SAPE ( Nebah Sape)

 

KENANG PENGAWA BEMAIN SAPE  

Nyadi pengawa betebah ke munyi rengka main muzik kelia segi udah lama bisi, ukai semina betabuh enggau bemain utai ke bukai. Mayuh kitai iban enda nemu ari ni penatai Sape? Sapa asal nebah sape? Bansa ni ke ngembuan adat main sape?........aku semina ulih bejurai ke utai tu enggau ringkas aja laban aku empu pan enda tentu ulih nyidi utai tu jauh agi. Minta ampun meh ngagai bala kitak AU!!!!!!

Asal Sape

Nitih ke pansik aku ari bala bansa Kayan ke endur aku diau di ulu belaga suba, lebuh aku ke nemuai kin nitih ke kaban aku maya cuti sekula tahun 2004 suba. Nyadi lemai nya aku nurun mandi ba pendaie bansa Kayan nya suba. Lebuh aku ke mansa langkau siti, dinga aku retuk-retuk deh apai tuai siku benung kiruh be pansap ke lumpung bata' kayu siti. Di tanya aku ia ngena jaku melayu laban aku empu enda ga nemu jaku Kayan enggai bula kekitak...nya meh ia nyaut aku madah kediri ngaga Sape. APU!!!! nadai enda pengaga ati aku deh laban nya meh keterubah aku meda ngena leka mata aku empu orang ngaga sape.
    Nyau mayuh meh utai ke ditanya aku ba apai tuai nya. Ia bisi madah ke aku meh cara ngaga sape laban aku bisi seminggu kemisi enggau kaban ku nya suba ba menua nya. Nya meh ke ngejung ke aku nemu ngaga sape lalu nemu ga nebah mimit sampai ke saritu. Nyau pulai ngagai topik kitai asal sape. Apai tuai Kayan tu bisi nusui ke aku jerita bansa Kayan menya nemu begaga ke sape ari petara dulu kelia, di ambi apai tuai orang siku dalam mimpi. Nya meh ke ngasuh mimpi tu tadi lalu nyengenda ulih nyumpah ia begaga ke sape, lalu di turun ke pengelandik nya menya ba bansa Kayan.
    Nya alai anang teperasa meh kitai ke bansa Iban enti orang tuai kitai menya nadai mayuh nemu betebah ke Sape laban main Sape tu ukai ari Bansa kitai ari Jeman keterubah ia menya. TANG!!! nama ga kebuah kitai iban nemu ngajat ngena Sape lalu bisi ga nemu nebah sereta ngaga Sape kelia?....Bakatu ko tusi orang ngagai aku......KITAI Iban menya laban ke seruran bekayau ke munsuh lalu kitai Iban menya segi enggai meda Bansa bukai baka Kayan, Kenyah, Kelabit, Kantu enggau semua Bansa Orang Ulu ke bukai. Nya meh ke ngasuh kitai Iban seruran nyerang Numbang ngagai Menua sida ia di Batang Kayan Ulu Mendalam di pati aie Batang Kapuas Menya.
     Ukai nya asal kitai di menua Sarawak tu menya ko jerita, Tang Bansa Kayan menya segi udah lama diau di Ulu Baram lebuh sida ia ke bemunsuh enggau Bansa Kantu enggau Maloh kelia. Kitai ib an ke nyerang menua sida ia menya nyentuk ke berumpang menua sida ia lalu ngalah ke rumah panjai Bansa Kayan menya lalu berampas ke reta pengeraja bala Kayan kelia. Nya ke ngasuh Kitai iban Mayuh pemaie kelimpah ari pala munsuh ke di pumpong kitai. Reta ke bukai pan di ambi kitai. SAPE!!!! nya di ambi kitai meh menya. Nya meh ketungkah kitai Iban kelia ngelala SAPE!!!!
    Ukai nya nemu ga kitai nebah menya, semina meh tak naban ke pesaka bansa bukai, nya meh ke ngasuh bala Bujang berani menya lalu nangkap sekeda Bansa orang Ulu tu menya..Dipasung sida ia baik ke indu tauka lelaki. Di taban sida ia ke menua kitai iban. Nya meh ke ngasuh kitai iban nemu betebah ke Sape laban ti ninga sereta nunda bala Orang Ulu ke di tangkap kitai bansa kelia bemain.
    Anang kitai teperasa enti aku madah ke sekeda kitai iban ke agi mnchelak leka mata tu ukai iban peturun asal aki ini dua-dua ari darah getah iban....minta ampun dulu au!!!! Laban aki inie kitai kelia ke bisi bebini jadi enggau indu Bansa bukai baka maloh, Kayan, kenyah enggau beketan, bansa taman kelia nya alai kitai ke diatu mayuh agi ke ukai bedarah getah iban tulin enti di tusut ari niang Inie kitai ke bepeturun ari bansa bukai menya........Nya meh kengka penemu ke bisi di ambi aku ari apai tuai Kayan tu suba..Terima kasih ngagai ia ....

Pengada Keling

 

ENSERA KELING

JEMURING GADING

Nyadi sida Jemuring Gading enam iko diri menyadi diau di Panggau Libau Lendat Dibiau Takang Isang,Panggau Baroh Munyi Ningkoh Gading Tulang,Panggau Tinggi Begeri Tangkong Kenyalang.
Sida enam iko diri menyadi sama udah bebini,sama udah ngaga ruang bilik kediri tang sida sama bedau mai pemai ari bilik besai sida ti dipegai Jemuring Gading.Nyadi menyadi ti numbor dua dikumbai sida Sang Gima,iya ke numbor tiga dikumbai Senteba,iya ke numbor empat dikumbai Sentebai,iya ke numbor lima nya Ribai,lalu iya ke numbor enam Apai Sabit Bekait.
Nyau kelama bala sida menyadi udah diau kediri,dia bala sida lalu bebai bebagi ke utai. Jemuring Gading lalu ngempuru ka bala sida di ruai iya.Nyadi Jemuring Gading,laban iya megai bilik besai sereta iya ke tuai ka sida menyadi,mai alu papal seribu,kebok tuai, sengkuar buloh binjar kekitau nguan manok,enggau senyata ngayau mulau,baka pisau suran lapan enggau latok pematok duan dedugah di tempuan.Lebuh bebagi ke utai ngapa ti dikena beridup bersari-sari,enggi Jemuring Gading mega lebih.Nya alai baka pinggai mangkuk,periuk genuk enggau tikai kelaya,enggi iya endang luba.Nyadi bala menyadi iya bukai bisi mega mai tajau,benda enggau utai bukai.Pemai enggi Apai Sabit Bekait sabang penengkila enggau pentik penanya.Nyadi Ribai diberi Jemuring Gading tabong pemangkong,tali pengikat enggau pat pengerat.
Nyadi Apai Sabit Bekait enggau Ribai meda bagi diri enda ngemaioh enggi Jemuring Gading, kudi lalu enggai begulai enggau Jemuring Gading,Senteba,enggau Sang Gima.Ribai lalu mai bala iya pindah ngagai Tasik Besai Ledong Lelinang.Apai Sabit Bekait pindah ke Langit Baka Tambit Kapir Kendawang.
Udah sebulan nanda di langit,setaun nampun di bukit,Ribai enggau Apai Sabit Bekaiy sma agi mengkang pedis ati ngagai Jemuring Gading.Seduai lalu bebai begumpul ke bala,bala Ribai ari tasik,bala Apai Sabit Bekait ari langit.Bala sida bekayau ke orang di Panggau leboh ari malam.Laban sida ngayau rumah panjai diri empu,nemu meh sida tempat,nemu aroh, endang mudah mega sida ngalah ke bala ti ngetan ke rumah.Jemuring Gading mati dibunuh bala Apai Sabit Bekait enggau Ribai.Semua sida ke mati ninggal ke bala bini sida ti benung betubuh bisi.Bala Ribai enggau Apai Sabit Bekait enggai mai pala sida laban enggai nyalai pala menyadi diri empu.
Jemuring Gading ti mati nadai ditumbak,tang bangkai iya lalu disurau ke orang di tanju. Diberi santubong lalu disengai sida dia.Bangkai Jemuring Gading dalam sentubong nadai nemu but.

PENGADA KELING ENGGAU BALA PETUNGGAL IYA

Udah bulan beganti bulan,hari beganti hari,anak bala sida ti mati pan ada.Anak Jemuring Gading diberi nama Keling,anak Sentebai diberi nama Sempurai,anak Senteba diberi nama Pungga,anak Sang Gima diberi nama Laja.Bala sida tu semua lelaki magang.Sida lalu mansang besai,taun siti besai agi,taun siti besai agi.Leboh sida nemu bejako,sida berasai tusah ati laban nadai orang dikanggau ka apai.Enti bisi orang betanya ka apai iya,Keling lalu nunjok ka tanju endur Jemuring Gading disurau ke orang.

BUJANG TUAI

Laban ti berasai bendar timpang ketegal nadai apai endur betanya,Keling lalu berunding.Iya mai bala menyadi iya ngajih ke guna besai apai iya Jemuring gading nyadi mensia." Enti guna nya nyadi mensia ila,iya meh ambu kitai ka apai kitai," ko Keling.Bala menyadi iya setuju magang.Sida lalu madah ka indai sida ngasuh orang belian ngajih ke guna nyadi mensia awak ka tau nyadi apai sida." Enti kitai nemu sapa ti tau ngajih nadai pan salah," ko saut indai Keling,"Tang sapa ti disusoh,diasuh ngaga guna nya naydi mensia?"
"Kami enda meh nemu," ko saut bala sida,"tang enti kita ti tuai nemu tau ga madah,awak ka kitai nguji ngapa."
" Uji kitai ngasuh Ini Manang ti serumah enggau kitai," ko indai Pungga. "Nya tau meh uji asuh,tang enggi iya jalai belian," ko saut indai Sempurai. "Enti pia bepadah meh kiati," ko Keling.
Bala sida lalu bejalai madah ka Ini Manang nagasuh iya belian.Ini Manang nadai gak mayuh macham lalu madah kediri deka.Keling enggau meyadi iya lalu pulai ka bilik sida lalu mansut ka guna sida lalu ditanchang sida ba pun tiang di ruai.Maia ari nyau cukup,Ini Manang lalu mupok belaboh belian.Belian iya semalam-malam nyau datai ka pagi.Pelian iya nyau dipajak ka iya sehari-hari.Macham meh utai ditelah iya.Macham mega sampi disebut iya ti belian enggau piring,enggau ading,enggau ai,enggau tumpi.Udah tujoh taun,tujoh bulan,tujoh hari Ini Manng belian,baru guna nya nyadi mensia.Maia tu bala sida keling menyadi pan nyau besai agi.Guna ti nyadi mensia segenda-genda lalu dikumbai orang Bujang Tuai Besapai Pemanjai Lintang,Guna Tuai Putus Penanchang,Tujoh Taun Tuai Ari Indai,Tujih Taun Tuai Ari Apai,Nadai Bok Semina Gundai Iko Buntal Bekelenang.Endang nitih ka nama iya,Bujang Tuai nadai bok,semina gundai iya ti mimit aja.
Bujang Tuai idup baka mensia sereta pandai bejako.Sida Keling rindu amai berandau enggau iya.Sida enda nagangau ka iya 'APAI' tang nyebut iya 'AYA'.Bujang Tuai meh ti ngiring sida Keling,Laja,Sempurai enggau Pungga.Ngiring sida nginti,mansai nyungai,bumai betaun,manjok,ngasu beburu,ka atas,ka barh,enggau ka rumah.Dalam semua pengawa ti diajar iya,endang Keling ti udu nyulut agi dalam pemerani,pemintar enggau pengering.Nya meh kebuah Bujang Tuai enngau petunggal Keling ti bukai engang rindu betuai ka iya.