai nyau nensam ke pala merening ngagai geladak.
“Miai, laban tua sekaban, aku udah lama nemu Brem beguna ke penuh pengerindu enggau kasih sayau ba rumah”.
Enggau singut-singut ia ngaku udah telanjur pengelama ia nyadi bini orang ke bepangkat tinggi.
Nama laban ia Brem enggau Milna belaya.
“Nya, hal ba pengawa”. Ko padah Remeyu baru.
“Sapa orang ke tunang Milna?”
“Neo, Milna diatu agi ba hospital”.
Dalam ati ia bisi amat pengarap ia ke Neo ngambi Milna ke bini. Enda mukai-mukai datai dua iko orang ke gawa kilang ke rumah Miai.
“Aku minta ampun. Brem udah di temu,” ko siku ari seduai ia.
“Dini?”
“Ba batu lima belas, Tang diatu ia ba hospital”.
Eksiden? Oh..Tuhan!! Miai nyau asai deka luput ninga nya. Remeyu lalu nganjung Miai ngagai hospital sama enggau kuli dua iko nya tadi.
Neo tak bisi ati ka pansut enda lama. Dua iko indu misi benung mantu Milna meresi diri. Tang bakanya ga dua iko indu misi benung mai orang ke sakit ngena troli. Asai ati ia, bilik ba depan Milna udah di sedia ke endur ia. Laban ke sekut mimit, Neo nyandih ke diri ngagai dinding sambil ia meda sapa orang ke sakit nya. Tak tekenyit ia meda orang ke sakit nya.
“Brem..? ko ati ia nadai runding agi”
“Au, Brem eksiden ba jalai Desa.” Ko indu misi ke ngasul ke troli.
Neo nyau keketap ati ia lalu nutup mulut ia empu. Ingin asai ati ia ka nitih ke billik. Tang meh singkang ia tak enggai nyadi tak berat asai sepi ia. Semina mata ia aja agi pesap-pesap meda Brem di pindah ke indu misi ngagai atas katil. Nyau gegetar sereta ati ti tusah, berumban ia tama ke dalam jamban. Dia meh ia nyabak belalai enda ingar enggai ke di dinga orang. Nama utai ke udah ke nyadi ba ia?.
Tang Milna ka di padah ke dulu. Mesti ko fikir Neo, nama agi udah ngemas diri indah, ia lalu terus nuju ngagai Milna. Datai dia, Milna ngepai ke jari ia.
“Ne..nama gaga nuan?” ko Milna
“Nadai..nama-nama” ko saut ia nyau getar-getar.
Milna nyau majak nyima-senyima . Di peda ia ai mata Neo agi bedanau.
“Padah meh Ne..”
Neo lalu duduk ba katil semak Milna sambil megai jari Milna.
“Brem”
“Nama deh?”
“Ba bilik sepiak nya, eksiden. Balat ia telih
“Oh..nuan bisi meda?”
“Au”
“Ia bisi meda nuan?”
“Nadai, mata ia pejam endar”.
“Enggai aku ditu agi Ne…aku ka pulai. Ko Milna.
“Mil..nuan bedau gerai. Malam tadi nuan kena celap angat
“Enda, uji nuan megai?”
“Angat enda?”
“Orang idup sigi angat. Enti celap nya tanda ia udah mati. Kitai minta pindah bilik aja au?
“Bayang ke meh, kitai di kelesey ke bala indu misi. Dua iko jaguh kilang ke betumpu bilik sama bela telentang laban belaya berebut ke indu…”
“Milna..”
“Kangau ke doctor. Aku ka pulai.
Betul endar ga maya nya doctor tama ke bilik Milna laban ka ngubat ia.
“Nama berita?”
“Dok..aku ka pulai. Ko Milna.
“Endai..bedau gerai udah minta pulai.
“Enggai aku”
“Milna, nuan mesti sabar..enti sema bisi utai nyadi ba rumah, sapa tusah?”
“Awak ke mati ga, idup pan nadai meh guna”.
Neo nyau bingung.
“Ah deh! Nuan ngenat ke diri ditu dulu. Ambu aku nyin indai Brem. Aku ka ngabas ia kin dulu enda lama.
“Bakani, enti sema nuan datai di rumah” ko tanya Neo
“Aku enda peduli”.
Maya nya sida pan lalu tekenyit lebuh Remeyu tama ke dalam bilik.
“Nama berita kita semua?”
“Aku ka pulai” ko Milna.”
“Lapa, laban bisi Brem?”
“Au” ko Milna madah terus terang.
“Pindah bilik aja”.
“Enggai. Aku enggai ditu” ko Milna majak enggai-se enggai.
Remeyu lalu berunding enggau doctor. Maya nya mega ambulance di sedia kena mai Milna pulai ke rumah. Doktor semina ngiling ke pala.
Miai bedau ulih meda Brem. Ia agi tusah ati ke penusah ke udah nuntung laki ia. Utai tu semua salah ia magang. Berapa kali ia minta ampun ngagai laki ia Brem. Tang Brem semina setengah ngelala setengah enda. Ia enda mereti ke jaku bini ia. Miai enda nginsit ari tisi laki ia. Tu meh ke penudi ia mandang ke budi sereta pengerindu enggau kasih sayau ngagai laki ia.
Kati Tuhan agi bisi meri peluang ngagai aku kena mandang ke kasih sayau aku ngagai Brem?. Agi ke enda ia ninga serebana ati aku tauka percaya aku diatu udah sedar ari pengilap pengawa ke udah aku kereja.
Semalam-malam ia enda ulih ngelelap ke mata. Ia empu nyau di tinggang pengesal ke amat-amat endar. Seleka jaku pan nadai meh pansut ari mulut Brem.
Maya tu baru pukul sebelas pagi. Neo baru aja nembu ke pengawa ia ba Opis. Udah nya lalu empungas mua ia enggau ai. Lalu kemaya nya datai orang ke nyadi tanggung jawab ia.
“Kesal aku nganti ari tadi”, ko Milna…”Aku berapi dulu. Ukai enda tadi mayuh amat temuai”
“Sida mayuh utai tanya, nyau lelak aku nyaut sida” Neo nyau tegenung meda pemanah mua engau pemajik Milna ke bediri semak ia. Siti sium ke cukup manis terengkah ba bibir mulut Milna. Nya ke ngasuh Milna nyau enda ingat ke pemedis ia agi. Neo lalu di tarit ia semak ke agi ngambi ke teleba ba kaul pengerindu ke nyau udah jauh mansang.
Neo mesti neleba kediri enggau kaul ke lebih agi moden enggau buah ati ia ke pandai enggau mayuh penemu ari ia. Ukai nya aja, enggau penyemak ke lebih ngerindu ke ati, ia ngarap ke Milna jampat gerai.
Neo lalu ngelepas ke jari Milna ke merap ia.
“Ka kini nuan?”
“Nyendia ke pemakai. Peda nuan jam diatu udah pukul dua belas lebih”.
Peda ia apai enggau indai Neo udah datai ba rumah Milna.
“Bakani gaya Milna, Ne..?” ko tanya indai ia.
“Manah. Nyau berinsur manah ia”.
“kati nuan rindu ka ia?”
“Au”ko Neo lalu nensam ke mua.
Apai enggau indai ia sigi merati ke ia. Entah nama enda utai bemain ba runding sida ia maya tu.
“Nama apai enggau indai enda setuju?”
“Eh..nadai, kami duai sigi berasai gaga meda nuan begulai enggau ia”.
“Enti sema ia udah atur enggau nuan. Nuan mesti meri terima kasih ngagai Tuhan”.
Apai ia madah ke ati diri ngagai ia. Indai ia nyau labuh ai mata laban kelalu gaga.
“Bedau nama-nama indai udah gaga endar”. Ko ia ke benung ngendas ai mata.
“Nyesal aku enda berandau lama enggau apai enggau indai nuan” ko Milna pengudah seduai ia mupok.
“Nadai ngawa”.
Milna merap Neo endar-endar lalu ensium ia. Malam nya apai enggau indai Milna datai ngabas ia. Remeyu ke madah ngagai apai enggau indai Milna ia madah ke Milna tu sakit. Penatai seduai tu sigi ngasuh Milna tekenyit. Milna berasai lantang endar maya nya tambah mega laban Neo nyau jampat endar di terima apai engau indai Milna.
Apai enggau indai Milna rindu amat ke Neo. Enggau gaya diri empu bakal mentua meri tanda mata ngagai calon menantu ia.
“Belabuh ari saritu nuan mesti ka lebih begaya agi. Kena meh nama utai ke udah kami beri ngagai nuan. Angap meh utai tu beri kami enggau ati ti tuchi ari kami”.
Neo enda nemu nama utai ke nyadi udah tu. Taja pan apai enggau indai Milna sigi rindu ke ia. Kekadang ia berasai takut ngenang ke pengidup ia jemah ila begulai enggau Milna. Di perati ke ia Milna ke udah jenak tinduk. Nyangka ati ia udah jenuh. Neo tuchum ke diri. Neo nyintak seput ia lebuh ia ingat ke terubah ia bekelala enggau Milna maya dulu suba.
Enggau ati-ati sekali Neo ngebab tubuh Milna enggau pua.Malam pan nyau jauh ia pan nyau deka belelak ba bilik sepiak. Enti diatu Milna benung nanggam pengerindu enggau Neo, Brem benung gegaring ba rumah sakit. Pendiau ia agi balat. Bini ia pan nyau majak irau-seirau meda laki ia nyau bedau bisi insur.
Untung meh ia nadai kala nyebut nama Milna. Jaku ke terubah pansut ari mulut ia ianya jaku muji nama Tuhan.
“Ohh…Tuhan…!”
Miai nyau nyabak laban udah nganti enggau cukup penyabar. Pengelama seminggu siang enggau malam enggau penuh pengarap nyangka agi bisi peluang endur ia nebus semua penyilap ke udah di kereja ia.
Brem tu udah mai penguntung. Ari pengimun enggau pendiau ke ati diri dia deh ia udah minta ampun ngagai Tuhan. Brem nyau teingat ke jaku Neo, bisi maya ila endur bini ia sedar ke pengawa ia ke salah. Diatu Miai mandang ke penuh kasih sayau ngagai ia.
Nyangka enti nadai belaya enggau Neo , sigi bedau Miai sedar ke penyalah enggau pengawa ke udah di kereja ia. Milna ukai mai penusah , tang meh muka buah runding jalai ngagai pengeleda runding Brem.
Sebulan udah utai nya nyadi, Milna nguji kediri bejalai ngagai kebun. Perangai enggau ulah ia ke ngasuh bala orang ke kereja kilang enggau anak buah ia berasai lantang. Apai enggau indai ia bisi nerima berita madah ke Milna udah gerai. Sida nganti pemulai Milna ke Sibau.
Sebedau pulai, ia ngagai Opis Neo dulu. Basa Neo enggau ia nya ke ngasuh ia bertambah sayau ngagai Neo. Neo enda di asuh Milna agi ngereja pengawa ke berat-berat sereta nuci barang ke kamah. Semina berapi enggau nyendia pemakai ke ia.
Di peda ia Neo ba dapur benung meresi mija. Milna nyau sinu sereta nyau betambah sayau. Lalu di berap ia Neo.
“Aku enggai meda nuan ngadu ke pengawa tu agi”.
“Semina berapi enggau betuci. Pengawa ke lempung aja”.
“Nuan kelalu manja ke aku. Lagi aku nyau enda ngelala sapa aku?” pia ko Neo sambil tuchum lalu nerus ke singkang ia. Milna lalu ngagai Neo lalu di berap ia ari belakang.
Surat ari Sibau di terima ia seminggu udah nya. Udah di tetap ke orang ari seduai ia pulai kin. Seduai di kangau lalu apai enggau indai Neo pan sama di kangau datai.
“Reti nya dua minggu agi kitai ka mupok kin. Ne..sedia ke nuan empu..” ko Milna.
“Ne..nama nuan tegenung?”
“Aku ngasai ke utai tu nyelai.”
“Nyelai?”
“Au. Enda lama da agi aku ka nyadi laki orang”
“Semua orang ngasai ke nya magang, nuan enda ngemedis ke aku enda?”
“Enda”
“Bakani ila enti bisi indu bukai ke bajik agi ari aku deh?”
“Aku nutup mata aku enggau daun ngambi aku enda labuh pengerindu ngagai sida”.
“Ah, bula nuan nya”.
“Ya. Aku ka tuchum ngagai sida, tang ukai ka nundi sida tang kena nambah ke pengagit ati sida ia gawa.”
Ujan mesi-mesi masah ke semua endor nya dia. Angin nyau majak bepuput ke ngasuh Milna nyau celap dedigak di berap Neo.
Milna duduk ba kerusi panjai, bok ia ke panjai ngerundai nipas bau nyau ngerembai di puput ke ribut. Neo nyau temati kutu meda pemajik Milna. Ia enda ngasuh Milna ngikat bok ia taja pan udah rangkai. Sampai ke seduai beberap baru udah seduai badu makai lemai.
“Aku rindu meda nuan bakatu”. Pia ko Neo.
“Aku nuchi ia dua minggu sekali”. Ko Milna lalu ngali ke diri ba pah Neo. Mata ia nyau perenching merening mua Neo.
“Enti bok pandak nyamai di intu”
“Anang guai diatu, seagi-agi tua bedau bisi anak, anang guai netak”
“Lapa mesti nganti udah bisi anak?”
“Awak ke aku bayam nya dulu”.
“Bakani enti tua nadai anak deh?”
“Nganti aja”.
Milna mejam ke mata ia. Bulu mata ia ke juring nya lalu kebut-kebut. Lama-kelama neritik ai ke ciru ari tisi mata ia. Lama agi laju agi ga ai mata ia naya.
“Mil..nuan nyabak?”
“Nuan nganu aku”.
“Enda, aku ulih nyaga diri”.
“Abis, aku takut nuan ngemedis aku”.
“Enda, pecaya meh sulu. Aku sayau ke nuan enggau pengambis ati aku, cukup penyayau….”.
Guntur ke memunyi ngacau seduai ke benung madu ke pengerindu. Ujan pan nyau majak bangat. Ribut bepuput naka pemalat.
“Sulu, nya tanda ia madah ke tua enda tau kelalu anyut madu ke pengerindu”. Ko Milna
“Mil? tua enda ngelui ari batas semina ke tanda aku sayau ke nuan”.
“Tang ba orang bukai, tu udah kelalu. Bedau jadi udah diau begulai”.
“Au meh, enda lama da agi tua ka kahwin.”
“Tang, anang guai dulu sayau”.
“Nama utai ke anang guai dulu?
“Ya ke siti tu,” saut Milna.
“O..nya sigi tetap. Ia ke cukup di kesayau ke aku ke di jaga ngelama tu. Nya sigi udah ungkup aku. Aku ka nembu ke ia ba malam ke terubah tua begulai tinduk ila. Antara bau rengut buah angkung ke meali-ali bau di tabur ba atas katil, tubuh nuan ke segala burak lis gali gegaring nganti aku ke megai, sayau…..”
*****AMBIS*****
