NENGKEBANG LAGU ( Mayuh bala kitak nanya aku chara ngaga lagu, tu meh endur aku bekunsi enggau kitak)

Mayuh amat lagu ke ulih di dinga kitai ngelamatu di tebah bala DJ, tauka di main ke kitai ngena teknologi baru jam ke diatu. Enti kelia, lagu mula di rekord tau ke di simpan ba piring hitam/chelum, udahnya kaset, lalu teknologi diatu ba cakera padat CD tauka DVD ba mayuh macham format, Wav, mp3, mp4 tauka bemacham ke bukai. Tang kitai ngelamatu semina rindu ninga sebengkah-sebengkah lagu sekali ke lagu pop, balada, joget, dangdut sereta gaya ke bukai. Kitai semina nemu ninga tang enda nemu berati ke bakani chara bala penengkebang lagu begaga ke tiun/ muzik, lirik/leka sereta enggau lagu nya empu.
     Nyadi ditu aku bekunsi ke penemu ke bisi di kembuan ari peneleba sereta ke di pelajar ke aku lebuh aku ke ngambi kos diploma ba muzik suba enggau bala kitai. Ngambi ke kitak ke macha ba blog aku tu nemu enggau silik bakani chara kami ulih ngaga sereta ngingat ke siti-siti lagu ke di tengkebang kami enggau nyamai. Tang ukai reti nya aku madah ke chara tu betul tauka patut di kena kitak, laban siku-siku kitai ngembuan penemu enggau chara ke muntang kediri bela enda sama. Tang enti kitak ka nguji ngambi penemu ari tu enda salah, ngambi ke kitai sama bela ulih nitih ke chara pangan diri sereta bekunsi.


UTAI KE PATUT DI KEMISI ENTI KA NGAGA LEKA /LIRIK LAGU
Mayuh kitai saru lagu kumbai kitai lirik, tang nya enda sebaka. Lagu nya di gaga ari lirik, lirik nya betulis. lagu ukai di tulis tang chara kitai nyada ke sera nyawa nitih ke lirik tauka leka. Kitai anang saru.


1. Keterubah ia kitak mesti ngiga siti batang runding  "Tema" . Chunto ia Tema "Pengerindu", kitak nguji
    ngerunding ba senentang ni pengerindu ke deka di gaga, ngagai indu kini, lelaki kini, apai indai kini tau ke
    ngagai utai bukai.

2. Udah kitak bulih runding ke tema pengerindu nya tadi ambi ke chunto nuju siku indu ke di sayau ke kitai.
    Kitai lalu ngaga leka jaku pengerindu nya tadi. Kitai enda ulih ngaga nama / tajuk lagu dulu laban tajuk lagu
    mesti besangkut paut enggau leka lagu ke digaga. Tang mayuh orang ngaga lagu dulu ngerunding                tajuk/nama  lagu, nya tepulai ngagai chara siku-siku. Tang enggi aku enda, laban aku enggai ke tajuk ia jauh
    lari ari peneka tuju leka lagu, takut ke enda besangkut-paut.

3. Ambi kertas enggau pensil/pen udah nya rintai ke kitai magang nama utai ke bisi ba runding. Anang guai
    edit utai ke ditulis kitai, anang guai nguji ngerintai dulu enggau manah. Kira ke udah abis jalai lirik nya di
    rintai baru kitai nusun, ngatur ia ngena "kronologi" jalai cerita enggau betul. Kingat ke tema kitai, pengerindu  ngagai orang di kesayau, nya alai tusun lirik kitai mesti besangkut paut enggau tema, enti rindu lirik mesti rindu enda ulih nyau madah ke tusah.

4. Udah kitai tembu ngerintai ke leka/lirik ngena chara lakar kasar. Udahnya baru nusun ia lalu ditambah ngena leka jaku ke manah-manah ambi ia bekaling sebut manah didinga chunto:
Lakar leka kasar
" aku amat sayau kenuan, aku segi enda bula, semina nuan aja ke di kerindu ba dunya tu"
Leka alus
"Aku amat sayau ke nuan
enda bebula, ukai mina beduan
semina nuan dara, nadai dua tiga
di kesayau ke di dalam dunya........".
Tu meh chunto ari leka kasar ke digaga kitai ari pun tadi. Arap ke kitak ulih mereti ke banding leka di atas enggau leka ke dibaruh, tang tuju leka ia agi sama, enda lari.

Nya meh chara aku enggau bisi sekeda penengkebang ke bukai begaga ke leka lagu. Kitak ke minat ulih ga nguji nunda.

CHARA NGAGA LAGU ASIL ARI LEKA KE DIGAGA
Siku-siku kitai munyi ko aku ari pun tu tadi, ngembuan chara ke enda sama. Tang ngambi ke kitak nemu, tu meh chara ke di kena aku lebuh ke mula ngaga lagu sepengudah ke tembu nulis leka enggau lirik lagu.
1. Enti kitak nemu bemain rengka muzik baka gitar tauka kibod, manah agi enti kitak terus duduk tauka megai rengka lebuh ke ka ngaga lagu ambi ke nyamai kitak nitih ke "key" tauka kord vocal/suara/nyawa kitak.

2. Enti lagu ke digaga kitak ngena rentak balada, slow rock, kitak mesti ngadu ke chara vocal/ belagu ke lirik nya ngena "instrumental". Titih ke "Hukum Do, re, mi, fa, so, la, ti, do" ambi ke rintai sada nyawa kitak ke ngaga lagu ulih beripih, enda sekejap tinggi, sekejap baruh. (Minta ampun ngena leka jaku injau mimit laban kitai iban nadai ngembuan leka jaku bakanya)

3. Uji ngadu ke lagu nya nitih ke genteran lagu(Rangkap) lalu di kingat ke kitak komponen vokal (Tinggi /baruh ) ba senentang siti-siti leka tauka sepemanjai genteran. Uji kingat ke ba genteran nya dulu, sampai kitak ulih ngingat ke enggau manah, baru kitak pindah ngagai genteran (rangkap) ke lumur dua.

4. "Hukum Rangkap"/ Ukum genteran
     - Selalu orang ngaga lagu, genteran 1 sama enggau chara vocal genteran 2, kekadang aja ba genteran 3 bisi beda mimit. Tang ba chorus/ tengah lagu ia segi angkat udahnya ba genteran ke ujung ia selalu ngerebah ke patah nyawa/vocal ke pengambis. Tang bisi ga bala komposer/penengkebang ngaga ba renggat ke pengabis ngulang chara patah nyawa ba genteran 1. Nya enda salah, laban nitih ke peneka sada leka lagu ke digaga.

Nya alai aku arap ke kitai ulih betati ke chara nya tadi, tang ukai semua penengkebang ngaga leka /lirik dulu bisi mega sida ia ngaga lagu dulu udahnya baru lirik. Ba munyi ko ke di padah ke aku tadi segi enda sama, aku pan kekadang ngaga lagu enggau muzik dulu dahnya baru leka ia. Nya alai ila aku nyabung baru enggau chara kami ngerakam vokal, program muzik enggau semua perengka ke di kena kami ngadu ke lagu ba studio.... bye......

SAMPI AKU BA GAWAI 2011 TU NGAGAI BALA BA BLOG TU : RICHARD THIAS

 
HOOO...HA......HO....HA  ... Sa, dua, tiga, empat, lima, enam, tuuuuuujuh! 
Enda aku busong ngelangkah gunong,
Enda aku tulah ngelangkah tanah,
Enda aku danjan ngelangkah bulan,
Enda aku tumbang ngelangkah bintang!
Kaki aku udah bediri di segi besi belumpong,
Nyawa aku nyapa nyembah di klasah tikai bedong long.
Lengan kanan aku ditanggam beringan lanchum selong,
Pala aku di-bap singkap jalong jabong,
Blakang aku ditinggang seludang baju burong.
Laban aku tu ukai mungkal ukai nanjal,
Aku tu endang niti endang nali,
Baka ijok tampung penduk,
Baka rutan tampung danan,
Baka ira tampung lemba,
Baka wi tampung tali.
Pecah periuk tanah ganti periuk tani,
Padam bulan diganti matahari,
Parai orang ka tuai ganti tubuh kami,
Pambu orang ka dulu ganti kami ka dudi.
Kami tu deka ngintu gawai dayak,
Nitih ka pekat, ngimbai adat menoa Sarawak,
Ngibun durok kitai bansa,
Negi ka menira adat ugama menoa Malaysia,
Ngambika tampak rita idup bersama di mata dunya.
HOOO....HAAA....
Nya baru aku ngangkat ka kita ke lama udah timpat,
Tinggang urat sebangki api.
Tu baru aku nyungkang kita ke lama udah tumbang,
Tinggang batang tebelian wi.
Aku nyerungkai kita ke lama udah parai,
Keranjai indai imbok kedidi.
(Tu aku ngangau ka aki kami Sera Gunting,
Ke tau nemuai ngagai gensiring langit kuning.
Ngangau ka tuai benama Begeri,
Ke dulu ngajar kitai beguna ka atau babi,
Laban iya ba indai ka Dara Manis Muka.
Aku ngangau ka aki kami ke benama Sarapoh,
Tuai ke berani nyanda bunoh,
Ringka-ringka ngema benong benda menaga.
Aku ngangau ka Aki kami Pateh Ambau,
Ke datai ari Pangkalan Tabau,
Peling lanting tawang ulih menang bedagang.
Aku mega ngangau ka Gerasi Belang Pinggang,
Seduai Rukok ke Pematak Bala Nyerang.
Aku ngangau ka Petara Betie “Brauh Gumbang”,
Seduai Datu Patinggi Gurang.
Aku ngangau ka Petara Jalir, Petara Gisang,
Petara Geringu, Petara Sumbang.
Aku ngangau ka Petara Gerijih Ai Marang,
Seduai Bangkam ke ngaram ka sampan buong Rajang.
Aku ngangau ka Tindin Pimpin Bragah Ngindang,
Seduai Entingi Keti Aur Tulang.
Aku ngangau ka Rekaya Tom Tajai Ngindang,
Enggau tuai entanak benama Unggang.
Ngangau ka Petara Uyut benama Bedilang,
Petara Atin apai Saang,
Petara Sabok Apai Mang,
Orang Kaya Dana Bayang,
Enggau Chulo bejulok Tarang.
Orang ngasoh aku ngambi ngabang,
Ngambi mansang,
Ngambi makai,
Ngambi nandai !)
Kita ka ari ili datai sabuah barong,
Kita ari ulu undor sabuah buong.
Kita ari langit nilik naka rekong,
Kita ari tanah nyengok naka punggong.
Ngabang abis, ngabang lengis,
Betambit pintu, bekaling alu,
Bekaling lantai, bekesai tikai.
Aku ukai ngangau ngapa, ukai ngangau pia,
Aku mai kita ngabang, mai kita mansang,
Mai kita makai, mai kita nandai.
Aku mai piring, mai ading,
Piring penganan, piring penyaran,
Piring Arak, Piring Tuak,
Udah sedia, udah nyengenda,
Ditikai wi, tikai peradani,
Ditikai rutan, tikai bemban.
Kita ke ngabang bakanya mega,
Anang tuboh puang, tuboh sabatang,
Anang mai tuboh murus, tuboh untus,
Tang mai ubat serangkap genap,
Mai batu teruba nemu,
Mai pengaroh gembar tuboh.
Anang engkah ngapa, engkah pia,
Engkah ba piring, engkah ba ading.
Ayan ka ba tegalan,
Lengka ka ba pedara,
Sikap ka di ketupat.
Ngambi ka kena peda, kena tela,
Kena iching, kena perening.
Awak ka kena genggam, kena simpan,
Kena sandoh, kena taroh,
Kena japai kena pegai.
Enggau sampi tu,
Aku Minta kami chelap-embab,
Minta gayu-guru,
Gerai-nyamai,
Bidik-lansik,
Betuah-belimpah,
Kaya-raja,
Aku minta tulang,
Minta pandang,
Minta iching,
Minta perening.
Awak ka kami mudah bulih duit, bulih ringgit,
Bulih padi, bulih puli,
Bulih reta, bulih tengkira,
Bulih setawak, bulih menganak.
Ngambi ka kami jelai rita, manah nama,
Nuchong baka bukit Rabong menoa,
Tinggi baka langit nungkat neraja,
Terang baka pandang bulan purnama.
Nya alai dinga ka kangau anak mensia, kangau anak uda,
Minta tulong, minta sukong kita.
SELAMAT HARI GAWAI 2011 NGAGAI KITAI SEMUA...CHELAP LINDAP, NGUAN MENUA.....HOOOOO...HAAA.....